Nêhêmi 1 - Nau Brah Ndu Ngơi 2023

Nau Y-Nêhêmi mbơh sơm ma phung Israel

¹ Aơ jêng nau Y-Nêhêmi, kon bu klâu Y-Hakalia. Tâm khay Kislêvơ, năm rơh bar jât, nôk gâp dôl gŭ ta ƀon toyh Susa,

² geh du huê tâm phung oh nâu gâp amoh păng jêng Y-Hanani ndrel ma bar pe nuyh văch tât bơh phung Yuđa. Gâp ôp ma khân păng ma nau phung Yuđa hôm klen, jêng phung plơ̆ sĭt bơh nau ƀư dĭk, jêh ri ôp đŏng ma nau ƀon Yêrusalem.

³ Khân păng lah ma gâp pô aơ: “Phung hôm rêh klen jêh pakơi nau ƀư dĭk gŭ tay tâm n'gor geh nau rêh ni jêh ri geh nau bêk prêng ngăn ngên, bi ma mpêr ƀon Yêrusalem lĕ rlâm, jêh ri lĕ mpông ƀon lĕ ŭnh sa.

⁴ Nôk gâp tăng lĕ nau nây, gâp gŭ nhĭm nhhiăng, rngot rvê jŏ nar; gâp ât sông sa jêh ri mbơh sơm ma Brah Ndu klơ lĕ ndâr trôk dŭt prêh pô aơ:

⁵ Hơi Yêhôva Brah Ndu klơ lĕ ndâr trôk, jêng Brah Ndu dŭt toyh jêh ri di ma nau rnam klach yơk, jêng Nơm djôt prăp nau tâm rnglăp jêh ri nuih n'hâm ueh ma mbu nơm ŭch rŏng jêh ri djôt prăp lĕ nau vay ntăm bơh Păng!

⁶ Dăn măt Kôranh Brah treng uănh jêh ri tôr Kôranh Brah iăt nau gâp mbơh sơm gâp jêng oh mon Kôranh Brah, nau gâp mbơh sơm ăp nar nâm măng yor phung ƀon lan Israel, jêng phung oh mon Kôranh Brah gŭ tanăp măt Kôranh Brah jêh ri mbơh lĕ nau tih hên jêng phung ƀon lan Israel, hŏ ƀư tih jêh đah May. N'hêl nanê̆, gâp jêh ri phung chô yau gâp hŏ ƀư tih.

⁷ Hên hŏ ƀư jêh lĕ nau djơh mhǐk tâm rdâng đah Kôranh Brah, mâu djôt prăp ôh nau vay ntăm, nau vay dăp jêh ri nau vay ƀư bơh May hŏ ntĭnh nti jêh Y-Môis jêng oh mon May.

⁸ Dăn Kôranh Brah kah gĭt tay nau May hŏ ntăm jêh ma Y-Môis, nơm oh mon May pô aơ: ‘Tơlah khân may ƀư tih, Gâp mra ƀư ma khân may nchah rai pru pra ta nklang phung mpôl bunuyh;

⁹ bi tơlah khân may lah plơ̆ sĭt tay ma Gâp jêh ri djôt prăp lĕ nau vay Gâp ntăm, nđâp lah phung khân may lĕ nchah rai pru pra jêh tât bôl dŭt trôk, Gâp mra rgum tay rƀŭn khân păng plơ̆ sĭt jêh ri djôt leo khân may hăn tât ta ntŭk Gâp hŏ săch gay ăn amoh Gâp gŭ ta nây.’

¹⁰ Khân păng jêng phung oh mon jêh ri phung ƀon lan ma Kôranh Brah, jêng phung Kôranh Brah hŏ rklaih jêh ma ti dŭt dăng, bêng nau brah bơh May.

¹¹ Hơi Kôranh Brah! Dăn ma May iăt nau gâp mbơh sơm jêng oh mon May jêh ri phung oh mon êng êng, jêng phung maak nuih n'hâm klach yơk ma amoh May. Nar aơ, dăn ma Kôranh Brah ăn ma gâp jêng oh mon Kôranh Brah dơi geh nau ƀŭn lap jêh ri geh nau yô̆ nđach tanăp bunuyh aơ.” Rnôk nây gâp ƀư nau pah kan nhhơr ndrănh ma hađăch.