Nêhêmi 11 - Nau Brah Ndu Ngơi 2023

Rnoh bunuyh gŭ ta Yêrusalem

¹ Phung kôranh chiă uănh tâm phung ƀon lan gŭ ta ƀon Yêrusalem jêh ri phung ƀon lan hôm e tâm nchroh gay tâm phung jât nuyh geh du huê nuyh gŭ ta ƀon Yêrusalem jêng ƀon kloh ueh, bi sĭn nuyh ri gŭ tâm lĕ ƀon êng êng.

² Phung ƀon lan ăn nau ueh uĭn ma lĕ rngôch phung bu klâu nhhơr săk jăn khân păng gŭ ta ƀon Yêrusalem.

³ Pakơi aơ jêng phung kôranh chiă uănh tâm n'gor gŭ ta ƀon Yêrusalem (tâm nôk phung ƀaƀă Israel, phung kôranh ƀư brah, phung Lêvi, phung pah kan ta ngih brah jêh ri phung kon sau phung oh mon Y-Salômôn gŭ da dê tâm n'gor ƀon khân păng nơm ta lĕ ƀon êng bơh Yuđa.

⁴ Ƀiălah geh phung ƀaƀă kon sau Yuđa jêh ri phung Benjamin gŭ ta ƀon Yêrusalem.) Mpeh ma phung kon sau Yuđa geh Y-Athaya, kon bu klâu Y-Usia, sau Y-Sakari, se Y-Amaria, săn Y-Sêphatia; Y-Sêphatia jêng kon bu klâu Y-Mahalalel, tâm noi deh Y-Pêres;

⁵ Y-Maseya, kon bu klâu Y-Baruk, sau Y-Kôl-Hôsê, se Y-Hasaya, săn Y-Adaya; Y-Adaya jêng kon bu klâu Y-Jôarip, sau Y-Sakari, tâm phung noi deh Silô.

⁶ Lĕ rngôch kon sau Y-Pêres gŭ ta Yêrusalem jêng puăn rhiăng prao jât ma pham nuyh dăng ktang.

⁷ Phung kon sau Benjamin geh Y-Salu, kon bu klâu Y-Mêsulam, sau Y-Jôet, se Y-Pêdaya, săn Y-Kôlatia; Y-Kôlaya jêng kon bu klâu Y-Maseya, sau Y-Ithiêl, se Y-Jêsaiya;

⁸ Pakơi păng geh Y-Gabai jêh ri Y-Salai nđâp ma sĭn rhiăng bar jât ma pham nuyh.

⁹ Y-Yôel, kon bu klâu Y-Sikri, ƀư kôranh ƀon khân păng, bi Y-Yuđa, kon bu klâu Y-Hasênua ƀư kôranh groi kôranh ƀon.

¹⁰ Tâm phung kôranh ƀư brah geh Y-Jêdaya jêng kon bu klâu Y-Jôarip, Y-Jakin,

¹¹ jêh ri Y-Sêraya jêng kon bu klâu Y-Hilkia, sau Y-Mêsulam, se Y-Sadôk, săn Y-Mêraiôt; Y-Mêraiôt, kon bu klâu Y-Ahitup, kôranh chiă uănh ta ngih Brah Ndu,

¹² nđâp ma phung oh nâu khân păng pah kan tâm ngih brah, lĕ rngôch jêng pham rhiăng bar jât ma bar nuyh. Geh đŏng Y-Adaya, kon bu klâu Y-Jêrôham, sau Y-Pêlatia, se Y-Amsi, săn Y-Sakari; Y-Sakari jêng kon bu klâu Y-Pashur, sau Y-Malkija

¹³ nđâp ma phung oh nâu khân păng jêng kôranh ndŭl mpôl da dê, lĕ rngôch jêng bar rhiăng puăn jât ma bar nuyh. Rlau ma nây hôm geh Y-Amasai, kon bu klâu Y-Asarel, sau Y-Ahsai, se Y-Mêsilêmôt, săn Y-Imer

¹⁴ jêh ri phung oh nâu khân păng jêng phung dăng ktang da dê jêh ri janh nuih, lĕ rngôch jêng du rhiăng bar jât ma pham nuyh. Y-Sapdiêl, kon bu klâu Y-Hagêdôlim, jêng nơm chiă uănh ma khân păng.

¹⁵ Tâm phung Lêvi geh Y-Sêmaya, kon bu klâu Y-Hasup, sau Y-Asrikam, se Y-Hasabia, săn Y-Buni.

¹⁶ Tâm lĕ phung kôranh noi deh phung Lêvi geh Y-Sabêthai jêh ri Y-Jôsaƀat dơi jao mât uănh nau kan padih ngih brah Brah Ndu.

¹⁷ Bi Y-Matania, kon bu klâu Y-Mika, sau Y-Sapdi, se Y-Asap, jêng kôranh gai ma nau kan tâm rnê Kôranh Brah dôl mông mbơh sơm; geh đŏng Y-Bakbukia, jêng nơm tal bar tâm phung oh nâu khân păng jêh ri Y-Apda, kon bu klâu Y-Samua, sau Y-Galal, se Y-Jêduthun.

¹⁸ Lĕ rngôch phung Lêvi gŭ tâm ƀon kloh ueh jêng bar rhiăng pham jât ma puăn nuyh.

¹⁹ Phung gak mpông pêr jêng Y-Akup, Y-Talmôn jêh ri phung oh nâu khân păng, dơi geh du rhiăng pơh jât ma bar nuyh.

²⁰ Lĕ phung Israel êng, phung kôranh ƀư brah, phung Lêvi, gŭ tâm ăp ƀon n'gor bri Yuđa, ăp nơm gŭ tâm drăp ndơn khân păng nơm.

²¹ Phung pah kan ta ngih brah gŭ ta Ôphel da dê; Y-Siha jêh ri Y-Gispa chiă uănh phung nây.

²² Nơm chiă uănh phung Lêvi ta ƀon Yêrusalem jêng Y-Usi, kon bu klâu Y-Bani, sau Y-Hasabia, se Y-Matania, săn Y-Mika, tâm noi deh Y-Asap jêng phung mprơ, pah kan tâm ngih Brah Ndu.

²³ Geh đŏng nau ntrŭnh tă bơh hađăch tât ma phung mprơ, jêh ri lĕ tâm nal nau kan ăp nar ma khân păng.

²⁴ Y-Pêthahia, kon bu klâu Y-Mêsêsabel, tâm noi deh Y-Sêra jêng kon Y-Yuđa, gŭ kơl hađăch chiă uănh lĕ rngôch phung ƀon lan.

Phung ƀon lan tâm lĕ ƀon êng

²⁵ Bi ma lĕ ƀon jê̆ jêh ri mir khân păng, geh phung ƀaƀă Yuđa gŭ ta Kiriat-Arba jêh ri tâm lĕ jŭm ƀon jê̆, ta Dibôn jêh ri lĕ ƀon jê̆ jŭm, ta Jêkapsêel jêh ri lĕ ƀon jê̆ jŭm,

²⁶ ta Jêsua, Môlada, Bet-Pêlet,

²⁷ ta Hasar-Sual, Bêr-Sêba jêh ri tâm lĕ ƀon jê̆ jŭm,

²⁸ ta Siklak, Mêkôna jêh ri tâm lĕ ƀon jê̆ jŭm,

²⁹ ta Ên-Rimôn, Sôra, Jarmut,

³⁰ ta Sanôa, Adulam jêh ri lĕ ƀon jê̆ jŭm; ta Lakis jêh ri jŭm lĕ mir jŭm, jêh ri ta Asêka jêh ri lĕ ƀon jê̆ jŭm. Pôri khân păng gŭ ntơm bơh Bêr-Sêba tât ta rlŭng Hinôm.

³¹ Phung Benjamin tâm ban lĕ gŭ ntơm bơh Gêba tât ta Mikmas, Aija, Bêthel jêh ri lĕ ƀon jê̆ păng,

³² jêh ri ta Anathôt, Nôp, Anania,

³³ Hasôr, Rama, Gitaim.

³⁴ Hadit, Sêbôim, Nêbalat,

³⁵ Lot jêh ri Ônô nâm bu ntĭt rlŭng phung rhăk njêng.

³⁶ Jêh ri geh ƀaƀă mpôl phung Lêvi tâm n'gor Yuđa tâm rnglăp jêh đah phung Benjamin.