Nêhêmi 7 - Nau Brah Ndu Ngơi 2023

N'gang ƀon Yêrusalem

¹ Lah mpêr ƀon hŏ nkra lôch jêh, gâp lĕ ntrŭp lĕ seng mpông jêh ri jao kan phung mât uănh mpông pêr, phung mprơ jêh ri phung Lêvi tâm kan pah khân păng.

² Gâp jao kan chiă uănh ƀon Yêrusalem ma oh gâp jêng Y-Hanani jêh ri Y-Hanania jêng kôranh chiă uănh ƀon, yorlah păng jêng du huê bunuyh răp jăp lơn jêh ri klach yơk ma Brah Ndu lơn ma phung êng.

³ Gâp lah ma khân păng, “Lơi ăn bu pơk mpông ƀon Yêrusalem tơlah hôm e duh nar, jêh ri ntĭl rnăng păng dôl phung gak mpông gŭ ta nây; jêh nây đŏng dơm bunuyh gak tă bơh phung gŭ tâm ƀon Yêrusalem, ăp nơm tâm rdơn tâm tra ntŭk ngih khân păng nơm.”

⁴ Ƀon jêng huy ngăn, ƀiălah phung ƀon lan gŭ tâm ƀon hôm djê̆ jêh ri ngih vâl mhe ê-hŏ geh ndâk ôh.

Amoh săk phung plơ̆ sĭt tâm n'gor

⁵ Brah Ndu gâp nsŭk nsôr nuih n'hâm gâp kuăl rgum phung ndrŏng, phung kôranh chiă uănh jêh ri phung ƀon lan, ăn nchih amoh tĭng nâm noi deh khân păng. Gâp dơi joi du ndrom samƀŭt noi deh phung hŏ plơ̆ sĭt tâm n'gor tal lor jêh ri tâm nây gâp saơ bu nchih pô aơ:

⁶ Aơ jêng lĕ phung dơi plơ̆ sĭt tâm n'gor Yuđa tă bơh ntŭk ƀư bu nă, nâm bu ntĭt phung mpôl hađăch Nêbukatnetsar nhŭp leo ƀư bu nă ta Babilôn, aƀaơ khân păng plơ̆ sĭt ma Yêrusalem jêh ri n'gor Yuđa, ăp nơm plơ̆ sĭt ta ƀon khân păng.

⁷ Khân păng plơ̆ sĭt ndrel ma Y-Sôrôƀaƀel, Y-Jêsua, Y-Nêhêmi, Y-Asaria, Y-Ramia, Y-Nahamani, Y-Môrdêkai, Y-Bilsan, Y-Mispêret, Y-Bikvai, Y-Nêhum, Y-Bana. Aơ jêng rnoh phung bu klâu tâm Israel hŏ dơi kơp:

⁸ Phung kon sau Y-Parôs geh bar rbăn du rhiăng pơh jât ma bar nuyh.

⁹ Phung kon sau Y-Sêphatia geh pe rhiăng pơh jât ma bar nuyh.

¹⁰ Phung kon sau Y-Ara geh prao rhiăng prăm jât ma bar nuyh.

¹¹ Phung kon sau Y-Pahat Môap, nâm bu ntĭt phung kon bu klâu Y-Jêsua jêh ri Y-Jôap, geh bar rbăn pham rhiăng jât ma pham nuyh.

¹² Phung kon sau Y-Êlam geh du rbăn bar rhiăng prăm jât ma puăn nuyh.

¹³ Phung kon sau Y-Satu geh pham rhiăng puăn jât ma prăm nuyh.

¹⁴ Phung kon sau Y-Sakai geh pơh rhiăng prao jât nuyh.

¹⁵ Phung kon sau Y-Binui geh prao rhiăng puăn jât ma pham nuyh.

¹⁶ Phung kon sau Y-Bêbai geh prao rhiăng bar jât ma pham nuyh.

¹⁷ Phung kon sau Y-Asgat geh bar rbăn pe rhiăng bar jât ma bar nuyh.

¹⁸ Phung kon sau Y-Adônikam geh prao rhiăng prao jât ma pơh nuyh.

¹⁹ Phung kon sau Y-Bikvai geh bar rbăn prao rhiăng pơh jât nuyh.

²⁰ Phung kon sau Y-Adin geh prao rhiăng prăm jât ma prăm nuyh.

²¹ Phung kon sau Y-Ater jêng noi deh Hêsêkia, geh du rsen ma pham nuyh.

²² Phung sau Y-Hasum geh pe rhiăng bar jât ma pham nuyh.

²³ Phung kon sau Y-Bêsai geh pe rhiăng bar jât ma puăn nuyh.

²⁴ Phung kon sau Y-Harip geh du rhiăng jât ma bar nuyh

²⁵ Phung kon sau Y-Gibêôn geh sĭn jât ma prăm nuyh.

²⁶ Phung ƀon tơm ta Ƀêtlêhem jêh ri Nêtôpa geh du rhiăng pham jât ma pham nuyh.

²⁷ Phung ƀon tơm ta Anathôt, geh du rhiăng bar jât ma pham nuyh.

²⁸ Phung ƀon tơm ta Bet-Asmavet geh puăn jât ma bar nuyh.

²⁹ Phung ƀon tơm ta Kiriat-Jêarim, phung Chêphira, jêh ri phung Bêrôt geh pơh rhiăng puăn jât ma pe nuyh.

³⁰ Phung ƀon tơm ta Rama jêh ri Gêba, geh prao rhiăng bar jât ma nguay nuyh.

³¹ Phung ƀon tơm ta Mikmas, geh du rhiăng bar jât ma bar nuyh.

³² Phung ƀon tơm ta Bêthel jêh ri Ai, geh du rhiăng bar jât ma pe nuyh.

³³ Phung ƀon tơm ta Nêbô êng, geh prăm jât ma bar nuyh.

³⁴ Phung kon sau Y-Êlam êng, geh du rbăn bar rhiăng prăm jât ma puăn nuyh.

³⁵ Phung kon sau Y-Harim geh pe rhiăng bar jât nuyh.

³⁶ Phung kon sau Y-Yêrikô geh pe rhiăng puăn jât ma prăm nuyh.

³⁷ Phung kon sau Y-Lot, Y-Hadit, jêh ri Y-Ônô, geh pơh rhiăng bar jât nguay nuyh.

³⁸ Phung kon sau Y-Sêna geh pe rbăn sĭn rhiăng pe jât nuyh.

³⁹ Phung kôranh ƀư brah: Phung kon sau Y-Jêdaya jêng noi deh Y-Jêsua, geh sĭn rhiăng pơh jât ma pe nuyh.

⁴⁰ Phung kon sau Y-Imer geh du rbăn prăm jât ma bar nuyh.

⁴¹ Phung kon sau Y-Pashur geh du rbăn bar rhiăng puăn jât ma pơh nuyh.

⁴² Phung kon sau Y-Harim geh du rbăn jât ma pơh nuyh.

⁴³ Phung Lêvi: Phung kon sau Y-Jêsua jêh ri Y-Katmiêl, jêng phung noi deh Y-Hôdêva, geh pơh jât ma puăn nuyh.

⁴⁴ Phung mprơ: Phung kon sau Y-Asap geh du rhiăng puăn jât ma pham nuyh.

⁴⁵ Phung mât njrăng mpông pêr: Phung kon sau Y-Salum, phung kon sau Y-Ater, phung kon sau Y-Talmôn, phung kon sau Y-Akup, phung kon sau Y-Hatita jêh ri phung kon sau Y-Sôbai, geh du rhiăng pe jât ma pham nuyh.

⁴⁶ Phung pah kan tâm ngih brah: kon sau Y-Siha, kon sau Y-Hasupha, kon sau Y-Tabaôt,

⁴⁷ kon sau Y-Kêrôs, kon sau Y-Sia, kon sau Y-Padôn,

⁴⁸ kon sau Y-Lêbana, kon sau Y-Hagaba, kon sau Y-Salmai,

⁴⁹ kon sau Y-Hanan, kon sau Y-Gidel, kon sau Y-Gahar,

⁵⁰ kon sau Y-Rêaya, sau Y-Rêsin, kon sau Y-Nêkôda,

⁵¹ kon Y-Gasam, kon sau Y-Usa, kon sau Y-Pasêa,

⁵² kon sau Y-Bêsai, kon sau Y-Mêunim, kon sau Y-Nêphusêsim,

⁵³ kon sau Y-Bakbuk, kon sau Y-Hakupha, kon sau Y-Harhur,

⁵⁴ kon sau Y-Baslit, kon sau Y-Mêhida, kon sau Y-Harsa,

⁵⁵ kon sau Y-Barkôs, kon sau Y-Sisêra, kon sau Y-Têma,

⁵⁶ kon sau Y-Nêsia, kon sau Y-Hatipha.

⁵⁷ Noi deh phung oh mon Y-Salômôn: Kon sau Y-Sôtai, kon sau Y-Sôphêret, kon sau Y-Pêrida

⁵⁸ kon sau Y-Jala, kon sau Y-Darkôn, kon sau Y-Gidel,

⁵⁹ kon sau Y-Sêphatia, kon sau Y-Hatil, kon sau Pôkêret-Hasêbaim, kon sau Amôn.

⁶⁰ Lĕ rngôch phung pah kan tâm ngih brah jêh ri phung kon sau phung oh mon Y-Salômôn jêng pe rhiăng sĭn jât ma bar nuyh.

⁶¹ Pakơi aơ jêng phung plơ̆ sĭt tă bơh Têl-Mêla, Têl-Harsa, Kêrup, Adôn, jêh ri Imer, ƀiălah khân păng mâu dơi joi chô yau khân păng mâu lah ntơm saơm jêng phung Israel mâu lah mâu:

⁶² Kon sau Y-Dêlaya, kon sau Y-Tôbia jêh ri kon sau Y-Nêkôda, geh prao rhiăng puăn jât ma bar nuyh.

⁶³ Bi phung kôranh ƀư brah: Kon sau Y-Habaya, kon sau Y-Hakôs, kon sau Y-Barsilai (jêng nơm hŏ sŏk ur tâm phung kon bu ur Y-Barsilai, phung Gilêat, pôri bu dơi ntơ tĭng amoh khân păng).

⁶⁴ Phung nây joi amoh khân păng tâm ndrom samƀŭt noi deh ƀiălah mâu saơ ôh, yor nây bu ngluh lơi tă bơh nau kan kôranh ƀư brah yorlah kơp khân păng jêng ƀơ̆ ƀơch.

⁶⁵ Kôranh mât uănh buay ma khân păng mâu dơi sa ôh ndơ dŭt kloh ueh kŏ tât nôk geh du huê kôranh ƀư brah sŏk Urim jêh ri Thumim gay ôp ma Brah Ndu.

⁶⁶ Lĕ rngôch phung tâm rƀŭn geh puăn rmưn bar rbăn pe rhiăng prao jât nuyh,

⁶⁷ mâu kơp pơh rbăn pe rhiăng pe jât ma pơh oh mon bu klâu, oh mon bu ur khân păng jêh ri bar rhiăng puăn jât ma prăm nuyh kâp mprơ, bu klâu jêh ri bu ur.

⁶⁸ Khân păng geh pơh rhiăng pe jât ma prao seh, bar rhiăng puăn jât ma prăm seh rngông,

⁶⁹ puăn rhiăng pe jât ma prăm seh samô, jêh ri prao rbăn pơh rhiăng bar jât seh bri.

⁷⁰ Geh ƀaƀă kôranh ndŭl mpôl hŏ nhhơr ndơ ndâk njêng. Kôranh mât uănh nhhơr ndơ ndâk njêng geh pham kilô n'gul mah, prăm jât mlâm ngan grưng jêh ri prăm rhiăng pe jât blah ao ma kôranh ƀư brah.

⁷¹ Geh đŏng phung ƀaƀă kôranh ndŭl mpôl nhhơr ndơ ndâk njêng geh du rhiăng pơh jât kilô mah jêh ri du rbăn bar rhiăng kilô prăk.

⁷² Phung ƀon lan nhhơr kô̆ hôm e, geh du rhiăng pơh jât kilô mah, du rbăn du rhiăng kilô prăk jêh ri prao jât ma pơh blah ao ma kôranh ƀư brah.

⁷³ Pônây, phung kôranh ƀư brah, phung Lêvi, phung gak mpông pêr, phung mprơ, phung ƀaƀă êng jêh ri phung pah kan tâm ngih brah jêh ri lĕ rngôch phung Israel gŭ tâm ƀon khân păng nơm. Tât jêh khay pơh, phung kon sau Israel gŭ tâm ƀon khân păng nơm da dê.