Nêhêmi 4 - Nau Brah Ndu Ngơi 2023

Phung rlăng tâm rdâng đah nau ndâk nkra ngih brah

¹ Tơlah Y-Sanbalat tăng ma hên gŭ ndâk nkra mpêr ƀon; păng ji nuih hâu ngăn jêh ri mưch rmot ma phung Yuđa.

² Păng lah tanăp phung oh nâu păng jêh ri phung tahan n'gor Samari pô aơ: “Lĕ rngôch phung Yuđa lĕ ra-ai nây moh ndơ ƀư? Khân păng mra ndâk đŏng mpêr ƀon? Khân păng mra nhhơr ndơ ƀư brah mâu? Tâm du nar mâm khân păng mra ƀư dơi jêh lĕ? Lŭ lĕ ŭnh sa jêh, khân păng hŏ bun mbŭch jêng neh muy, jêh nây sŏk păng jêng lŭ tay dơi lĕ?”

³ Y-Tôbia, bunuyh Ammôn, dâk dăch păng jêh ri lah pô aơ: “Ơ, ndơ khân păng ndâk nây tơlah geh du mlâm mpik hao njŏ ta klơ nây, păng mra ƀư rlâm lơi lŭ pêr khân păng!”

⁴ Hơi Brah Ndu hên! Iăt hom yorlah bu mưch rmot ma hên. Mplơ̆ hom nau khân păng mưch rmot ta klơ bôk khân păng nơm jêh ri jao khân păng ƀư ndơ bu pit in tâm n'gor bu nhŭp khân păng ƀư bu nă ri.

⁵ Lơi ta nkŭm nking nau djơh mhĭk khân păng mâu lah jut lơi nau tih khân păng tă bơh tanăp măt Kôranh Brah, yorlah khân păng hŏ nsônh nau ji nuih Kôranh Brah tanăp măt ma phung ndâk nkra.

⁶ Pônây hên ndâk mpêr ƀon ma tât nôk lĕ pêr tâm njĭr ndrel da dê jêh ri n'hao tât du n'gul prêh klơ, yorlah phung ƀon lan ƀư kan lĕ nuih n'hâm khân păng.

⁷ Ƀiălah tơlah Y-Sanbalat, Y-Tôbia, phung Arabi, phung Ammôn jêh ri phung Asdôt tăng nau ndâk nkra mpêr ƀon Yêrusalem lơ hao jêh ri lĕ ntŭk bluh lĕ tâm jĭr ndrel jêh, khân păng ji nuih hâu ngăn.

⁸ Khân păng rgum ndrăng khân păng, tâm nchră ndrel ŭch văch tât lơh đah ƀon Yêrusalem jêh ri ƀư uh ah ma ƀon.

⁹ Bi hên gŭ mbơh sơm ma Brah Ndu hên jêh ri dơm bunuyh gak nar jêh ri măng njrăng gay tâm rdâng đah khân păng.

¹⁰ Ƀiălah phung Yuđa lah: “Hôm e âk ndơ djah, jêh ri phung tung ndơ jâk lĕ ra-ai jêh; hên mâu dơi pah kan ƀư mpêr ƀon ôh.”

¹¹ Phung rlăng hên lah pô aơ: “Khân păng mâu mra gĭt ôh mâu saơ nau nây, kŏ tât he hŏ tât jêh ta nklang khân păng, nkhĭt lơi khân păng, jêh ri ƀư ăn khân păng rlu lơi nau kan khân păng.”

¹² Ƀiălah phung Yuđa gŭ dăch phung rlăng, khân păng jât tơ̆ mbơh ma hên pô aơ: “Phung rlăng mra rduh lơh tă bơh puăn mpeh,”

¹³ gâp njêng lĕ pôih tâm lĕ ntŭk rđŭng pakơi mpêr ƀon jêh ri ta ntŭk nsoih, jêh nây dơm phung ƀon lan tĭng nâm ndŭl mpôl khân păng djôt đao, tak jêh ri na khân păng.

¹⁴ Jêh sek uănh, gâp dâk hăn jêh ri ngơi ma phung ndrŏng, phung kôranh, jêh ri phung ƀon lan hôm e klen pô aơ: “Lơi klach ôh ma khân păng. Kah gĭt hom pô aơ Kôranh Brah jêng Nơm dŭt toyh jêh ri geh nau klach yơk, mra tâm lơh ăn ma phung oh nâu, ăn ma phung kon bu klâu, kon bu ur, ăn ma phung ur, jêh ri ma phung ngih vâl khân may.”

¹⁵ Tơlah phung rlăng hên gĭt jêh pô aơ nau nchră khân păng bu hŏ gĭt jêh, jêh ri Brah Ndu ƀư rai lơi nau nchră khân păng ŭch ƀư, lĕ rngôch hên plơ̆ tay da dê ma ntŭk mpêr ƀon, ăp nơm pah kan tĭng nâm nau kan khân păng nơm.

¹⁶ Ntơm bơh nar nây, du n'gul phung tâm dâng gâp pah kan rdâk, bi du n'gul ri djôt tak, khêl, na jêh ri ao loih. Lĕ kôranh chiă uănh dâk pakơi lĕ rngôch ngih Yuđa,

¹⁷ jêng phung dôl ndâk nkra mpêr ƀon. Phung tung ndơ jâk, du ti khân păng ƀư kan, bi du đah ti djôt ndơ tâm lơh.

¹⁸ Ăp nơm ndâk nkra, geh cheng đao gưm da dê ta pŭng khân păng, dôl khân păng ƀư kan. Bi ma nơm uh nŭng gŭ êp ta meng gâp.

¹⁹ Gâp lah ma phung ndrŏng, phung kôranh, jêh ri phung ƀon lan hôm e klen pô aơ: “Nau kan jêng toyh jêh ri jŏ jong, bi ma he pah kan gŭ ƀah ngai djê̆ n'gŏ mpêr ƀon, nơm aơ gŭ ngai đah nơm ri.

²⁰ Pôri moh ntŭk khân păng tăng bâr nŭng, khân may tâm rƀŭn hom ndrel ma hên ta ntŭk nây. Brah Ndu he mra tâm lơh ăn ma he.”

²¹ Pônây hên pah kan, n'gul phung djôt tak ntơm bơh ƀhit rvi ang kŏ tât tơlah luh mănh.

²² Tâm nôk nây, gâp lah đŏng ma phung ƀon lan pô aơ: “Ăn ăp nơm bê̆ch măng ndrel phung oh mon păng tâm ƀon Yêrusalem, gay gak njrăng tâm bri măng jêh ri pah kan tâm nôk nar.”

²³ Nđâp gâp nơm, phung ƀaƀă oh mon gâp, jêh ri phung tahan gak njrăng tĭng kâp kơl gâp, mâu geh ôh du huê doh ao păng; ăp nơm djôt ndơ tâm lơh da dê tâm ti ma păng nơm.