Ndrom Samƀŭt bơh Yôp 5 - Nau Brah Ndu Ngơi 2023

Y-Êlipas ntĭm Y-Yôp

¹ “May kuăl hom! Nkhêp lah geh nuyh plơ̆ lah nau may? May mra kuăl rklaih ma mbu nơm tâm phung kloh ueh?

² Yorlah nau rngot rvê nkhĭt bunuyh rluk mâl, Bi nuih n'hâm tâm nach ƀư nkhĭt bunuyh mleh.

³ Gâp saơ jêh phung rluk mâl chăt reh, Ƀiălah gâp rak rtăp ro ntŭk păng gŭ.

⁴ Phung kon khân păng mâu geh ôh nau đăp mpăn, Bu jot plên ntŭk mpông ƀon Ƀiălah mâu geh ôh nơm kơl rklaih.

⁵ Phung ji ngot sa lơi play păng yan kăch roih, Pit sŏk ăn geh nđâp lah tâm nklang rlô lok; Bi phung ji hir ŭch kơnh drăp ndơ păng.

⁶ Yor nau rêh ni mâu luh ôh tă ndruyh neh, Nau uh ah mâu lĕ tă bơh neh chăt hon;

⁷ Ƀiălah bunuyh deh gay dơn nau rêh ni Nâm bu mprănh ŭnh mpăr hao klơ trôk.

⁸ Ƀiălah gâp, gâp mra joi Brah Ndu, Mbơh ma Păng tĭng nau gâp hŏ geh.

⁹ Păng pah kan toyh ngăn jêh ri bu mâu dơi ôh chrâng, Âk ntil nau khlay ngăn kơp mâu dơi lôch.

¹⁰ Păng ăn mih ta neh, Ăn dak djrah lam mir;

¹¹ N'hao phung bunuyh dêh rhêt ăn prêh, Ăn nau ueh maak ma phung dôl klâng rvê.

¹² Păng ƀư rai lơi nau ndơm bơh phung blau plĕch, Ƀư ăn ti khân păng kan mâu dơi lôch.

¹³ Păng nhŭp phung blau plĕch tâm nau plĕch rlăm păng, Jêh ri nhŭp rdâng ro nau ŭch mĭn phung ƀlăch ƀlêr.

¹⁴ Dôl nôk nar khân păng mâp nau ngo klĕng, Dôl nar nklang bôk khân păng rvơ but nâm bu ngo klong măng.

¹⁵ Brah Ndu rklaih nuyh o ach klaih bơh mpiăt đao, Klaih bơh trôm mbung jêh ri klaih bơh ti phung janh ƀai.

¹⁶ Pôri phung o ach geh nau kâp gân, Bi ma phung djơh mhĭk mra mêm mbung.

¹⁷ Ueh maak ngăn ma bunuyh Brah Ndu nduyh! Pôri lơi may uănh dơm dam nau nduyh nkra Nơm Geh Lĕ Nau Brah.

¹⁸ Yorlah păng ƀư ăn sôt, ƀiălah Păng put tay; Păng lơh ji, ƀiălah ti Păng ƀư bah tay.

¹⁹ Păng mra rklaih may bơh prao ntil nau rêh ni, Nđâp ma pơh ntil, nau mhĭk mâu lĕ hôm tât ma may.

²⁰ Tâm nau sa sât ji ngot, Păng mra rklaih may bơh nau khǐt, Jêh ri dôl tâm lơh rklaih bơh mpiăt đao.

²¹ May mra dơi nking n'gang bơh mpiăt nau mhĭk, Mâu klach ôh lah geh nau mhĭk tât.

²² May mra gơm tanăp nau mhĭk tât jêh ri nau sa sât ji ngot, Tanăp mpô mpa bri may mâu lĕ hôm klach.

²³ Yorlah may ƀư nau tâm rnglăp đah lŭ tâm mir, Jêh ri lĕ mpô mpa bri mra tâm rnglăp đah may.

²⁴ May mra saơ ngih bok may gŭ đăp mpăn; May kơp tay phung biăp mâu saơ roh.

²⁵ May gĭt phung kon sau may mra âk râk, Jêh ri noi deh may âk nâm bu gơ̆ tâm mir.

²⁶ May mra dơi geh âk năm lah lăp tâm môch Nâm bu nchăp ba rgum di yan.

²⁷ Nây jêng nau hên hŏ joi gay gĭt jêh ri jêng nau nanê̆ ngăn. May iăt hom jêh ri gǐt năl ma may nơm.”