Nêhêmi 2 - Nau Brah Ndu Ngơi 2023

Y-Nêhêmi dơi vay plơ̆ sĭt gay rdâk tay mpêr ƀon Yêrusalem

¹ Tâm khay Nisan, năm rơh bar jât rô̆ hađăch Artasersês, lah ndrăp jêh ndrănh tanăp hađăch, gâp chông ndrănh ăn ma hađăch. Ê hŏ prot gâp geh nau rngot muh măt tanăp hađăch.

² Yor ri, hađăch ôp ma gâp: “Mâm muh măt may rngot, nđâp lah may mâu geh nau ji kuet? Nanê̆ may geh nau rngot tâm nuih n'hâm.” Nôk nây gâp klach ngăn.

³ Gâp lah ro ma hađăch: “Ăn hađăch gŭ rêh n'ho ro! Mâm dĭng măt gâp mâu rngot, tơlah ƀon, jêng ntŭk geh môch ma phung chô yau gâp gŭ, lĕ rai jêh, jêh ri lĕ rngôch mpông ƀon lĕ ŭnh sa jêh?”

⁴ Hađăch ôp ma gâp: “Moh nau may ŭch dăn?” Gâp mbơh sơm ma Brah Ndu tâm lĕ ndâr trôk,

⁵ jêh nây gâp lah ma hađăch: “Tơlah hađăch maak nuih n'hâm jêh ri tơlah nơm oh mon hađăch dơi geh nau yô̆ tanăp măt hađăch, prơh hom gâp hăn ma n'gor Yuđa, tât ta ƀon geh môch phung chô yau gâp, gay ma gâp dơi ndâk ƀon nây đŏng.”

⁶ Nôk nây geh hađăch bu ur gŭ đŏng êp hađăch. Hađăch ôp ma gâp: “Ndah jŏ may mra hăn jêh ri mra plơ̆ sĭt tay?” Pôri hađăch lŏng nuih n'hâm prơh gâp hăn jêh ri gâp mbơh ma hađăch năng nar gâp mra hăn jêh ri năng nar gâp mra plơ̆ sĭt tay.

⁷ Gâp lah đŏng ma hađăch: “Tơlah hađăch maak nuih n'hâm, dăn hađăch jao ma gâp lĕ samƀŭt njuăl ma phung kôranh chiă uănh n'gor ma mpeh nhâp nar dak krong Ơphrat, gay ma khân păng ăn gâp dơi hăn rgăn kŏ tât nôk gâp tât n'gor bri Yuđa.

⁸ Dăn ăn đŏng du pŏk samƀŭt ntrŭnh njuăl ma Y-Asap, nơm mât bri krŏng ma hađăch, gay ma păng ăn ma gâp tơm si ƀư meh mpông ƀon ta meng ngih brah jêh ri ƀư mpêr ƀon nđâp ngih ma gâp mra gŭ ta nây.” Yorlah ti ueh bơh Brah Ndu gâp kơl an gâp, hađăch ăn ro ma gâp lĕ nau nây.

⁹ Pôri, gâp tât ma phung kôranh chiă uănh kơh đah ri dak krong jêh ri gâp ăn ma khân păng lĕ samƀŭt hađăch njuăl. Hađăch prơh hăn đŏng phung kôranh chiă uănh jêh ri phung rmăk seh hăn ndrel ma gâp.

¹⁰ Tơlah Y-Sanbalat, bunuyh Hôrôn, jêh ri Y-Tôbia jêng oh mon mpôl Ammôn, tăng nau nây, khân păng mâu maak, yorlah bu văch gay joi nau kơl ma phung Israel geh nau ndrŏng.

Y-Nêhêmi sek uănh mpêr ƀon

¹¹ Pôri, gâp tât Yêrusalem jêh ri gŭ ta nây pe nar.

¹² Gâp jêh ri phung ƀaƀă hăn ndrel gâp, dâk hăn klong măng, gâp mâu ăn du huê nuyh gĭt ôh moh nau Brah Ndu hŏ dơm jêh tâm nuih n'hâm gâp gay ŭch ƀư ma Yêrusalem. Rlau ma nây seh bri gâp ncho mâu hôm geh ôh mpô mpa êng ndrel ma gâp.

¹³ Klong măng gâp luh bơh ƀon rgăn mpông pêr Rlŭng, rle mpeh Dak N'hor Bêh Nhŭk Nhăk jêh ri tât mpông pêr Ndjah gay sek uănh lĕ mpêr ƀon Yêrusalem hŏ rlâm jêh jêh ri mpông ƀon lĕ ŭnh sa jêh.

¹⁴ Jêh nây gâp n'hot hăn tât mpông pêr Dak N'hor jêh ri tât ta Dak Nglau Hađăch, ƀiălah mâu geh ntŭk ôh ma seh bri gâp ncho dơi hăn rgăn.

¹⁵ Yor nây, tâm dôl măng gâp hăn njŏ tĭng trong rlŭng gay sek uănh mpêr ƀon; jêh nây gâp plơ̆ sĭt tay, lăp ntŭk mpông pêr Rlŭng, jêh ri gâp plơ̆ sĭt.

¹⁶ Phung kôranh chiă uănh mâu gĭt ôh ntŭk gâp hăn jêh ri moh ndơ gâp ƀư, yor ri gâp ê hŏ mbơh ôh ma phung Yuđa, ma phung kôranh ƀư brah, ma phung ndrŏng, ma phung kôranh chiă uănh mâu lah ăn ma phung mra ƀư pah kan, gĭt moh nau gâp ƀư.

Ntrâng ƀư rdâk tay mpêr ƀon

¹⁷ Gâp lah ma khân păng: “Khân may hŏ saơ jêh he dôl gŭ tâm nau rêh ni, Yêrusalem hŏ roh rai jêh ri lĕ mpông ƀon păng lĕ ŭnh sa jêh. Văch hom, ăn he ndâk đŏng mpêr ƀon Yêrusalem, gay mâu hôm dơn nau bêk prêng đŏng ôh.”

¹⁸ Gâp mbơh ma khân păng ma mpang ti ueh Brah Ndu hŏ kâp kơl gâp jêh ri tâm ban lĕ ma nau ngơi hađăch mbơh jêh ma gâp. Khân păng lah: “Kay lŏng, ăn he ntơm ndâk njêng tay ro!” Pôri, khân păng janh ktang tâm rnglăp ƀư nau kan ueh aơ.

¹⁹ Y-Sanbalat, bunuyh Hôrôn, Y-Tôbia jêng oh mon bunuyh Ammôn jêh ri Y-Gesem bunuyh Arabi tăng nau nây, khân păng bêk prêng jêh ri gơm mưch ma hên. Khân păng lah pô aơ: “Moh nau khân may ƀư aơ? Khân may tâm rdâng đah hađăch lĕ?”

²⁰ Gâp plơ̆ lah ma khân păng pô aơ: “Brah Ndu tâm lĕ ndâr trôk mra kơl ma hên dơi jêng. Hên jêng phung oh mon Păng, hên mra ntơm ndâk njêng tay, ƀiălah khân may mâu geh du kô̆ mâu lah nau dơi ăn kah gĭt tâm ƀon Yêrusalem ôh.”