Ndrom Samƀŭt bơh Yôp 32 - Nau Brah Ndu Ngơi 2023

Nau Y-Êtihu tâm dun, jêng du huê mĭt jiăng hôm mom lơn ma Y-Yôp

¹ Rnôk nây, pe nuyh mĭt jiăng ri rlu jêh nau plơ̆ lah ma Y-Yôp yorlah Y-Yôp kơp ma păng nơm jêng sŏng srăng.

² Y-Êlihu, kon bu klâu Y-Barakel bunuyh Busi, tă bơh ndŭl mpôl Ram, hao ji nuih. Păng ji nuih ma Y-Yôp yorlah Y-Yôp kơp păng nơm jêng sŏng srăng lơn ma Brah Ndu.

³ Y-Êlihu hao ji nuih ma pe nuyh mĭt jiăng Y-Yôp yorlah khân păng mâu dơi joi nau plơ̆ sĭt lah tay ma Y-Yôp knŏng gĭt kachŭt nau tih ma Y-Yôp.

⁴ Y-Êlihu gŭ kâp gay plơ̆ lah ma Y-Yôp, yorlah phung nây lĕ bu ranh da dê rlau lơn ma păng.

⁵ Ƀiălah tơlah saơ pe bunuyh ri mâu hôm ngơi đŏng ôh pôri Y-Êlihu hao ji nuih.

⁶ Y-Êlihu, kon bu klâu Y-Barakel bunuyh Busi, plơ̆ lah: “Gâp hôm ndăm Khân may lĕ bu ranh jêh; Yor nây gâp mâu nănh, klach ngăn Lah mpơh nau gâp mĭn ma khân may.

⁷ Gâp mĭn êng: ‘Bunuyh bu ranh mra ngơi, Nơm gŭ rêh jŏ năm mra ntĭm nau blau mĭn.’

⁸ Ƀiălah huêng yơh gŭ tâm kon bunuyh, Jêng n'hâm nsôr tă bơh Nơm Geh Lĕ Nau Brah mơ ăn ma khân păng nau gĭt rbăng.

⁹ Mâu di ôh bunuyh bu ranh geh nau blau mĭn da dê, Lĕ bunuyh rêh jŏ năm mbu dơi gĭt đŏng nau sŏng.

¹⁰ Yor nau nây gâp lah: ‘Iăt hom ma gâp; Ăn gâp dơi nkoch mbơh nau gâp mĭn.’

¹¹ Aơ, gâp hŏ gŭ kâp nau mĭn bơh khân may, Gâp kâp iăt ma nau tâm dun bơh khân may, Dôl nôk khân may ŭch joi nau ngơi.

¹² Gâp hŏ rkêng iăt nau khân may, Ƀiălah mâu geh ôh du huê tâm khân may joi nau lah, Mâu lah dơi plơ̆ lah ma nau di Y-Yôp ngơi.

¹³ Lơi ta gơnh ngơi: ‘He hŏ dơi jêh joi nau blau mĭn.’ Brah Ndu mra dun ma Y-Yôp mâu di ôh ma kon bunuyh.

¹⁴ Y-Yôp mâu tâm rlăch ôh đah gâp, Pôri gâp mâu mra sŏk nau di khân may gay ma tâm plơng tay.

¹⁵ Khân păng hih rhâl, mâu hôm dơi ngơi đŏng ôh; Khân păng hŏ lĕ nau ngơi.

¹⁶ Mâu lah gâp gŭ kâp lah khân păng mâu ngơi, Hôm gŭ srŭng ta nây jêh ri mâm mâu plơ̆ lah du ntil nau?

¹⁷ Tât nôk gâp, gâp mra plơ̆ lah; Gâp mra nkoch đŏng nau mĭn gâp.

¹⁸ Yorlah gâp lĕ bêng jêh nau ngơi, Huêng tâm gâp nsŭk nsôr gâp.

¹⁹ Aơ, nuih n'hâm gâp nâm bu ndrănh mâu hŏ pơk, Ndrăp ma dăch prih nâm bu nông ndrănh mhe.

²⁰ Gâp mra ngơi gay dơi n'gơch rhơr; Yor ri gâp mra ngơi plơ̆ lah.

²¹ Gâp mâu ôh mra gŭ nding mpeh ma du huê. Mâu lĕ koh ma du huê bunuyh.

²² Yorlah gâp mâu blau ôh ngơi n'hi; Tơlah ƀư pônây, Nơm Rhăk Njêng gâp mra ƀư rai gâp gơnh ro.”