Ndrom Samƀŭt bơh Yôp 36 - Nau Brah Ndu Ngơi 2023

Y-Êlihu tâm rnê nau blau mĭn jêh ri nau kan Brah Ndu khlay ngăn

¹ Y-Êlihu ngơi tay:

² “Srôih hom ntop djê̆ đŏng, gâp mra ntĭm ma may, Yorlah gâp hôm geh nau ngơi koh dŏng Brah Ndu.

³ Gâp mra djôt leo nau blau mĭn âk tă bơh ăp ntŭk Gay mpơl nau sŏng srăng bơh Nơm Rhăk Njêng gâp.

⁴ N'hêl nanê̆ nau gâp tâm dun mâu jêng mƀruh ôh; Du huê geh nau blau mĭn âk nanê̆ ngăn dôl gŭ ndrel may.

⁵ Ri, Brah Ndu bêng nau brah mâu geh mưch rmot bu ôh; Păng dŭt gĭt vât ngăn.

⁶ Păng mâu djôt prăp ôh nau rêh bơh bunuyh djơh, Ƀiălah phat dôih nau sŏng ma nơm geh nau rêh ni.

⁷ Păng treng uănh ƀaƀơ tât ma bunuyh sŏng srăng, Ăn ma khân păng gŭ klơ sưng hađăch ndrel ma phung hađăch, Păng njêng khân păng nâp ngăn ngên, jêh ri khân păng geh nau yơk mro.

⁸ Ƀiălah tơlah khân păng mra nkông ma se rvăk Jêh ri bu kât ma rse brăt nau rêh ni,

⁹ Pôri Păng mpơl ma khân păng gĭt nau khân păng ƀư, Jêh ri nau tih yor nau sưr khân păng.

¹⁰ Păng pơk trôm tôr gay iăt nau nduyh nkra, Đă khân păng chalơi lĕ nau djơh mhĭk.

¹¹ Tơlah khân păng tông iăt jêh ri pah kan ma Păng, Khân păng mra dơn âk nar gŭ rêh chăt jêng. Jêh ri lĕ khay năm bêng ma nau răm maak.

¹² Ƀiălah tơlah mâu tông ôh, khân păng mra nkhĭt ma đao, Jêh ri khĭt yor mâu geh nau gĭt rbăng.

¹³ Nuih n'hâm phung mâu chroh rŏng ma nau ji nuih; Lah geh Păng kât se rvăk mâu đŏng nter gay ăn bu kơl an.

¹⁴ Khân păng khĭt dôl hôm mom; Nau rêh rai lôch tâm nklang phung bu klâu văng tĭr tâm jây rhŏ brah.

¹⁵ Ƀiălah Brah Ndu dŏng nau rêh ni gay rklaih phung mâp nau rêh ni, Sŏk nau mhĭk tât gay pơk trôm tôr khân păng.

¹⁶ Păng nsŭk nsôr may du luh bơh trôm mbung nau rêh ni, Dơm may ta ntŭk gŭ păn thơ mâu hôm geh nau uh nuih ôh; Ndơ sông sa kah bu hŏ ndrăp bêng klơ sưng.

¹⁷ Ƀiălah nuih n'hâm may dơn bêng ma nau mhĭk bơh phung djơh ŭch ƀư; Yor ri nau phat dôih jêh ri nau tâm rmal hŏ kuăn jêh may.

¹⁸ Njrăng hom, lơi ăn nau ndrŏng kơnh, Mâu lah ndơ bu blŏl toyh ir ƀư vĭ trong may.

¹⁹ Mâu lah nau ndrŏng jêh ri nau dăng may Dơi rklaih may bơh nau rêh ni lĕ?

²⁰ Lơi gŭ kâp ôh măng ngo Jêng nôk nây ƀât lât lĕ rngôch phung ƀon lan roh lĕ.

²¹ Njrăng hom lơi plơ̆ sĭt ôh ma nau tih mhĭk, Yorlah nau rêh ni hŏ ntĭm nti may bơh nau ƀư tih.

²² Ri, nau brah bơh Brah Ndu dŭt prêh ngăn ngên; Geh đŏng nơm nti tâm ban Păng?

²³ Geh lĕ nơm nanh sâm nchră ntĭm trong ma Păng, Mâu lah ngơi pô aơ: ‘May ƀư tih jêh’ mâu?

²⁴ Kah gĭt tâm rnê hom ma kan Kôranh Brah Kon bunuyh vay mprơ tâm rnê.

²⁵ Lĕ rngôch bunuyh n'gơr uănh nau kan nây da dê; Ăp nơm uănh păng ntơm bơh ngai.

²⁶ Di ngăn, Brah Ndu dŭt toyh, mâm he dơi gĭt rbăng; Mrô năm Păng mbu dơi kơp.

²⁷ Yorlah Păng rgum ăp truh dak, Jêh nây n'hôl âk truh dak tŭk jêng mih;

²⁸ Lĕ ndâr tŭk tŭp hoch dak mih, Djrah lam lĕ klơ kon bunuyh.

²⁹ Mbu nơm dơi gĭt vât ndâr tŭk ling nthăng, Mâu lah nteh nglaih huy ngăn tă bơh ngih bok Păng gŭ?

³⁰ Ri, Păng ăn nchrat ang jŭm Păng Jêh ri nkŭm ndâp tâm dâng săt dak mƀŭt jru.

³¹ Păng dŏng lĕ nau nây mât rong lĕ rngôch phung bunuyh; Ăn ndơ sông sa rmeh rmai.

³² Păng pôn lơp nglaih tâm ti, Ntăm ma păng ntŭk ntrâng mra lơh.

³³ Nau nteh nglaih dah mbơh geh nau mih hâu, Nđâp mpô mpa tâm ban đŏng gĭt nau mbên phŭt sial mra tât.”