Ndrom Samƀŭt bơh Yôp 38 - Nau Brah Ndu Ngơi 2023

Brah Ndu plơ̆ sĭt lah nau Y-Yôp

¹ Rnôk nây, tă tâm nklang phŭt sial vănh blông Brah Ndu plơ̆ lah ma Y-Yôp:

² “Mbu moh nơm aơ dĭng nănh dŏng nau ngơi mâu geh nau gĭt rbăng Ƀư ngo nau Gâp nchră?

³ Vân hom rse bŭt nâm bu du huê tahan janh ktang, Gâp mra ôp ma may jêh ri may mra plơ̆ lah ma Gâp.

⁴ Lah Gâp n'gân mbon rplay neh pôri ta ntŭk may gŭ? Tơlah may gĭt rbăng, nkoch hom ăn ma Gâp gĭt.

⁵ N'hêl nanê̆ may gĭt mbu tâm nal nau veh rnoh rplay neh Jêh ri mbu nthăng rse veh rplay neh?

⁶ Mbon păng n'gân ta klơ moh ndơ, Mbu hŏ dơm lŭ njônh ma păng?

⁷ Tâm rnôk nây lĕ mănh mbing ôi mprơ ndrel n'grŭp, Phung kon bu klâu Brah Ndu troh nau mprơ hâk răm?

⁸ Mbu hŏ sŏk lĕ mpông nchăng king lơi dak mƀŭt Lah dak mƀŭt rlêng ler lip klơ tă bơh săt brŏng jru?

⁹ Lah Gâp nthăng ndâr tŭk ƀư ao jâr ma dak mƀŭt, Sŏk nau ngo klĕng vêt vê ƀư bok put ma păng.

¹⁰ Gâp tâm nal n'har ma dak mƀŭt, Nchăng mpông ntĭl rnăng.

¹¹ Jêh ri lah: ‘May knŏng tât ta aơ dơm, mâu hôm hăn ngai đŏng ôh, Ăp tơ̆ dak rbuh gơm mpray may mra nsrŭng ta ntŭk aơ yơh!’

¹² Ntơm bơh deh, geh lĕ may ntrŭnh ma kêng ôi, Mâu lah nal ntŭk ăn ntŭk luh nar

¹³ Nkŭm lĕ puăn pŭng rplay neh, Ƀư ma phung djơh du luh tă bơh ntŭk păng?

¹⁴ Rplay neh rgâl rup nâm bu neh uk tâm dâng ndơ tâp pŏng, Jêh ri lĕ rngôch ndơ luh mpơl nâm bu ndơ rlă klơ bok ao.

¹⁵ Nau ang hŏ roh jêh bơh phung djơh, Nting tur dŭt dăng bơh khân păng bu hŏ nkê̆ch pă.

¹⁶ May mâp joi lĕ tât ta tu dak mƀŭt, Mâu lah trŭnh ta săt brŏng jru lĕ?

¹⁷ Geh lĕ mbu nơm ntĭm ăn may saơ mpông pêr nau khĭt, Mâu lah mpông ƀon phung khĭt lĕ?

¹⁸ May lĕ gĭt vât đŏng nau dĭ huy rplay neh? Lah may gĭt lĕ nau nây, nkoch hom.

¹⁹ Ta ntŭk trong hăn rlet ma nau ang gŭ? Bi nau ngo ta ntŭk gŭ?

²⁰ May dơi leo păng sĭt ma n'gor bri păng đŏng? Mâu lah dơi gĭt trong sĭt leo ma ngih păng lĕ?

²¹ N'hêl nê̆ may gĭt, yorlah nôk nây bu deh jêh ma may, Nar may gŭ rêh lĕ jŏ ngăn!

²² May hŏ lăp uănh ăp jay bu prăp pler, Lĕ saơ đŏng jay prăp glo mih dak pler

²³ Ndơ nây gâp hŏ prăp jêh ăn ma nau rêh ni, Ma nar tâm lơh jêh ri đah nơm rlăng lĕ?

²⁴ Mbah trong njŭn leo tât ntŭk bu tâm nkhah nau ang, Mâu lah sial khôm tă luh nar, ta ntŭk trong tĭng ta klơ neh ntu?

²⁵ Mbu nơm kuyh n'hor ăn rchoh dak sor, Tor trong ma nglaih dah,

²⁶ Djôt dak mih tât tâm neh mâu geh bunuyh gŭ, Tâm bri rdah kŏ mâu lĕ geh bunuyh gŭ,

²⁷ Gay djrah bĕ neh hŏng gơ̆ kro, Ƀư ăn gơ̆ tơm si chăt hon ndrêh ueh?

²⁸ Mih geh mbơ̆ lĕ? Ăn truh dak tŭk ơm ôi, mbu nơm deh păng?

²⁹ Mbu ndŭl proch deh ma glo dak pler? Mbu moh deh ma dak tŭk jêng boh tă bơh trôk?

³⁰ Dak jêng kŏt dăng nâm bu lŭ, Ta bâr brŏng jru jêng kŏt nâm glo pler.

³¹ May dơi lĕ kât se rvăk ta mănh Plêat, Mâu lah doh an rse rvăk ma mănh Ôriôn lĕ?

³² May dơi lĕ ƀư an mănh Masarôt luh di yan păng, Jêh ri njŭn trong mănh mbing ndrel âk băl mănh tĭng păng lĕ?

³³ May dơi gĭt vât lĕ nau vay dăp bơh lĕ ndâr trôk? May dơi njêng lĕ nau vay kơt nây ta neh ntu?

³⁴ Dơi lĕ may nter kuăl ma ndâr tŭk, Ƀư ăn dak mih nkhŭt lip ta klơ may dơi lĕ?

³⁵ Dơi lĕ may ntrŭnh nau ntăm ma lơp nglaih, đă khân păng hăn Jêh ri khân păng lah ma may: ‘Hên hŏ ndrăp jêh’ mâu?

³⁶ Mbu nơm dơm nau blau mĭn tâm nuih n'hâm? Mbu nơm ăn nau gĭt rbăng ma bôk rngok?

³⁷ Mbu nơm tŏng nau blau mĭn gay kơp lĕ ndâr tŭk, Mâu lah nkêng lĕ rngôch nông dak tâm trôk ăn dak hoch?

³⁸ Gay ndruyh neh krêp jêng glo, Neh rchuăl tâm krêp ndrel?