Ndrom Samƀŭt bơh Yôp 37 - Nau Brah Ndu Ngơi 2023

Y-Êlihu tâm rnê nau brah jêh ri nau rnam Brah Ndu

¹ “Phŭt sial nây ƀư play nuih gâp klach râm nsâr, Nâm bu ŭch nsăt luh bơh ntang tơh.

² Iăt hom, ăn iăt hom nau Păng nâm bu nteh nglaih, Nau nteh bâr nglaih luh bơh trôm mbung Păng!

³ Păng ƀư ăn ndơ nây nteh huy ngăn lam trôk nđôch, Nau lơp nglaih nchrat tât dŭt bri dŭt neh.

⁴ Jêh nây tât nau nteh ƀhing ƀhing, Đah nau rnam, Păng sŏk nau nteh nglaih dah, Lah nau nteh Păng toyh lơn pôri lơp nglaih ang ƀring.

⁵ Bâr Brah Ndu nglaih dah ma nau khlay ngăn ngên; Păng ƀư lĕ kan toyh ngăn ngên he mâu dơi geh nau gĭt rbăng ôh?

⁶ Yorlah Păng lah ma glo dak pler: ‘Tŭp hom ta neh ntu’; Jêh ri ndrel ma mih ntâng: ‘Hoch hom nâm bu rbuh dak leng’.

⁷ Păng tâp pŏng ta mpang ti lĕ rngôch bunuyh, Gay ăn kon bunuyh gĭt Păng hŏ rhăk njêng gĭt nau kan Păng.

⁸ Nôk nây mpô mpa bri rŭk lăp tâm rsuăn, Gŭ mpăn tâm trôm khân păng.

⁹ Phŭt sial tă bơh mpeh pa dâng, Sial ji kăt tă bơh mpeh pa lơ.

¹⁰ N'hâm nsôr Brah Ndu jêng dak pler; Dak toyh kŏt dăng jêng nâm bu glo pler.

¹¹ Păng prăp n'hôl dak tâm tŭk krăk, Dŏng tŭk ăn bra nau lơp nglaih bơh Păng.

¹² Tŭk mpăr ndăch ăp ntŭk tĭng nau Păng njŭn leo, Gay ƀư ăn lôch lĕ nau kan Păng ntăm Lam lĕ rngôch ntŭk ta klơ neh.

¹³ Păng prơh ndâr tŭk hăn, geh tơ̆ gay nduyh nkra, Geh nôk gay djrah neh ntu, Mâu lah ăn nau ueh maak ma kon bunuyh.

¹⁴ Hơi Y-Yôp, iăt hom nau aơ, Ăn dâk du ntŭk jêh ri n'gơr uănh lĕ kan khlay ngăn ƀơh Brah Ndu ƀư.

¹⁵ May gĭt lĕ mâm Brah Ndu ăn nau ntrŭnh ma khân păng, Jêh ri ƀư ăn lơp nglaih sol ang tâm ndâr tŭk lĕ?

¹⁶ May gĭt lĕ mâm dĭng ndâr tŭk nâp dôl mpăr, Du nau kan toyh bơh Nơm Geh Lĕ Nau Gĭt Mĭn?

¹⁷ May gĭt lĕ mbah tă bok ao may duh, Lah rplay neh gŭ nsrŭng yor sial pa dâng khôm tât lĕ?

¹⁸ May dơi lĕ n'hanh Brah Ndu ling trôk, Ƀư ăn păng dăng nâp nâm bu du mlâm rchŏk bu tŏ lĕ?

¹⁹ Ntĭm hom ăn hên gĭt moh nau hên mra lah ma Kôranh Brah; Yor nau rluk mâl, hên mâu gĭt nkoch tâm nau kan.

²⁰ Nkhêp lah gâp ŭch nkoch đah Păng; Mâm ƀư gâp lơ ŭch Păng ƀư rai ma gâp đŏng?

²¹ Aƀaơ ri, mâu geh ôh bunuyh dơi uănh tâm nau chrat nar, Lah păng sol chrat tâm trôk nđôch, Nôk sial lĕ khôm mpruh jêh ri trôk nđôch ang lơ vơ.

²² Tă mpeh pa lơ luh du nau chrêk nâm bu mah; Brah Ndu văch đah nau rnam klach krit dŭt n'hâm!

²³ Nơm Geh Lĕ Nau Brah, he mâu dơi ôh joi tât ta Păng; Păng geh nau brah jêh ri sŏng nanê̆ ngăn, Păng sŏng srăng dŭt n'hâm, mâu tŭn jot bu ôh.

²⁴ Yor nau nây yơh kon bunuyh klach yơk ma Păng, Păng mâu treng uănh ôh phung mĭn ma păng nơm geh nau blau mĭn.”