Ndrom Samƀŭt bơh Yôp 35 - Nau Brah Ndu Ngơi 2023

¹ Y-Êlihu ngơi tay:

² “May mĭn di lah may ngơi pô aơ: ‘Gâp geh nau sŏng srăng tanăp măt Brah Ndu’ lĕ?

³ Nau may ôp: ‘Tơlah gâp mâu geh ƀư tih, Moh ndơ khlay gâp mra geh? Nau nây geh nau ueh lơn ma gâp lĕ?’

⁴ Gâp nơm mra plơ̆ lah ma may, Jêh ri phung mĭt jiăng may đŏng.

⁵ N'gơr măt hom jêh ri uănh lĕ ndâr trôk; Treng uănh hom ma ndâr tŭk prêh lơn ma may hâu ngăn ngên.

⁶ Tơlah may ƀư tih pôri moh ndơ may dơi ƀư ăn djơh ma Păng? Tơlah nau tih may lơ hâu âk moh nau dĭng tât ma Păng?

⁷ Tơlah may jêng sŏng srăng, moh ndơ may mra leo ăn ma Păng? Moh ntil ndơ Păng mra sŏk dơn tă bơh ti may?

⁸ Nau djơh may mra ƀư mhĭk tât ma du mpôl bunuyh, Nau sŏng srăng may dơi geh nau khlay kơl ma kon bunuyh.

⁹ Geh âk ir nau tŭn jot ƀư ma bu lŭng nter, Yor phung djơh tŭn jot dĭng bu kuăl kơl rklaih.

¹⁰ Ƀiălah mâu geh ôh nuyh ôp: ‘Brah Ndu, Nơm Rhăk Njêng gâp mbah ntŭk gŭ? Păng nơm ăn bu mprơ maak dôl bri măng,

¹¹ Ntĭm nti he dơi gĭt rbăng lơn ma rbăn ntil mpô mpa bri tâm neh ntu, Jêh ri ăn he blau mĭn lơn ma lĕ ntil sĭm tâm trôk.’

¹² Khân păng lŭng nter ƀiălah Păng mâu plơ̆ lah ôh, Yorlah nuih n'hâm sưr rlau phung bunuyh djơh mhĭk.

¹³ N'hêl nanê̆, nau mbơh sơm mâu răp jăp Brah Ndu mâu iăt ôh, Nơm Geh Lĕ Nau Brah mâu mra treng uănh ôh.

¹⁴ Lơ hâu lah may lah pô aơ may mâu saơ Păng, May mbơh jêh nau di ma Păng jêh ri mra gŭ kâp Păng phat dôih!

¹⁵ Aƀaơ ri, yorlah nau Păng ji nuih mâu hŏ tât ôh nau rmal, Jêh ri yorlah Păng mâu hŏ klăp ndăng ir ma nau ƀư tih nây,

¹⁶ Yor ri Y-Yôp hă trôm mbung ngơi lĕ nau păng ngơi mâu răp jăp, Jêh ri lơ hâu âk nau ngơi mâu geh ôh nau gĭt rbăng.”