Ndrom Samƀŭt bơh Yôp 6 - Nau Brah Ndu Ngơi 2023

Y-Yôp plơ̆ lah nau Y-Êlipas

¹ Y-Yôp plơ̆ lah pô aơ:

² “Ơ! Ŭch ma nau rngot rvê gâp dơi nhueh Jêh ri lĕ nau mhĭk tât ma gâp ăn klơ njing da dê!

³ Yorlah aƀaơ ri khân păng jâk lơn ma choih dak mƀŭt Yor nây gâp hŏ ngơi ndal ir.

⁴ Yorlah lĕ chiông hăr Nơm Geh Lĕ Nau Brah di ta gâp jêh, Nuih n'hâm gâp lêng dak kăch khân păng; Brah Ndu nkrĭp dăp tahan tâm rdâng đah gâp ƀư ma gâp krit klach ngăn.

⁵ Geh lĕ seh bri nhhiăng nter kêng gơ̆ nse? Geh lĕ ndrôk rđuh kêng mbŭch gơ̆ kro?

⁶ Ndơ sa sât mâm ƀư mâu tê̆ tay boh? Geh lĕ ndơ ƀâu kah tâm trôm ndâr nglang tăp iăr?

⁷ Moh ndơ sa jêng ndơ mâu geh ƀâu Gâp mâu ŭch ôh pah bi ta khân păng.

⁸ Ơ! Ŭch ma nau gâp dăn geh ƀoi nau ŭch, Brah Ndu ăn ma gâp ntil nau gâp kâp gân!

⁹ Ŭch ăn Brah Ndu rchiăt gâp ƀư rai lêk, Yơr ti Păng ngroh lơi nau rêh gâp!

¹⁰ Pônây gâp mra hôm dơi geh nau bonh leng, Joi nau maak tâm nau nđêh nji mâu dun ôh; Yorlah nau Nơm Kloh Ueh gâp mâu dơi chuêl ôh.

¹¹ Mâm gâp dơi tŏng n'hâm suan gŭ kâp, Kêng dŭt mâm gâp mra jêng gay ma jong nau rêh?

¹² Suan gâp mâu di ôh jêng suan lŭ? Nglay săk gâp mâu di ôh jêng kông?

¹³ Mâm dĭng mâu hôm geh bunuyh kơl rklaih gâp, N'hâm suan tâm gâp hŏ du roh jêh ƀơh?

¹⁴ Nơm rdja nuih ŭch ma mĭt jiăng yô̆ nđach, Nđâp lah nuih n'hâm chalơi nau klach yơk ma Nơm Geh Lĕ Nau Brah.

¹⁵ Ƀiălah oh nâu gâp mƀruh rlăm gâp nâm bu n'hor lĕ suăt dak, Nâm bu dak n'hor hao toyh ndal.

¹⁶ Dak rkhăl yor hoch glo pler, Rkhăl ma yor pler lêk.

¹⁷ Ƀiălah tâm yan duh nđat khân păng suăt kroh, Nôk duh khân păng roh lĕ tă bơh ntŭk khân păng.

¹⁸ Phung mpôl hăn trong lĕ trơn trong hăn, Hăn lăp tâm bri rdah jêh nây khǐt roh hêng.

¹⁹ Phung mpôl hăn trong Têma hăn joi dak, Phung bu năch Sêba kâp gân ma dak âk râk ngăn.

²⁰ Ƀiălah khân păng bêk prêng yorlah rnơm ir, Nôk tât ta ntŭk khân păng saơ brâp muh măt.

²¹ Bi ma gâp tâm nôk aơ lĕ mĭt jiăng mâu jêng khlay, Saơ nau rêh ni phung mĭt jiăng klach sâr da dê.

²² Lah gâp geh dăn ‘ăn hom ma gâp du djê̆ lê̆ ndơ’, Mâu lĕ rnơm ‘ndơ blŏl an ma gâp’,

²³ Mâu lah bonh ir ‘tâm rklaih gâp bơh ti phung rlăng Jêh ri tâm chuai gâp bơh ti phung tŭn jot!’

²⁴ Dăn ntĭm nti gâp, gâp mra gŭ rklăk, Dăn nchŏng ăn ma gâp saơ ntŭk gâp mâu hŏ di.

²⁵ Nau ngơi di nanê̆ geh nau sâm kơl an, Ƀiălah nau nduyh lah bơh phung mĭt jiăng moh ir geh nau klăp ndăng?

²⁶ Khân may ŭch klăp ndăng nau ngơi lĕ? Ƀiălah nau ngơi bơh du huê bunuyh rdja nuih knŏng nâm bu rlong sial.

²⁷ Khân may tâm nchroh tâm pă phung kon đơi, Tăch nđâp ma mĭt jiăng khân may.

²⁸ Pôri aƀaơ ri ăn khân may uănh hom ma gâp, Yorlah gâp mâu ngơi mƀruh ôh tanăp măt khân may.

²⁹ Gâp dăn khân may mĭn hom, lơi hôm geh nau mâu sŏng đŏng ôh. Mĭn tay hom, yorlah gâp hôm jêng bunuyh sŏng srăng.

³⁰ Mpiăt gâp ngơi nau ngơi mƀruh bơh? Mâm mbung gâp mâu hôm gĭt rnglah nau di mâu lah nau tih?”