Ndrom Samƀŭt bơh Yôp 34 - Nau Brah Ndu Ngơi 2023

Y-Êlihu mpơl nau sŏng srăng bơh Brah Ndu

¹ Y-Êlihu hôm ngơi:

² “Hơi phung bunuyh blau mĭn, iăt hom nau gâp ngơi! Hơi lĕ khân may phung gĭt rbăng, rkêng tôr iăt hom nau gâp!

³ Yorlah tôr gĭt sek uănh nau ngơi, Nâm bu mbung chiăm ndơ sa.

⁴ Ăn he săch hom moh nau jêng di, Ăn he gĭt vât moh nau jêng ueh.

⁵ Yorlah Y-Yôp hŏ lah n'hêl nanê̆: ‘Gâp jêng bunuyh sŏng srăng, Ƀiălah Brah Ndu hŏ sŏk rdu lơi jêh nau di bơh gâp.

⁶ Bu kơp gâp jêng nuyh ngơi mƀruh nđâp lah gâp gŭ sŏng kđôi lĕ; Ntŭk têl sôt gâp mâu bah nđâp lah gâp mâu ƀư tih.’

⁷ Geh bunuyh tâm ban nâm Y-Yôp lĕ? Nhêt nau bu mưch nâm bu dak,

⁸ Rnglăp ndrel đah phung ƀư nau mhĭk, Hăn ndrel ma phung ƀư nau djơh?

⁹ Yorlah Y-Yôp hŏ lah: ‘Kon bunuyh mâu geh nau khlay ôh, Lah răm maak tâm Brah Ndu.’

¹⁰ Yor nây, hơi phung gĭt rbăng, iăt hom nau gâp; Brah Ndu mâu mâp ôh ƀư nau djơh, Nơm Geh Lĕ Nau Brah mâu lĕ mâp ƀư tih.

¹¹ Păng mra nkhôm ăn ma kon bunuyh tĭng nâm nau kan păng hŏ pah, Mra ƀư ăn tât ma ăp nơm tĭng nâm nau khân păng gŭ rêh.

¹² N'hêl nanê̆ Brah Ndu mâu gŭ ngao ma nau djơh mhĭk ôh, Nơm Geh Lĕ Nau Brah mâu nkê̆ch ăn kue nau di.

¹³ Mbu nơm ăn Păng chiă uănh rplay neh? Mbu nơm njêng Păng kôranh chiă uănh lĕ neh ntu?

¹⁴ Tơlah Păng knŏng mĭn rvê êng ma Păng nơm, Sŏk sĭt huêng brah jêh ri n'hâm nsôr ma Păng,

¹⁵ Pôri lĕ rngôch phung nglay săk mra khĭt ndrel, Jêh ri kon bunuyh plơ̆ sĭt ma ndruyh neh.

¹⁶ Tơlah may gĭt rbăng, iăt hom nau aơ; Rkêng hom tôr iăt nau gâp ngơi.

¹⁷ Bunuyh rmot nau di mâm dơi jêng kôranh chiă uănh? May dơi rmal Nơm sŏng srăng jêh ri geh nau brah lĕ?

¹⁸ Geh lĕ bunuyh kuăl hađăch jêng: ‘Ndơ dơm dam’ Mâu lah kuăl phung kôranh toyh jêng: ‘phung djơh mhĭk’ lĕ?

¹⁹ N'hơn lah Nơm mâu gŭ nding mpeh ma phung kôranh, Mâu lĕ uănh khlay ma phung ndrŏng âk lơn ma đah phung o ach, Yorlah lĕ rngôch bơh ti Păng rhăk njêng da dê.

²⁰ Tâm ƀât lât, klong măng khân păng khĭt da dê; Phung ƀon lan n'gơ n'găr jêh ri khĭt roh, Phung dăng rai lôch đŏng ƀiălah mâu bơh ti kon bunuyh ôh.

²¹ Yorlah măt Păng kâp uănh trong kon bunuyh, Păng saơ ăp nhuat khân păng chuat.

²² Mâu lĕ geh ntŭk ngo klĕng mâu lah măng ngo vêt vê. Gay ăn ma nơm mhĭk dơi krap.

²³ Brah Ndu mâu hôm khăch ôp sek kon bunuyh đŏng ôh, Khân păng mra văch panăp măt Păng gay dơn nau phat dôih.

²⁴ Mâu ŭch ôp sek, Păng ƀư rai phung ktang, Jêh nây njêng bu êng hao ntrok.

²⁵ Yorlah Kôranh Brah gĭt lĕ kan khân păng ƀư, Bri măng, Păng lơh rlâm khân păng jêh ri khân păng roh rai.

²⁶ Kôranh Brah rmal khân păng nâm bu bunuyh djơh mhĭk, Mpơl tanăp măt lĕ rngôch bunuyh,

²⁷ Yorlah khân păng dun tĭng Kôranh Brah, Mâu mĭn rvê ôh lĕ rngôch trong Păng.

²⁸ Khân păng ƀư ma phung o ach lŭng nter tăng tât ma Kôranh Brah, Jêh ri Păng iăt nteh nhĭm bơh phung rêh ni.

²⁹ Lah Păng gŭ rklăk, mbu nơm dơi phong Păng? Lah Păng pôn muh măt, mbu nơm dơi saơ Păng? Nđâp lah Păng hôm mât uănh ăp phung ndŭl mpôl mâu lah ăp nau rêh bunuyh,

³⁰ Mâu ăn ôh bunuyh mâu geh nau chroh chiă uănh, Mâu lah phung ŭch sân dăk phung ƀon lan.

³¹ Yorlah mâp geh lĕ bunuyh lah ma Brah Ndu pô aơ: ‘Gâp hŏ dơn jêh nau nduyh nkra, gâp mâu mra ƀư mhĭk đŏng ôh.

³² Dăn Kôranh ntĭm nti ma gâp moh nau gâp mâu saơ; Tơlah gâp hŏ ƀư tih, gâp mâu mra ƀư đŏng ôh’?

³³ Lah pônây tĭng ma may, Brah Ndu geh nau har lĕ? Ƀiălah may mâu hŏ ŭch rmal nau tih, Jêng may nơm mra săch, mâu di gâp ôh; Pôri may ngơi hom moh nau may gĭt.

³⁴ Phung gĭt rbăng mra lah ma gâp, Phung blau mĭn dôl gŭ iăt nau gâp mra ngơi pô aơ:

³⁵ ‘Y-Yôp ngơi mâu geh nau gĭt vât, Nau păng ngơi mâu geh nau gĭt rbăng.’

³⁶ Gay ma Y-Yôp dơn nau rlong uănh kŏ tât lôch, Yorlah nau păng plơ̆ lah nâm bu phung bunuyh djơh mhĭk;

³⁷ Păng hŏ ntop jêh nau tih tâm rdâng tâm nau tih păng, Tap ti gơm mpray nau rêh ta nklang phung he, Jêh ri lơ hâu ntop nau sưr rlau đah Brah Ndu.”