Ndrom Samƀŭt bơh Yôp 33 - Nau Brah Ndu Ngơi 2023

Y-Êlihu lah pô aơ nau ueh uĭn mâu lah nau mhĭk bơh Brah Ndu da dê

¹ “Ƀiălah aƀaơ ri, hơi Y-Yôp rkêng tôr iăt hom lĕ nau gâp lah. Iăt n'hêl hom moh nau gâp lah.

² Aƀaơ ri, gâp hŏ ntơm ngơi, Mpiăt tâm mbung gâp hŏ ngơi.

³ Nau gâp ngơi ma nau di tâm nuih n'hâm gâp; Trôm mbung gâp ngơi nau gĭt rbăng du nau nanê̆ ngăn.

⁴ Huêng Brah Brah Ndu rhăk njêng jêh gâp, N'hâm nsôr bơh Nơm Geh Lĕ Nau Brah ăn ma gâp nau rêh.

⁵ Tơlah dơi, ăn may plơ̆ lah hom ma gâp; Ăn ndrăp hom nau di, djôt nâp trong di gay ơh ngơi đah gâp!

⁶ Tanăp măt Brah Ndu may ndrel gâp mâu jêng êng ôh; Gâp tâm ban lĕ bu mon njêng tă bơh neh uk.

⁷ Gâp mâu geh nau klach ôh ƀư ăn may klach krit, Mâu lĕ geh ndơ jâk n'grŭn mpet may.

⁸ N'hêl nê̆ may hŏ ngơi jêh tâm tôr gâp, Gâp hŏ tăng jêh nau may ngơi pô aơ:

⁹ ‘Gâp kloh rsang, mâu geh ôh nau ƀư tih; Gâp mâu geh nau tih, mâu prăp ôh nau djơh mhĭk tâm nuih n'hâm.

¹⁰ Ƀiălah Brah Ndu joi nau ƀư mhĭk ma gâp, Uănh gâp nâm bu nơm rlăng đah Păng;

¹¹ Păng nkông lơi jâng gâp, Jêh ri gak uănh lĕ trong gâp hăn.’

¹² Gâp ŭch lah pô aơ, tâm ntil nau aơ may hŏ tih jêh, Yorlah Brah Ndu jêng dŭt toyh lơn ma kon bunuyh.

¹³ Mâm ƀư may tâm rlăch đah Păng? Păng mâu ŭch rblang ôh lĕ nau Păng ƀư?

¹⁴ Yorlah Brah Ndu ntĭm nti tâm nau nây mâu lah nau ƀaƀă, Ƀiălah kon bunuyh mâu ŭch nklân ôh nau nây.

¹⁵ Mâu lah tâm nau mbơi, tâm nau tâm saơ dôl măng, Nôk bu lêt bê̆ch, Lah dôl hăk bê̆ch ta klơ gre păng;

¹⁶ Nôk nây, Păng pơk trôm tôr kon bunuyh, Tâp pŏng lĕ Nau ntăm nti,

¹⁷ Gay têk kon bunuyh bơh nau khân păng mĭn ŭch ƀư, Jêh ri djôt prăp khân păng bơh nau sưr rlau.

¹⁸ Gay rklaih huêng khân păng dơi klaih bơh ntu jru, Jêh ri nau rêh khân păng klaih bơh đao.

¹⁹ Kon bunuyh mra geh nau nduyh nkra, ma nau ji nđêh nji klơ gre bê̆ch păng, Nting nđăng râm nsâr mro mrăng.

²⁰ Khân păng tâm rmot ma ndơ sông sa, Mâu kơnh ôh lĕ ndơ sa kah.

²¹ Săk jăn păng rgay rdjoh kŏ tât uănh mâu hôm jêng bunuyh, Rgay rkom hôm e ntâu ndop nting.

²² Huêng lĕ mphâk tât ta meng ntu jru, Nau rêh lĕ bu ntrôl tât êp meng nau khĭt.

²³ Tơlah tâm khân păng geh du huê tông mpăr, Knŏng ŭch du huê dơm tâm rbăn tông mpăr, Jêng nơm gŭ vah vang gay ntĭm nti kon bunuyh gĭt nau sŏng,

²⁴ Yô̆ nđach ma bunuyh nây jêh ri vơh vơl: ‘Dăn mât mơh păng lơi ăn tŭp tâm ntu jru; Gâp hŏ joi jêh rnoh tâm chuai;

²⁵ Ntâu mlay bunuyh nây mra nse tay nâm bu dôl hôm ndăm. Nau dăng n'hâm plơ̆ jêng mhe tay nâm bu hôm ndăm.’

²⁶ Păng mbơh sơm ma Brah Ndu jêh ri Păng dơi treng uănh, Ƀư ăn ma păng răm rhơn lah saơ muh măt Păng, Jêh ri Brah Ndu ăn jêng mhe tay ma păng yorlah nau sŏng srăng bơh păng.

²⁷ Bunuyh nây mra mprơ tanăp kon bunuyh pô aơ: ‘Gâp hŏ ƀư tih jêh ri nkê̆ch ăn kue nau sŏng, Ƀiălah mâu geh ôh nau rmal nâm bu nau gâp mra dơn.

²⁸ Brah Ndu tâm rklaih jêh huêng gâp dơi rklaih bơh tŭp ta ntu jru, Jêh ri nau rêh gâp mra saơ nau ang.’

²⁹ N'hêl nê̆ Brah Ndu hŏ ƀư lĕ nau nây Ăn ma kon bunuyh tât bar tơ̆ mâu lah pe tơ̆,

³⁰ Djôt leo huêng khân păng luh bơh ntu jru, Gay ma khân păng saơ nau ang ma nau rêh.

³¹ Hơi Y-Yôp iăt hom nau gâp; Gŭ klêm hom pôri gâp mra ngơi.

³² Tơlah may geh nau ŭch tâm ơh ngơi đah gâp; Ngơi hom, yorlah gâp ŭch mbơh nkoch may jêng sŏng srăng.

³³ Tơlah mâu, iăt hom nau gâp; Gŭ klêm hom pôri gâp mra ntĭm ma may nau blau mĭn.”