Ndrom Samƀŭt bơh Yôp 7 - Nau Brah Ndu Ngơi 2023

Y-Yôp ngơi njang bâr đŏng ma nau rêh ni

¹ “Nau rêh kon bunuyh ta neh ntu mâm mâu di jêng kan nau jêr? Lĕ nar khay ma khân păng, geh êng đŏng đah nar khay bơh bunuyh pah kan nkhôm?

² Tâm ban bunuyh dĭk bu kơnh ngăn ma ntŭk n'hâm, Tâm ban bunuyh pah kan nkhôm kâp gân prăk khay,

³ Gâp mra dơn lĕ nar khay mâu geh ôh nau khlay, Jêh ri lĕ măng hŏt rơah nal jêh ăn ma gâp.

⁴ Lah lâng bê̆ch, gâp ôp êng: ‘Ndah mông gâp mra dâk?’ Ƀiălah măng jêng jŏ, Gâp rlĭ rlang kŏ tât ƀhit rvi ang.

⁵ Mlay puăch gâp bêng ma ndrĭt rhai jêh ri krêp neh bŏk, Ntâu gâp jêng đang, mham hoch luh ndâng!

⁶ Ăp nar gâp gŭ rêh gơnh lôch prăl rlau lơn ma mpeh tanh, Jêh ri dăch dŭt tâm nau mâu kâp gân.

⁷ Ơ Kôranh Brah, dăn May kah gĭt ma nau rêh gâp knŏng jêng n'hâm nsôr! Măt gâp mâu mra hôm uănh saơ nau ueh maak đŏng ôh.

⁸ Măt hŏ saơ jêh gâp aƀaơ mâu hôm saơ gâp đŏng ôh, Măt May tĭng joi gâp, gâp mâu mra hôm.

⁹ Nâm bu tŭk chah rai jêh ri roh jêh, Bunuyh trŭnh tâm ƀon phung khĭt mâu hôm dơi plơ̆ hao klơ đŏng ôh.

¹⁰ Khân păng mâu plơ̆ sĭt ma ngih khân păng nơm đŏng, Ntŭk khân păng gŭ mâu hôm geh bunuyh gĭt.

¹¹ Yor ri, gâp mâu mra mêm mbung; Tâm nau rngot rvê bơh huêng, gâp mra ngơi; Tâm nau rêh ni bơh huêng, gâp mra vơh vơl.

¹² Gâp mâu di ôh jêng dak mƀŭt mâu lah mpa djơh tâm dak mƀŭt, Kŏ tât May dơm bunuyh gak njrăng?

¹³ Lah gâp ngơi: ‘Gre bê̆ch gâp mra bonh leng gâp, Ntŭk gâp bê̆ch mra ƀư djoh nau klâng rvê,’

¹⁴ Pôri May dŏng nau mbơi ƀư ma gâp klach ngăn, Sŏk nau tâm saơ ƀư ăn gâp krit mbât.

¹⁵ Kŏ tât nau gâp ŭch bu nhăt glăn trô ko gâp kŏ tât khĭt, Ueh lơn đah rêh tâm nting nđăng aơ.

¹⁶ Gâp mâu hôm ŭch rêh. Gâp mâu geh ôh rêh mro. Dăn Kôranh Brah pha lah ma gâp, yorlah nar khay ma gâp knŏng jêng n'hâm nsôr dơm.

¹⁷ Mâm kon bunuyh jêng dĭng May kơp jêng khlay geh nau yơk? Moh ndơ ir dĭng May mĭn rvê,

¹⁸ Kŏ tât may chop khâl ăp ôi, Jêh ri rlong uănh ăp mông ăp tơ̆?

¹⁹ Ndah jŏ dĭng May rle muh măt, Gay ma gâp tŏng mông nar rvăn dak diu?

²⁰ Ơ Nơm mât mray kon bunuyh! Tơlah gâp ƀư tih moh nau gâp hŏ tâm rdâng đah May, Ƀiălah May ăn gâp ƀư ndơ nking găr lot, Jêh ri jêng mbăk jâk ăn ma May?

²¹ Mâm dĭng May mâu yô̆ an nau tih gâp, Sŏk lơi lĕ nau djơh mhĭk tâm gâp? Yorlah mâu hôm jŏ ôh gâp mra bê̆ch tâm neh; May mra tĭng joi gâp ƀiălah gâp mâu hôm ôh.”