Ndrom Samƀŭt bơh Yôp 40 - Nau Brah Ndu Ngơi 2023

Brah Ndu lah ma Y-Yôp

¹ Tă tâm nklang phŭt sial vănh blông Brah Yêhôva lah ma Y-Yôp:

² “Rêt hom rse bŭt nâm bu du huê tahan ktang, Gâp mra ôp may jêh ri may mra plơ̆ lah ma Gâp.

³ Nanê̆ may ŭch nđâp nau di Gâp, May mra kơp Gâp tih gay kơp ma may nơm sŏng lĕ?

⁴ May geh lĕ nting tur dăng nâm bu Brah Ndu? Dơi lĕ may ƀư nteh nglaih nâm bu bâr Păng?

⁵ Nkrơ̆ hom ma nau rnam jêh ri khưm ro; Nsoh ta klơ săk may nơm nau chrat ang jêh ri chrêk rmah.

⁶ Nkhŭt hom nau may ji nuih, Uănh ntêh ma nơm sưr rlau jêh ri gay ƀư bêk prêng păng.

⁷ Uănh ntêh hom ma ăp nơm jêng sưr jêh ri ntrŭnh lơi khân păng; Jot plên ta ntŭk phung djơh mhĭk gŭ.

⁸ Tâp brôi lơi lĕ rngôch khân păng tâm ndruyh neh King lơi muh măt khân păng tâm ntŭk ndâp.

⁹ Rnôk nây, Gâp mra tâm rnê ma may Pônây ma ti may nơm djôt nau dơi tâm lơh ăn ma may nơm!”

Ntil rpu dak Bêhêmot

¹⁰ “Uănh hom Bêhêmot Gâp hŏ rhăk njêng nâm bu rhăk njêng may; Păng sa gơ̆ nâm bu ndrôk.

¹¹ Uănh hom, bar pŭng vĕ păng bêng ma nau dăng ngăn, Jreng ndŭl păng nau dăng nâp ngăn.

¹² Chiăng păng tâm ban tơm si sêdar; Suan nglu păng tâm ƀăr tâm lăp ndrel.

¹³ Nting păng jêng nâm bu dĭng kông, Puăn jâng păng nâm bu mâng loih.

¹⁴ Păng jêng ndơ njêng lor bơh Brah Ndu; Knŏng Nơm rhăk njêng păng ri mơ dơi nkhĭt păng.

¹⁵ Yôk dor hon gơ̆ ăn păng sa, Phung mpô mpa bri pâl rlưn tâm ntŭk nây.

¹⁶ Păng kuen bê̆ch tâm chrăch-chrêl, Tâm ăp ntŭk rlô rpho treng jêh ri ntŭk rhuh tâm djut.

¹⁷ Yorlah kao chrăch-chrêl sŏk gui n'hâm nkŭm păng, Tơm si yôr ta kơh n'hor dak nchueng jŭm păng.

¹⁸ Ri, nđâp lah dak hao toyh hâu ngăn, păng mâu lĕ klach; Nđâp lah dak krong Yurdan băm tât trôm mbung, păng hôm gŭ păn thơ.

¹⁹ Mbu nơm dơi nhŭp păng đah nglĕ? Mâu lah sân dăk gay ntâp ta muh păng?”

Phung rbư Lêviathan

²⁰ “Dơi lĕ may nhŭp rbư Lêviathan đah nglĕ ndar. Mâu lah dơi lĕ sŏk rse kât mpiăt păng?

²¹ Dơi lĕ chuh n'groi du njăr rse tâm trôm muh păng, Jêh ri nklĕ kang păng ma du mlâm nglĕ đŏng?

²² Gĭt lah păng vơl dŭt hâu ngăn ma may, Sŏk nau ngơi rdơ̆ rbăn ngăn dăn ma may lĕ?

²³ Păng mra njêng nau tâm rnglăp đah may, Gay may dơn păng jêng dĭk du njăr rêh?

²⁴ May nănh lĕ pâl rlưn đah păng nâm bu du mlâm sĭm, Mâu lah kât păng ăn ma phung bu ur pâl rlưn?

²⁵ Phung hăn văng ka geh mbơh rnoh khlay lĕ? Mâu lah khân may tăch tah puăch păng gay ma tăch?

²⁶ Dơi lĕ may sŏk tak ntâp tâm ntâu păng, Sŏk tak rjăng ntâp băm jêh ri tâm bôk păng lĕ?

²⁷ Rlong hom ti đah păng, Kăndơ̆ knŏng ŭch mĭn ma nau nây, May mâu mra ŭch rlŏk tay đŏng ôh!

²⁸ Nau gay ŭch nhŭp păng mra roh lĕ, Knŏng saơ păng, jâng ti may lĕ krit êng jêh.