Ndrom Samƀŭt bơh Yôp 42 - Nau Brah Ndu Ngơi 2023

Nau Y-Yôp plơ̆ lah tal bar

¹ Y-Yôp plơ̆ lah ma Brah Ndu:

² “Gâp gĭt jêh Kôranh Brah dơi ƀư lĕ ntil nau, Bu mâu dơi buay nau May ŭch ƀư.

³ Kôranh Brah ôp: ‘Mbu nơm aơ dơi janh dŏng nau ngơi mâu gĭt vât mo nau mĭn nchră bơh Gâp?’ Nanê̆, gâp hŏ ngơi jêh nau gâp mâu gĭt rbăng, Lĕ nau khlay ir ngăn, kŏ tât gâp mâu dơi rbăng.

⁴ Hơi Kôranh Brah, iăt hom gâp mra ngơi, Mra ôp May, jêh ri May mra sâm ntĭm nti gâp.

⁵ Kăl e tôr gâp geh tăng bu nkoch ma May, Ƀiălah aƀaơ măt gâp hŏ saơ jêh May;

⁶ Yor nây, gâp tâm rmot êng gâp nơm. Jêh ri rmal nau tih tâm ndruyh neh.”

Nau rdŭt

⁷ Jêh Brah Yêhôva ngơi nau nây ma Y-Yôp, Păng lah đŏng ma Y-Êlipas, bunuyh Têman, pô aơ: “Gâp hao ji nuih ngăn ma may jêh ri ma bar hê mĭt jiăng may yorlah khân may mâu ngơi nau di ma Gâp nâm bu Y-Yôp, jêng oh mon Gâp, hŏ ngơi.

⁸ Pôri aƀaơ, khân may sŏk hom pơh mlâm ndrôk nkuăng jêh ri pơh mlâm biăp nkuăng jêh nây hăn mâp Y-Yôp, jêng oh mon Gâp. Yorlah khân may nơm yơh ăn khân may nhhơr mpa ƀư brah gŭch, jêh nây Y-Yôp, oh mon Gâp, mra mbơh sơm ma khân may. Gâp mra dơn nau Y-Yôp jêh ri mâu rmal ôh ma khân may tĭng nâm nau rluk khân may; yorlah khân may mâu ngơi nau di ma Gâp nâm bu Y-Yôp, oh mon Gâp, hŏ ngơi jêh.”

⁹ Pôri, Y-Êlipas bunuyh Têman, Y-Bildat bunuyh Suah, jêh ri Y-Sôphar bunuyh Naama hăn ro jêh ri ƀư tĭng nâm nau Brah Yêhôva hŏ ntĭnh jêh ma khân păng. Brah Yêhôva dơn nau Y-Yôp mbơh sơm.

¹⁰ Tơlah Y-Yôp hŏ mbơh sơm ntang ma phung mĭt jiăng, Brah Yêhôva mplơ̆ sĭt đŏng drăp ndơ ma Y-Yôp. Păng ăn ma Y-Yôp bar tơ̆ âk lơn ma drăp ndơ păng hŏ geh jêh ntơm saơm.

¹¹ Lĕ rngôch oh nâu, oh nur jêh ri lĕ rngôch phung tâm bên đah Y-Yôp ntơm bơh saơm văch khâl da dê jêh ri sông sa ndrel ma păng tâm trôm ngih. Khân păng tâm mpơl nau yô̆ ma păng jêh ri bonh leng păng yor lĕ rngôch nau mhĭk Brah Yêhôva hŏ ăn jêh ma păng. Ăp nơm khân păng ăn da dê ma păng du glo prăk jêh ri du mlâm rgên mah.

¹² Nâm bu pônây, Brah Yêhôva ăn nau ueh uĭn ma lĕ năm kêng lôch nau rêh Y-Yôp âk lơn ma nôk saơm. Păng geh du rmưn puăn rbăn mlâm biăp, prao rbăn seh samô, du rbăn trŭp ndrôk jêh ri du rbăn seh bri me.

¹³ Păng geh đŏng pơh kon bu klâu jêh ri pe kon bu ur.

¹⁴ Păng ntơ amoh kon bu ur dak bôk jêng H'Jêmima, amoh kon bu ur rơh bar H'Kêsia jêh ri ntơ amoh kon bu ur rơh pe H'Kêren-Hapuch.

¹⁵ Tâm lam n'gor mâu geh ôh bu ur jêng ueh ray nâm bu pe kon bu ur Y-Yôp. Mbơ̆ khân păng pă drăp ndơ ma khân păng nđâp ma oh nâu khân păng.

¹⁶ Jêh nau nây, Y-Yôp hôm e rêh du rhiăng puăn jât năm; păng dơi saơ kon, sau, se kŏ tât puăn rô̆.

¹⁷ Jêh nây Y-Yôp khĭt, dơi rêh jŏ năm jêh ri maak ngăn.