Nêhêmi 6 - Nau Brah Ndu Ngơi 2023

Phung rlăng nchră ŭch tâm rdâng đah Y-Nêhêmi

¹ Tơlah Y-Sanbalat, Y-Tôbia, Y-Gesem jêng bunuyh Arabi, jêh ri phung rlăng êng đŏng, khân păng tăng nau gâp hŏ rdâk nkra jêh mpêr ƀon jêh ri mâu hôm geh ntŭk bluh ôh (nđâp lah nôk nây gâp ê-hŏ ntrŭp seng mpông ta n'gâng pêr)

² pôri Y-Sanbalat jêh ri Y-Gesem prơh bunuyh hăn tât lah ma gâp: “Văch hom, he mra tâm mâp ndrel tâm du rplay ƀon ta ntŭk neh lâng Ônô.” Ƀiălah khân păng tâm nchră ndrel ŭch ƀư mhĭk ma gâp.

³ Gâp prơh phung mbơh hăn tât lah ma khân păng: “Gâp khan ƀư du ntil kan toyh, mâu dơi hăn ôh. Mâm ƀư gâp chalơi nau kan gay hăn tâm mâp ma khân may?”

⁴ Khân păng prơh nơm hăn lah ma gâp puăn tơ̆ nâm bu nây lĕ jêh ri ăp tơ̆ gâp plơ̆ lah ma khân păng tâm ban dơm.

⁵ Tơ̆ rơh prăm, tâm ban nau saơm nây lĕ, Y-Sanbalat prơh oh mon păng djôt leo samƀŭt njuăl tâm ti păng.

⁶ Tâm samƀŭt geh nchih: “Phung ntil mpôl êng bu tăng lư jêh ri Y-Gesem lah đŏng pô aơ May jêh ri phung Yuđa tâm nchră ŭch tâm rdâng; yor nau nây, ri dĭng may rdâk nkra jêh mpêr ƀon toyh, jêh ri tĭng nâm nau bu nkoch nây, may ŭch hao ƀư hađăch ma khân păng.

⁷ May njêng jêh phung nơm mbơh lor gay mbơh tâm ƀon Yêrusalem pô aơ: ‘Geh du huê hađăch tâm n'gor Yuđa!’ N'hêl nanê̆ nau mbơh aơ mra tât ma hađăch. Pôri văch hom gay he tâm nchră ndrel.”

⁸ Gâp prơh bunuyh hăn gay plơ̆ lah ma păng pô aơ: “Lĕ nau may lah nây jêng nklă, yorlah may mĭn tâm nuih n'hâm may nơm.”

⁹ Khân păng ŭch nhhu hên gây lĕ rngôch klach krit da dê, yorlah khân păng ntôn pô aơ: “Ti khân păng mra rgănh, mâu hôm pah kan đŏng ôh.” Pôri aƀaơ, “hơi Brah Ndu, ƀư hom ti gâp ktang.”

¹⁰ Nôk nây, gâp hăn tâm ngih Y-Sêmaya, kon bu klâu Y-Dêlaya, sau Y-Mêhetabel, nơm nây lĕ gŭ krap ta nây. Păng lah: “Ăn he tâm mâp ndrel hom tâm ngih Brah Ndu, tâm trôm ngih brah jêh nây he ndâl lĕ mpông ngih brah, yorlah khân păng mra joi gay nkhĭt may; nanê̆ ngăn dôl bri măng khân păng mra hăn tât nkhĭt may.”

¹¹ Gâp lah: “Du huê bunuyh nâm bu gâp mra nchuăt du? Du huê bunuyh nâm bu gâp lăp tâm ngih brah gay dơi rêh lĕ? Gâp mâu lăp ôh!”

¹² Gâp gĭt ro mâu di ôh Brah Ndu prơh may hăn tât, ƀiălah nau may mbơh lor nây tâm rdâng đah gâp; yorlah Y-Tôbia jêh ri Y-Sanbalat nkhôm may jêh.

¹³ Yorlah păng lĕ geh prăk nkhôm gay ƀư ma gâp klach, nsŭk gâp ƀư tih, jêh nây yorlah nau nây khân păng lah nau djơh mhĭk jêh ri ƀư bêk prêng ma gâp.

¹⁴ “Hơi Brah Ndu gâp! Kah gĭt hom ma Y-Tôbia jêh ri Y-Sanbalat tĭng nâm lĕ nau kan khân păng ƀư jêh; tâm ban lĕ kah gĭt hom ma H'Nôadia, nơm mbơh lor bu ur jêh ri phung nơm mbơh lor êng hŏ ƀư jêh ma gâp klach!”

Mpêr ƀon dơi lôch jêh

¹⁵ Pôri nar bar jât ma prăm, khay Êlul, mpêr ƀon lĕ lôch jêh, tâm prăm jât ma bar nar.

¹⁶ Tơlah lĕ rngôch phung rlăng jêh ri lĕ ntil mpôl bunuyh êng gŭ jŭm hên, khân păng gĭt nau nây, pôri geh nau klach da dê jêh ri geh nau rdja nuih n'hâm yorlah khân păng gĭt saơ ma kan aơ dơi jêng yor tă Brah Ndu hên kâp kơl.

¹⁷ Rlau ma nây, tâm lĕ nar nây, geh phung ndrŏng n'gor Yuđa njuăl âk samƀŭt ma Y-Tôbia jêh ri Y-Tôbia njuăl đŏng samƀŭt ma khân păng.

¹⁸ Yor tâm phung Yuđa geh âk bunuyh hŏ sơm kơl păng yorlah păng jêng klay ma Y-Sêkania, kon bu klâu Y-Ara. Rlau ma nĕ, kon Y-Tôbia jêng Y-Jêhôhanan hŏ nsông ur jêh đah kon bu ur Y-Mêsulam, jêng kon bu klâu Y-Bêrêkia.

¹⁹ Tâm ban lĕ, khân păng rnê n'hao lĕ nau kan ueh bơh păng tanăp măt gâp jêh ri nkoch tay ma păng lĕ nau ngơi gâp. Bi ma Y-Tôbia njuăl samƀŭt gay ăn ma gâp klach.