Ndrom Samƀŭt bơh Yôp 8 - Nau Brah Ndu Ngơi 2023

Nau Y-Bildat rlăch

¹ Y-Bildat bunuyh Suah plơ̆ lah:

² “Ndah dŭt jŏ may ngơi mro nau nây, Ndah jŏ dĭng bah nau ngơi nâm bu phŭt chuănh nây?

³ Mâm ƀư dĭng Brah Ndu juet ăn kue lơi nau di? Mâu lah Nơm Geh Lĕ Nau Brah nsak lơi nau di?

⁴ Tơlah phung kon sau may ƀư tih đah Păng Pôri Păng jao khân păng tâm nau tâm rmal ma nau tih.

⁵ Tơlah may tĭng joi Brah Ndu, Vơh vơl ma Nơm Geh Lĕ Nau Brah,

⁶ Tơlah may kloh ueh jêh ri sŏng Pôri aƀaơ ro Păng mra nking n'gang may Jêh ri mplơ̆ tay nau sŏng srăng ăn ma may.

⁷ Nđâp lah ntơm saơm may jê̆ lê̆ Ƀiălah rnôk kăndơ̆ may mra jêng toyh ngăn.

⁸ Dăn may ôp hom lĕ phung rô̆ kăl e hŏ rgăn jêh, Jêh ri nklân rvê moh nau phung chô yau he mâp saơ jêh.

⁹ Yorlah he mhe pơ deh yor ri mâu hŏ gĭt, Ăp nar he gŭ rêh ta neh ntu nâm bu du mlâm gui n'hâm dơm.

¹⁰ Khân păng mâu ntĭm may, mâu ngơi đah may, Mâu dŏng ôh nau ngơi di mâm dĭng khân păng gĭt rbăng?

¹¹ Mâu geh djut trâp, tơm siăt mâm dơi hon? Ntŭk mâu dak, mâm dĭng tơm rpho dơi hao jêng?

¹² Lah hôm nse mâu hŏ ôh dơi siăt, Khân păng hŏ nhop kro lor ma lĕ ntil gơ̆ êng.

¹³ Trong phung chuêl Brah Ndu nâm bu pônây; Nau kâp gân bơh phung mâu chroh mra rai lôch.

¹⁴ Ntŭk bunuyh nây rnơm nsing n'hơ ƀiơr nâm bu ntêng vĭl, Nau păng rnơm nsing nâm bu ntêng vĭl

¹⁵ Bunuyh nây nsing ma ngih păng nơm, ƀiălah ngih nây mâu dơi nâp; Kuăn nâp ngih, ƀiălah ngih n'goh n'gơ.

¹⁶ Tâm dâng nchrat nar, phung mhĭk nâm bu tơm si ndrêh ueh, N'gĭng n'ha nkŭm lam ntŭk n'gar trao.

¹⁷ Reh păng ƀăr jŭm mbŭch lŭ Sŏr jru tâm nklang nđa lŭ.

¹⁸ Tơlah bu rôk bơh ntŭk păng, Ntŭk nây mra dun ma păng: ‘Gâp mâu mâp saơ may!’

¹⁹ Ri, nây jêng nau răm maak ma trong phung mhĭk, Tă bơh neh nây hôm e chăt hon âk tơm si êng.

²⁰ Ri, Brah Ndu mâu chalơi ôh bunuyh răp jăp, Mâu lĕ tâm rnglăp ma bunuyh djơh mhĭk.

²¹ Kôranh Brah mra ƀư ma mbung may bêng ma nau gơm Jêh ri trôm mbung may bêng ma nau troh maak.

²² Phung tâm rmot may geh nau bêk prêng ma păng dŭt hâu Jêh ri ngih bok phung mhĭk mra rai lôch.”