Nêhêmi 5 - Nau Brah Ndu Ngơi 2023

Nau Y-Nêhêmi koh dŏng nơm o ach

¹ Dôl nây geh du rnoh bunuyh nđâp phung ur khân păng nter huy gay dun ma phung Yuđa, jêng phung oh nâu khân păng.

² Geh phung bunuyh lah pô aơ: “Hên geh âk râk phung kon bu klâu, kon bu ur hên; jêh ri ăn ma hên geh ba ƀlê gay ma hên dơi sông sa jêh ri gŭ rêh!”

³ Bunuyh êng lah tâm ban lĕ: “Tâm nau sa sât ji ngot, hên ăn bu nkhôm mir hên, đang krăk ƀâu jêh ri ngih hên gay geh ba ƀlê sông sa.”

⁴ Bunuyh êng lah đŏng: “Hên hŏ manh jêh prăk prăp chê̆ pi ma neh lŏ jêh ri ma đang krăk ƀâu hên ma hađăch.

⁵ Hên geh đŏng săk jăn nâm bu oh nâu hên jêh ri phung kon hên nâm bu phung kon khân păng, ƀiălah ăn hên nchâp phung kon bu klâu jêh ri phung bu ur hên ƀư dĭk. Phung bu ur hên geh nơm hŏ ƀư dĭk jêh, ƀiălah hên mâu geh nau dơi chuai tay khân păng ôh; yorlah tâm lŏ sre jêh ri đang krăk ƀâu hên hŏ jêng ndơ ma phung êng jêh.”

⁶ Tơlah gâp tăng nau khân păng nter, ngơi ƀrôk, gâp geh nau ji nuih ngăn.

⁷ Gâp mĭn tâm nuih n'hâm ma nau nây jêh ri gay ŭch nduyh phung ndrŏng nđâp ma phung kôranh pô aơ: “Khân may hŏ ăn ma phung oh mâu khân may nơm manh sa kao jâk.” Gâp nkra nau tâm rƀŭn toyh tâm rdâng đah khân păng.

⁸ Gâp lah: “Hên hŏ ƀư lĕ suan gay chuai tay oh nâu he, jêng phung Yuđa, bu tăch jêh ma phung mpôl băl êng, jêh ri mâm khân may ŭch tăch đŏng phung oh nâu khân may gay ma bu rvăt?” Khân păng gŭ klêm yorlah mâu gĭt ngơi du bâr ôh.

⁹ Gâp lah tay: “Nau khân may ƀư mâu geh ueh ôh. Di lah khân may gŭ tâm nau klach yơk ma Brah Ndu, gay lơi ăn phung rlăng ƀư bêk prêng he?

¹⁰ Gâp, phung oh nâu gâp jêh ri phung oh mon gâp, ăn khân păng manh prăk jêh ri ba ƀlê. Pôri ăn he jut lơi nau rnon aơ!

¹¹ Tâm nar aơ, dăn ma khân may mplơ̆ lơi hom ma khân păng tâm lŏ sre, đang krăk ƀâu, đang play ôlive jêh ri ngih khân păng nđâp ma nau sa kao ma prăk, ba ƀlê, ndrănh jêh ri dak ngi ôlive, jêng ndơ khân may hŏ nchâp ma khân păng chê̆ hom jêh.”

¹² Khân păng lah: “Hên mra mplơ̆ ndơ nây jêh ri mâu hôm dăn du ntil ndơ ôh tă bơh khân păng. Hên mra ƀư di tĭng nâm may lah jêh.” Gâp kuăl đŏng phung kôranh ƀư brah jêh ri ăn khân păng sơm ton ƀư tĭng nâm nau ton nây.

¹³ Gâp ăt rtuh ntôr ao jâr gâp jêh ri lah: “Mbu mâu ƀư tĭng nau ton aơ, dăn ma Brah Ndu rtuh hom lĕ ngih jêh ri drăp ndơ păng. Pônây bu mra rtuh lơi păng jêh ri nsoih tâm ti păng tâm ban pônây!” Lĕ rngôch phung tâm rƀŭn lah: “Amen” jêh ri khân păng tâm rnê ma Brah Yêhôva. Pôri phung ƀon lan ƀư tĭng nâm nau ton nây da dê.

Y-Nêhêmi geh nuih n'hâm lŏng ngăn

¹⁴ Rlau ma nây, ntơm bơh nar bu njêng gâp ƀư kôranh chiă uănh tâm n'gor bri Yuđa, jêng ntơm bơh năm rơh bar jât tât ma năm rơh pe jât ma bar nôk rô̆ hađăch Artasersês, lĕ rngôch jêng jât ma bar năm, gâp jêh ri phung oh nâu gâp mâu kêh prăk nkhôm prăp ma kôranh chiă uănh.

¹⁵ Ƀiălah phung kôranh chiă uănh hŏ tât lor ma gâp, phung nây hŏ bun kan jâk jêr klơ phung ƀon lan, kêh ăn ndơ sông sa jêh ri ndrănh êng pa meng n'gul kilô prăk. Phung oh mon khân păng tŭn jot ma phung ƀon lan đŏng. Ƀiălah gâp mâu ƀư pônây ôh, yorlah klach yơk ma Brah Ndu.

¹⁶ Gâp ăt djôt prăp nâp tâm nau pah kan ndâk nkra mpêr ƀon, jêh ri gâp mâu rvăt ôh tâm lŏ sre. Lĕ rngôch phung oh nâu gâp tâm rgum pah kan ta nây.

¹⁷ Ntŭk sưng sông gâp tâm ban lĕ, geh du rhiăng prăm jât nuyh phung Yuđa jêh ri phung kôranh, mâu kơp ma phung văch tât ma hên tă bơh phung mpôl băl bunuyh gŭ jŭm hên.

¹⁸ Ăp nar, bu ndrăp du mlâm ndrôk, prao mlâm biăp lay ueh; bu ndrăp tâm ban lĕ sĭm jêh ri ăp tơ̆ jât nar geh ăp ntil ndrănh. Ƀiălah, gâp mâu kêh prăk nkhôm prăp ma kôranh chiă uănh, yorlah nau kan ƀư nây jêng jâk jêh ma phung ƀon lan he.

¹⁹ “Hơi Brah Ndu gâp! Dăn ma Kôranh Brah kah gĭt lĕ rngôch nau gâp hŏ ƀư jêh ma phung ƀon lan aơ jêh ri yô̆ an ma gâp.”