Ndrom Samƀŭt bơh Yôp 39 - Nau Brah Ndu Ngơi 2023

Nau khlay ndâp tâm lĕ rngôch ntil mpô mpa rêh

^1-2 May dơi lĕ nchron mpa ăn ma yau mŭr, Mâu lah ƀư ma yau mŭr kon bah nau ji ngot, Lah khân păng kuen tâm trôm, Mâu lah grem kâp tâm nklang rlô si?

³ Mbu nơm ăn ndơ sa ma nđak, Lah phung nđak kon jê̆ nhhiăng ma Brah Ndu, Jêh ri mpăr ta aơ ta ri mâu geh ndơ sa?”

⁴ “May gĭt lĕ ndah jŏ be bri deh kon, May tĭng rmiăng lĕ nôk jun me deh kon?

⁵ May dơi kơp lĕ moh nar khay păng ntreo, Jêh ri gĭt nôk păng deh kon?

⁶ Păng ndôr deh luh du kon jun jê̆, Dơi bah nau ji deh.

⁷ Phung kon jê̆ lê̆ ngăn dăng, văch ma toyh tâm ndrêch; Khân păng du chalơi me jêh ri mâu hôm plơ̆ sĭt đŏng ôh.

⁸ Mbu nơm ăn seh bri rdah hăn nsong blă blơ? Mbu nơm doh lơi rse kât kon seh bri nchuăt prăl ngăn?

⁹ Gâp ăn bri ma păng ƀư ngih, Neh chiăt boh ƀư jêng ntŭk gŭ.

¹⁰ Păng du ngai đah nau ngơi drơu drơu ta nklang ƀon toyh, Mâu tăng nau troh bơh phung mât chiăp.

¹¹ Păng hăn nsong lam dor yôk nâm bu gơ̆ ndrêch ma păng, Gay tĭng joi tơm si n'ha ndrêh.

¹² Ndrôk bri ŭch pah kan ma may lĕ, Mâu lah ŭch kuen bê̆ch du măng tâm hip gơ̆ may lĕ?

¹³ May dơi lĕ sŏk rse kât păng ta mâng mbăk gay kai, Păng ŭch đŏng dơn uih đŏt mâng chraih ma may tâm rlŭng?

¹⁴ May dơi lĕ nsing tâm nau dăng n'hâm suan bơh păng, Gay jao kan hŏt r'ah ma păng?

¹⁵ May geh rnơm pô aơ; păng mra plơ̆ tay, Jêh ri rdeng ba sĭt ma ntŭk may mprah ba lĕ?

¹⁶ Sĭm ôtrus rtuh nting năr răm rhơn, Ƀiălah mâu geh nau rŏng nâm bu sĭm njơch dak.

¹⁷ Yorlah păng chalơi tăp tâm neh, Kđôi ăn tâm choih duh păn tăp,

¹⁸ Chuêl pô aơ; jâng bunuyh mra geh jot, Mpa bri mra geh jot hăch.

¹⁹ Sĭm ôtrus janh đah phung kon, nâm bu mâu di kon păng nơm, Mâu rvê pô aơ nau hŏt deh tăp păng jêng mâu khlay;

²⁰ Yorlah Brah Ndu ƀư ma păng roh nau blau mĭn, Mâu ăn du kô̆ nau gĭt rbăng ma păng.

²¹ Ƀiălah tơlah nchuăt ngăch nâm bu mpăr, Păng gơm mưch ma seh nđâp ma bunuyh rmăk seh.

²² Di lĕ may ăn nau dăng ma seh, Jêh ri nkuăk gang ta trô ko păng lĕ?

²³ May dơi ƀư ăn păng nsăt nâm bu krah ndrach, Nau păng krĭ đah nau rnam ăn bu klach lĕ?

²⁴ Păng kuyh neh jru tâm rlŭng, răm rhơn ma nau dăng n'hâm păng; Rduh ran panăp tahan djôt ndơ tâm lơh.

²⁵ Mâu uănh geh ma nau tŭn jot, mâu phit ro ma nau krit; Mâu plơ̆ rŭch ôh đah tra năp chiông đao.

²⁶ Kêng pŭng vĕ păng, nteh dĭng kăm, Tak jêh ri đao nchrat ƀring ngăn.

²⁷ Ma nau ji nuih, păng nchuăt prăl nâm bu lơp nglaih, Tăng uh nŭng, păng mâu dơi đăp gŭ ôh,

²⁸ Dôl tăng uh nŭng, păng mra krĭ ro dŭt dăng, Ntơm bơh ngai, păng n'hơp ƀâu n'hôl tâm lơh, Păng tăng bâr kôranh tahan jêh ri bâr troh nter rduh tâm lơh.

²⁹ Di lĕ yor nau blau mĭn may dĭng klang grĭt mpăr prih klơ, Lĭ năr rlet prêh mpeh pa dâng?

³⁰ Di lĕ may ntĭnh ăn ma klang ƀŭng Mpăr her klơ tĭng joi ntŭk ƀư rsuăn?

³¹ Sŏk rkâp lŭ ƀư ntŭk gŭ, Ta mpir yôk prêh ngăn hao ƀư ntŭk gŭ dăp mpăn.

³² Tă bơh ntŭk prêh nây, păng rmiăt mpa, Bar đah măt uănh trong ntơm bơh ngai ngăn.

³³ Phung kon păng vay djrêp mham, Yorlah ta ntŭk geh mpa lĕ khĭt păng mra tât ro.”

Nau Y-Yôp plơ̆ lah tal nguay

³⁴ Brah Yêhôva plơ̆ lah đŏng ma Y-Yôp:

³⁵ “Nơm vay ngơi ƀrôk nănh tâm rlăch đah Nơm Geh Lĕ Nau Brah lĕ? Mbu nơm phong dôih đah Brah Ndu, plơ̆ lah hom!”

³⁶ Y-Yôp plơ̆ lah ma Brah Yêhôva:

³⁷ “Gâp jêng du ntil ndơ mâu geh rnoh khlay ôh; moh nau gâp mra plơ̆ sĭt lah ma May? Gâp knŏng gĭt sŏk ti rdêp mbung.

³⁸ Gâp hŏ ngơi du tơ̆ jêh, gâp mâu dơi ngơi rlŏk tay; Lĕ lăn ngơi bar pe tơ̆ jêh, gâp mâu hôm nănh ngơi đŏng ôh.”