Ndrom Samƀŭt bơh Yôp 9 - Nau Brah Ndu Ngơi 2023

Y-Yôp plơ̆ lah ma Y-Bildat

¹ Rnôk nây Y-Yôp plơ̆ lah:

² “Ơ, gâp gĭt tâm ban pônây. Ƀiălah mâm ƀư kon bunuyh Brah Ndu dơi uănh jêng sŏng srăng?

³ Tơlah ŭch tâm rlăch đah Păng, Păng ôp du rbăn ntrong, mâu geh ôh bunuyh dơi plơ̆ lah du nau.

⁴ Brah Ndu blau mĭn jêh ri geh nau brah toyh: Mbu moh tâm rdâng đah Păng ƀiălah hôm dơi geh nau đăp mpăn?

⁵ Păng trơn yôk, yôk mâu dơi gĭt; Tâm nau ji nuih, Păng nklơ̆ rlâm yôk dor.

⁶ Păng ƀư mbon neh n'găr mpât, Jêh ri lĕ meh păng n'goh n'gơ;

⁷ Păng ntrŭnh nau ntăm ăn nar lơi luh ôh, Jêh ri nkŭm lĕ nau ang lĕ mănh mbing.

⁸ Knŏng êng Păng ling dĭ lĕ ndâr trôk, Jot klơ rbuh dak mƀŭt.

⁹ Păng njêng mănh Mbing, mănh Ôritôn, Mănh Plêat jêh ri mănh Mpeh pa dâng.

¹⁰ Păng ƀư lĕ kan dŭt toyh mâu dơi gĭt rbăng, Jêh ri âk râk ntil nau khlay ngăn.

¹¹ Ri, Păng văch dăch gâp, gâp mâu saơ, Păng rgăn ngăch, gâp mâu lĕ gĭt năl Păng.

¹² Ri, Păng sŏk lơi jêh, mbu nơm geh tay? Mbu nơm dơi ôp păng: ‘Moh ndơ Kôranh Brah ƀư nây?’

¹³ Brah Ndu mâu rgâl tay ôh nau Păng ji nuih. Phung kơl Rahap chon mon tâm dâng jâng Păng da dê.

¹⁴ Pônây, gâp mbu nơm jêng dĭng gâp dơi plơ̆ lah ma Păng, Tĭng joi rplay ngơi gay tâm rlăch đah Păng?

¹⁵ Nđâp lah mâu geh nau tih, gâp mâu lĕ janh plơ̆ lah ma Păng; Ƀiălah gâp vơl dăn nau yô̆ nđach bơh Nơm Phat Dôih gâp.

¹⁶ Tơlah gâp kuăl dăn ma Păng jêh ri Păng plơ̆ sĭt lah nau gâp, Gâp ăt mâu hŏ rnơm ôh Păng rkêng tôr iăt nau gâp.

¹⁷ Yorlah Păng jot rchiăt gâp tâm phŭt sial chuănh, Dah ma ntop nau sôt rmanh ma gâp.

¹⁸ Păng mâu ăn ma gâp năn nsôr n'hâm, Ƀiălah nkrâm gâp tâm nau rngot hâu ngăn ngên.

¹⁹ Tơlah ngơi ma nau dăng ktang, Păng jêng Nơm Geh Lĕ Nau Brah! Tơlah ngơi ma nau di, mbu nơm janh phong Păng?

²⁰ Nđâp lah gâp mâu geh tih, mbung gâp đŏng phat dôih gâp; Nđâp lah gâp geh nau n'hêl nê̆, Păng ăn gâp saơ đŏng nau gâp mƀruh nklă.

²¹ Nđâp lah gâp geh nau răp jăp, gâp mâu rvê rvănh ôh; Gâp mâu hôm ôh ŭch rêh.

²² Lĕ rngôch tâm ban da dê, yor nây gâp lah: ‘Păng ƀư rai lĕ rngôch bunuyh ueh nđâp phung djơh mhĭk.’

²³ Tơlah nau mhĭk tât ndal ƀư ăn nau khĭt, Păng mưch gơm ma nau rdja nuih phung mâu geh nau tih.

²⁴ Bri dak tŭp tâm ti phung ƀai Păng nkŭm lơi măt phung kôranh phat dôih; Tơlah mâu di Păng, mbu hôm đŏng?

²⁵ Lĕ nar gâp rêh prăl rlau lơn ma du huê bunuyh ntuh bâr nau ndal; Khân păng lôch gơnh ngăn mâu dơi saơ nau ueh lăng.

²⁶ Khân păng rgăn ngăch nâm bu rkĭt tơm rpho, Nâm bu klang ƀŭng jŭr pah mpa sa.

²⁷ Tơlah gâp lah: ‘Gâp mra chuêl lĕ rngôch nau rsuak, Doh lơi nau rngot rvê, jêh nây răm rhơn gơm rum.’

²⁸ Gâp klach krit lĕ nau nđêh nji, Yorlah gâp gĭt May mâu kơp ôh gâp jêng mâu geh nau tih.

²⁹ Bu kơp gâp tih jêh, Pôri mâm gâp hôm ƀư hot gar nau koh dŏng?

³⁰ Tơlah gâp ŭm tâm pler Rao ti ma dak buh,

³¹ Ƀiălah May lơ nkrâm đŏng gâp tâm ntu bŏk Kŏ tât kho ao gâp hôm e ƀơ̆ bơch ma gâp.

³² Yorlah Păng mâu di jêng kon bunuyh nâm bu gâp dĭng gâp nănh tâm ơh ngơi đah Păng, Gay hăn ndrel ntŭk phat dôih.

³³ Mâu geh ôh du huê ƀư nơm phat dôih ta nklang hên, Gay dra ti klơ ma lĕ bar hê hên.

³⁴ Ŭch ma Nơm nây ăn Kôranh Brah sŏk lơi mâng rvĕ Păng bơh gâp, Gay gâp mâu hôm krit klach Păng đŏng ôh.

³⁵ Rnôk nây gâp mra lah mâu hôm klach Păng đŏng ôh, Ƀiălah aƀaơ gâp mâu dơi nâm bu pônây ôh.”