Ndrom Samƀŭt bơh Yôp 41 - Nau Brah Ndu Ngơi 2023

¹ Mâu geh ôh nuyh dơi janh gay ŭch lôr păng; Pôri mbu nơm mra dơi dâk tanăp măt Gâp?

² Mbu nơm hŏ ăn ma Gâp gay Gâp mplơ̆ sĭt tay? Lĕ rngôch ndơ tâm dâng trôk jêng ndơ Gâp da dê.

³ Gâp mra ngơi ma lĕ kô̆ săk jăn păng, Ma n'hâm suan jêh ri nau ueh săk jăn păng.

⁴ Mbu nơm dơi doih ntâu padih păng? Mbu nơm dơi ntâp bluh bar ntâu păng?

⁵ Mbu nơm dơi nkhak rmlông păng? Nau klach krit gŭ jŭm sêk păng.

⁶ Ndŭr kơi păng nâm bu geh du mbor khêl, Păng tâm njĭr nâm bu ndơ bu kŭp rdâl.

⁷ Ndơ aơ tâm rđĭl đah ndơ ri, Kŏ tât sial mâu dơi lăp ôh.

⁸ Ndơ aơ tâm thoi đah ndơ ri, Krêp nâp ngăn mâu dơi plôk êng êng ôh.

⁹ Păng si đah luh mprănh ang, Măt păng nchrang ƀring nâm bu nchrat nar ơm ôi.

¹⁰ Trôm mbung păng bruh ŭnh rdo, Bruh ŭnh hit tă tâm trôm.

¹¹ Tă tâm trôm muh păng luh thŭl nhhŭk, Nâm bu khuh dak glah dôl sĭnh đah rpho treng.

¹² Nsôr n'hâm păng ƀư sa ônh hâng ŭnh rnga, Du mpiăt ŭnh luh du tă trôm mbung păng.

¹³ Tâm trô ko păng geh n'hâm dăng ngăn, Nau klach krit pâl ntalơ̆ tanăp măt păng.

¹⁴ Ntŭk mprôn nglay săk păng tâm krêp ndrel, Nâp nâm bu tŏ, mâu blau hêk ôh.

¹⁵ Play nuih păng dăng nâm bu lŭ, Dăng nâm bu glo mpăl tâm dâng.

¹⁶ Lah păng du dâk, phung dŭt n'hâm dăng ktang klach da dê, Râm nsâr joi trong nchuăt du.

¹⁷ Nđâp lah đao geh sreh kŏ mâu dơi sôt, Tak ntâp, na pănh mâu lah klŭp ma jôih pônây dơm.

¹⁸ Đah păng, loih nâm bu rhe, Kông nâm bu tơm si ôm.

¹⁹ Chiông hăr mâu dơi ƀư ma păng nchuăt du ôh; Na lŭ pănh ta păng knŏng nâm bu lâk mpăr.

²⁰ Mâng, păng uănh nâm bu rhe, Păng gơm mưch tăng nteh brâm tak.

²¹ Tâm trôm ndŭl păng geh âk rsong yăng nchah, Ăn nau têl tâm dak bŏk du trong chuar.

²² Păng ăn dak klŏng jru khuh nâm bu glah dak duh. Păng ƀư ăn dak mƀŭt jêng nâm bu gri bu ăn dak ngi mhĭng.

²³ Păng chalơi pakơi mpŭnh rêp ƀlêp; Ăn brŏng jru uănh nâm bu sŏk ndra.

²⁴ Ta neh ntu aơ mâu geh ndơ tâm ban ma păng, Ndơ rhăk njêng mâu geh nau klach ôh.

²⁵ Păng treng uănh ta nâm lĕ rngôch ndơ prêh toyh, Ƀư hađăch ma lĕ mpô mpa dŭt janh ktang.”