Ndrom Samƀŭt bơh Yôp 4 - Nau Brah Ndu Ngơi 2023

Y-Êlipas nduyh Y-Yôp

¹ Rnôk nây, Y-Êlipas, bunuyh Têman plơ̆ lah:

² “Tơlah mbu nơm janh ngơi đah may bar pe tong, gĭt lah may geh rngot nuih n'hâm lĕ? Ƀiălah mbu nơm dơi ât rklăk lĕ?

³ Ri, may hŏ ntĭm nti âk bunuyh Jêh ri hŏ ƀư ăn âk ti hươi rdja tât dơi jêng dăng.

⁴ Nau may ngơi hŏ kâp kơl nơm chêh prah, May hŏ ƀư nâp dăng jêh kômâk lĕ rbăn.

⁵ Ƀiălah aƀaơ nau rêh ni tât ma may, may rdja nuih n'hâm; Nau tât ma may, may mâu dơi ôh nsrôih.

⁶ Mâu di bơh nuih n'hâm klach yơk Kôranh Brah jêng ntŭk may rnơm nsing, Jêh ri trong nau sŏng jêng nau may kâp gân ƀơh?

⁷ Ăn may uănh n'hêl tay, geh ndah âk bunuyh mâu tih dơn nau khĭt? Ta ntŭk bunuyh sŏng gŭ nkhơng geh nau rai yot?

⁸ Tĭng nau gâp saơ, mbu nơm chuar nau djơh mhĭk Jêh ri srih nau rŭng răng mra rek păng kơt nĕ.

⁹ Yor n'hâm nsôr bơh Brah Ndu, khân păng geh nau khĭt roh; Yor nau Păng ji nuih, khân păng geh nau rai lôch.

¹⁰ Nau ngrông dŭt janh bơh yau mŭr hŏ roh rklăk jêh Jêh ri neng phung kon yau mŭr hŏ nkê̆ch pă jêh.

¹¹ Yau mŭr dăng lĕ khĭt yor pưt mpa sa, Jêh ri phung kon yau mŭr chah rai pru pra.

¹² Geh du nau ngơi ndâp tât ma gâp, Tôr gâp tăng nau ngơi huêt nây,

¹³ Bri măng, lah kon bunuyh lêt bê̆ch Dôl gŭ rvê mĭn gâp saơ nau tâm mpơl.

¹⁴ Nau klach krit ƀư ma gâp phit ndrŏt; Nting nđăng gâp râm nsâr.

¹⁵ Du huê brah hăn rgăn tanăp măt gâp Rsau sŏk klơ ntâu gâp rak rsau.

¹⁶ Brah dâk du ntŭk, Ƀiălah gâp mâu gĭt năl ôh; Du mlâm rup gŭ panăp măt gâp, Du ƀât lât gŭ rklăk jêh nây gâp tăng nau ngơi:

¹⁷ ‘Kon bunuyh djơh mhĭk dơi sŏng srăng lơn ma Brah Ndu lĕ bơh? Mâm kon bunuyh dơi kloh rsang lơn ma Nơm Rhăk Njêng păng nơm lĕ?

¹⁸ Nđâp ma phung oh mon Păng, Păng kŏ mâu rnơm đŏng, Tông mpăr Păng, Păng hôm e nduyh nau tih;

¹⁹ N'hơn lah phung gŭ tâm chuanh neh uk, Ndâk njêng mbon klơ ndruyh neh, Bu jot plên nâm bu mpôl nchiăr reh!

²⁰ Du ôi du măng khân păng bu rchiăt hăch; Khĭt roh n'ho ro, mâu geh ôh nơm dơi gĭt.

²¹ Rse ngih bok khân păng lĕ đŏt tăch jêh, Khân păng khĭt kŏ mâu lĕ dơi geh nau blau mĭn ôh.’ ”