Nêhêmi 13 - Nau Brah Ndu Ngơi 2023

Y-Nêhêmi ƀư nau tâm rgâl mhe nglĕ dŭt

¹ Tâm nar nây, bu răk ndrom samƀŭt Y-Môis ăn phung ƀon lan iăt jêh ri saơ tâm nây geh nchih phung Ammôn jêh ri phung Môap ƀaƀơ n'ho ro mâu dơi lăp ôh tâm nau tâm rƀŭn Brah Ndu,

² yorlah khân păng mâu djôt leo piăng let jêh ri dak gay ran phung ƀon lan Israel, ƀiălah sŏk prăk nkhôm Y-Balaam văch rak rtăp ma phung ƀon lan Israel (ƀiălah Brah Ndu he rgâl nau rak rtăp nây jêng du nau ueh lăng.)

³ Tơlah phung ƀon lan hŏ tăng jêh nau vay nây, phung ƀon lan tâm nkhah lĕ phung bu năch bơh phung Israel.

⁴ Êlor ma nau nây, kôranh ƀư brah Y-Êliasip, bu hŏ dơm ăn păng mât uănh lĕ jrô ngih Brah Ndu hên,

⁵ jêh ri jêng mpôl băl ma Y-Tôbia, hŏ ăn ma Y-Tôbia du jrô toyh jêng ta ntŭk nây ntơm saơm bu dŏng gay prăp ndơ ƀư brah rnih môi, ndơ ƀâu kah, ndơ dŏng, du kô̆ tâm jât ma ba ƀlê, ndrănh mhe jêh ri dak ngi ôlive, jêng lĕ ndơ tĭng nau vay ntăm prăp ma phung Lêvi, ma phung mprơ jêh ri ma phung gak njrăng mpông pêr, nđâp ma ndơ nhhơr prăp ma phung kôranh ƀư brah.

⁶ Tơlah lĕ nau nây tât ngăn, gâp mâu geh gŭ ôh ta Yêrusalem, yorlah di năm rơh pe jât ma bar rô̆ Artasersês, hađăch Babilôn, ăn gâp plơ̆ sĭt ma hađăch. Jŏ pakơi nây, gâp dăn ma hađăch gay gâp dơi plơ̆ sĭt ta Yêrusalem.

⁷ Tơlah văch tât ta nây, gâp gĭt nau mhĭk Y-Êliasip hŏ ƀư jêh, jêng ăn ma Y-Tôbia du mlâm jrô tâm ndring ngih brah bơh ngih Brah Ndu.

⁸ Gâp ji nuih ngăn rĭ dĭng klŭp lĕ ndơ dŏng bơh ngih Y-Tôbia luh bơh jrô nây.

⁹ Jêh nây gâp ntĭnh rao kloh ma jrô nây, gâp djôt leo lăp đŏng lĕ ndơ dŏng ngih Brah Ndu, ndơ ƀư brah rnih môi jêh ri ndơ ƀâu kah.

¹⁰ Gâp lĕ gĭt tâm ban lĕ, bu mâu ăn ôh ndơ sông sa ma phung Lêvi, yor nây, phung mprơ jêh ri phung Lêvi gŭ pah kan hŏ du sĭt da dê jêh rlet ma mir khân păng nơm.

¹¹ Gâp nduyh phung kôranh chiă uănh jêh ri lah: “Mâm ƀư ngih Brah Ndu bu chalơi pônây?” Jêh nây gâp kuăl rgum khân păng jêh ri dơm khân păng plơ̆ pah kan ƀoi ơm.

¹² Rnôk nây lĕ rngôch phung Yuđa djôt leo da dê du kô̆ tâm jât ba ƀlê, ndrănh mhe jêh ri dak ngi ôlive ăn tâm jay prăp.

¹³ Gâp dơm ăn kôranh ƀư brah Y-Sêlêmia, kôranh nchih samƀŭt Y-Sadôk, jêh ri du huê bunuyh tâm noi deh Lêvi, amoh Y-Pêdaya mât uănh lĕ ntŭk prăp drăp khlay ndrel ma nau kâp kơl bơh Y-Hanan, kon bu klâu Y-Sakur, sau Y-Matania, yorlah bu kơp khân păng jêng răp jăp. Nau kan khân păng jêng tâm pă lĕ ndơ nhhơr ăn ma phung oh nâu khân păng.

¹⁴ “Hơi Brah Ndu gâp! Yor ma nau aơ, kah gĭt an ma gâp jêh ri lơi ta jut lĕ kan ueh gâp hŏ ƀư jêh ma ngih Brah Ndu, jêh ri ma nau pah kan Păng.”

Djôt prăp nar saƀat

¹⁵ Tâm lĕ nar nây, gâp saơ tâm phung Yuđa geh bunuyh kĭn play krăk ƀâu tâm nar saƀat, bun lĕ nchăp ba ƀlê klơ ndŭr kơi seh bri, tâm ban đŏng rdeng ndrănh, play krăk ƀâu, play rvi jêh ri ăp ntil kao play, leo rlet ma Yêrusalem tâm nar saƀat. Gâp mbơh jêh ma khân păng, mâu dơi tăch lĕ ndơ sông sa nây tâm nar saƀat.

¹⁶ Geh lĕ phung Tyre gŭ ta nây, djôt leo đŏng ka jêh ri ăp ntil ndơ tăch ma phung Yuđa ta ƀon Yêrusalem tâm nar saƀat.

¹⁷ Rnôk nây gâp nduyh ma phung ndrŏng tâm phung Yuđa pô aơ: “Mâm ƀư khân may ƀư nau mhĭk aơ gay ƀư ƀơ̆ nar saƀat?

¹⁸ Mâu di hĕ phung chô yau khân may kăl e hŏ ƀư jêh kơt nây, kŏ tât Brah Ndu he ăn tât jêh lĕ nau mhĭk nây ma he jêh ri ma ƀon Yêrusalem? Bi khân may ƀư ƀơ̆ đŏng nar saƀat, gay ƀư ăn nau ji nuih Păng ntop âk ma phung Israel!”

¹⁹ Pôri tơlah mpông ƀon Yêrusalem ntơm jêng ngo klĕng jêh lor panăp ma nar Saƀat, gâp đă bu ntĭl lơi mpông pêr jêh ri ntĭnh khân păng knŏng pơk mpông pêr pakơi nar saƀat. Gâp dơm đŏng ƀaƀă tâm phung oh mon gâp mât njrăng mpông pêr; gay lơi ăn mbu tuy mâu lah rdeng ndơ lăp tâm ƀon ta nar saƀat.

²⁰ Du tơ̆ bar tơ̆, phung tăch rgâl jêh ri phung tăch lĕ ntil ndơ, hŏ bê̆ch măng padih ƀon Yêrusalem.

²¹ Gâp nduyh ma khân păng: “Mâm ƀư khân may bê̆ch măng panăp mpêr ƀon tâm ban pônây? Tơlah khân may ƀư kơt nây, gâp mra nhŭp khân may”. Ntơm bơh nar nây, khân păng mâu hôm hăn ôh tâm nar saƀat đŏng.

²² Gâp ntĭnh ma phung Lêvi ăn khân păng ƀư kloh lơi khân păng nơm jêh ri hăn văch gak njrăng mpông pêr, gay prăp ma nar saƀat jêng nar kloh ueh. “Hơi Brah Ndu gâp! Dăn kah gĭt hom ma nau nây jêh ri dăn yô̆ nđach gâp tĭng nâm nau ueh toyh bơh May.”

Mbơh ma nau sai ur ndrel ma phung bu năch

²³ Tâm lĕ nar nây, gâp saơ phung Yuđa sŏk ur phung Asdôt, Ammôn, jêh ri Môap.

²⁴ Du n'gul phung kon khân păng ngơi nau phung Asdôt mâu lah ngơi nau phung mpôl băl êng, ƀiălah mâu gĭt nau ngơi phung Yuđa.

²⁵ Gâp nduyh jêh ri rak rtăp khân păng, gâp dong mbang bar pe nuyh mâu lah tôch sŏk khân păng jêh ri lah khân păng sơm ton knŏng ma amoh Brah Ndu pô aơ: “Khân may mâu mra mbloh ôh kon druh khân may đah kon ndăm khân păng mâu lah nđăp kon bu ur druh khân păng đah kon bu klâu ndăm khân may mâu lah ma săk jăn khân may nơm!

²⁶ Mâu di hĕ hađăch phung Israel jêng Y-Salômôn hŏ ƀư tih jêh yorlah phung bu ur pônây? Tâm âk phung mpôl băl mâu geh ôh du huê hađăch nâm bu păng, jêng nơm Brah Ndu rŏng, ăn păng jêng hađăch ma lĕ rngôch phung Israel. Ƀiălah phung ur phung bu năch hŏ nsŭk ăn păng ƀư tih!

²⁷ Mâm ƀư he tăng nau khân may ƀư nau djơh toyh ngăn, tâm rdâng đah Brah Ndu ma nau khân may sŏk bu ur phung bu năch?”

²⁸ Du huê tâm phung kon bu klâu Y-Jôada, sau kôranh ƀư brah toyh lơn Y-Êliasip, hŏ nđăp kon druh Y-Sanbalat, phung Hôrôn, yor nau nây gâp mprơh păng du tă bơh gâp.

²⁹ “Hơi Brah Ndu gâp! Dăn lơi chuêl ôh jêng khân păng hŏ ƀư ƀơ̆ ƀơch nau kan kôranh ƀư brah jêh ri nau tâm rnglăp ma nau kan kôranh ƀư brah jêh ri ma phung Lêvi.”

³⁰ Pônây, gâp ƀư ăn kloh lơi khân păng tă bơh ăp ntil nau bơh phung bu năch, jêh ri gâp dơm kan ăn ma phung kôranh ƀư brah jêh ri ma phung Lêvi, ăp nơm tâm kan khân păng nơm.

³¹ Gâp đă đŏng phung ƀon lan nhhơr long tĭng tâm nal, tâm ban đŏng nhhơr lĕ play bôk yan bơh neh. “Hơi Brah Ndu gâp, dăn kah gĭt hom ma gâp jêh ri yô̆ an ma gâp!”