Nêhêmi 3 - Nau Brah Ndu Ngơi 2023

Nau rdâk tay mpêr ƀon Yêrusalem

¹ Kôranh ƀư brah toyh lơn Y-Êliasip ndrel ma phung oh nâu păng nơm jêng phung kôranh ƀư brah, ntơm ndâk mpông pêr Biăp jêh ri prăp ăn păng jêng kloh jêh nây dơm bar seng mpông. Khân păng thoi đŏng rdâk tât ma vâl tŭm Mêa jêh ri prăp ăn păng jêng kloh tât ma vâl tŭm Y-Hananel.

² Bunuyh ƀon Yêrikô ndâk mon tay. Y-Sakur, kon bu klâu Y-Imri, ndâk njêng kô̆ pakơi.

³ Kon sau Y-Hasêna ndâk njêng mpông pêr Ka. Khân păng dơm n'gâng jêh ri ntrŭp mpông dah mâng nđăng jêh ri rnăng păng.

⁴ Y-Mêrêmôt, kon bu klâu Y-Urija, sau Y-Hakôs, ndâk nkra kô̆ hôm. Y-Mêsulam, kon bu klâu Y-Bêrêkia, sau Y-Mêsêsabel, mĭn rvê nau ndâk nkra. Ta meng khân păng, geh Y-Sadôk, kon bu klâu Y-Bana, ƀư kan ndâk nkra.

⁵ Êp ta meng khân păng jêng phung ƀon Têkôa ƀư kan ndâk nkra, ƀiălah phung ndrŏng mâu ŭch kơl ôh kan phung kôranh khân păng.

⁶ Y-Jôada, kon bu klâu Y-Pasêa jêh ri Y-Mêsulam, kon bu klâu Y-Bêsôdia, ndâk nkra tay mpông pêr Ơm; khân păng dơm n'gâng, ntrŭp mpông păng, mâng nđăng jêh ri rnăng păng.

⁷ Êp ta meng khân păng jêng Y-Mêlatia, bunuyh Gibêôn jêh ri Y-Jadôn, bunuyh Mêrônôt, nđâp ma phung bunuyh Gibêôn jêh ri Mispa; phung nây gŭ tâm ntŭk kôranh chiă uănh kơh đah ri dak krong, phung nây ƀư nau kan ndâk nkra mpêr ƀon da dê.

⁸ Êp ta meng khân păng jêng Y-Usiêl, kon bu klâu Y-Harhaya, jêng bunuyh blau chiăr mah, nkra mpêr ƀon. Thoi đŏng, Y-Hanania jêng du huê tâm phung ƀư ndơ ƀâu kah, ndâk nkra kô̆ i hôm. Khân păng ndâk nkra đŏng ƀon toyh Yêrusalem tât ta pêr Huy.

⁹ Êp ta meng khân păng jêng Y-Rêphaya, kon bu klâu Y-Hur, kôranh chiă uănh du n'gul nkual Yêrusalem, nkra mpêr ƀon.

¹⁰ Jêh ta nây, Y-Jêdaya, kon bu klâu Y-Harumap, nkra kô̆ mpeh tâm tra ma ngih păng nơm. Ta meng păng, Y-Hatus, kon bu klâu Y-Hasapnia nkra mpêr ƀon.

¹¹ Y-Malkija, kon bu klâu Y-Harim jêh ri Y-Hasup, kon bu klâu Y-Pahat Môap, nkra du kô̆ êng jêh ri vâl Tŭm Năk.

¹² Ta meng păng jêng Y-Salum, kon bu klâu Y-Halôhes, kôranh chiă uănh du n'gul đah ri nkual Yêrusalem jêh ri phung kon bu ur păng, ndâk nkra mpêr ƀon da dê.

¹³ Y-Hanun jêh ri phung ƀon lan gŭ ta Sanôa nkra mpông pêr Rlŭng; khân păng ndâk tay, jêh nây ntrŭp mpông, mâng nđăng jêh ri rnăng. Khân păng ndâk đŏng puăn rhiăng prăm jât metmpêr tât ma mpông pêr Ndjah.

¹⁴ Y-Malkija, kon bu klâu Y-Rêkap, kôranh mât uănh nkual Bet-Hakêrem, nkra mpông pêr Ndjah. Păng ndâk nkra tay đŏng mpông pêr, ntrŭp mpông, mâng nđăng jêh ri rnăng păng.

¹⁵ Y-Salum, kon bu klâu Y-Kôl-Hôsê, kôranh chiă uănh nkual Mispa, nkra mpông pêr Dak N'hor. Păng ndâk nkra đŏng, nkŭm chor, ntrŭp mpông, mâng nđăng jêh ri rnăng păng. Păng ndâk đŏng mpir jŭm nglau Silôê, dăch ta n'gar trao hađăch, tât ma ntung gung tă bơh ƀon Đavit hăn trŭnh.

¹⁶ Ta meng păng Y-Nêhêmi, kon Y-Asbuk, kôranh chiă uănh du n'gul nkual Bet-Sur, nkra tay mpêr ƀon tât ma ntŭk tâm tra đah lĕ môch Y-Đavit, ntu prăp dak jêh ri tât ma ngih phung dăng ktang.

¹⁷ Ta meng păng jêng Y-Rêhum, kon bu klâu Y-Bani, bunuyh Lêvi, nkra mpêr ƀon. Ta meng păng jêng Y-Hasabia, kôranh chiă uănh du n'gul nkual Keila, nkra nkual păng nơm.

¹⁸ Ta meng păng, geh phung oh nâu Y-Bavai, kon bu klâu Y-Hênadat, kôranh chiă uănh du n'gul nkual Keila, nkra mpêr ƀon.

¹⁹ Jêh păng jêng Y-Êser, kon bu klâu Y-Jêsua, kôranh chiă uănh n'gor Mispa, nkra du gâl êng tâm tra đah ntŭk trong hao rlet vâl prăp ndơ tâm lơh ta njônh ƀon.

²⁰ Pakơi păng geh Y-Baruk, kon bu klâu Y-Sakai, nkra du gâl êng tă bơh njônh ƀon tât ma mpông lăp ngih Y-Êliasip, kôranh ƀư brah toyh lơn.

²¹ Jêh păng, geh Y-Mêrêmôt, kon bu klâu Y-Urija, sau Y-Hakôs, nkra du gâl êng ntơm bơh mpông ngih Y-Êliasip tât ta bôl dŭt ngih păng.

²² Pakơi păng, geh phung kôranh ƀư brah gŭ ta n'gor jŭm Yêrusalem nkra mpêr ƀon.

²³ Jêh khân păng, Y-Benjamin jêh ri Y-Hasup nkra kô̆ tâm tra đah ngih khân păng nơm. Thoi khân păng, Y-Asaria, kon bu klâu Y-Maseya, sau Y-Anania, nkra ta meng ngih păng nơm.

²⁴ Jêh păng, Y-Binnui kon bu klâu Y-Hênadat, nkra du gâl êng, ntơm bơh ngih Y-Asaria tât ma ntŭk kue jêh ri njônh ƀon.

²⁵ Y-Pala, kon bu klâu Y-Uxai, nkra ntŭk tâm tra đah njônh ƀon jêh ri vâl tŭm prêh klơ ngih hađăch ta ndring ngih phung tahan gak. Jêh păng geh Y-Pêdaya, kon bu klâu Y-Parôs, nkra tay mpêr ƀon.

²⁶ Phung pah kan ngih ƀư brah gŭ ta Ôphel nkra mpêr ƀon tât ma ntŭk tâm tra đah mpông pêr Dak mpeh luh nar jêh ri tât ma vâl tŭm prêh klơ.

²⁷ Jêh phung nây, geh phung ƀon Têkôa nkra du gâl êng tâm tra đah vâl tŭm toyh prêh klơ tât ta mpêr Ôphel.

²⁸ Phung kôranh ƀư brah nkra kô̆ mpeh klơ mpông pêr Seh, ăp nơm nkra kô̆ mpeh tâm tra đah ngih păng nơm.

²⁹ Pakơi, geh Y-Sadôk, kon bu klâu Y-Imer, nkra kô̆ mpeh tâm tra đah ngih păng nơm. Jêh ta nây, geh Y-Sêmaya, kon bu klâu Y-Sêkania, nơm mât chiă mpông pêr Pa lơ, ndâk nkra mpêr ƀon.

³⁰ Jêh păng, geh Y-Hanania, kon bu klâu Y-Sêlêmia jêh ri Y-Hanun, kon bu klâu rơh prao Y-Salap, nkra du gâl êng. Ta meng khân păng, Y-Mêsulam, kon bu klâu Y-Bêrêkia, nkra ntŭk tâm tra đah ngih păng nơm.

³¹ Jêh păng, Y-Malkija, du huê tâm phung blau chiăr mah, nkra tât ta ngih phung pah kan ma ngih ƀư brah jêh ri phung tăch rgâl, tâm tra đah mpông pêr Miphơkat, jêh ri tât jrô prêh ta klơ njônh ƀon.

³² Bi ma phung blau chiăr mah jêh ri phung tăch rgâl nkra ta vah vang njônh ƀon jêh ri mpông pêr Biăp.