Ndrom Samƀŭt bơh Yôp 31 - Nau Brah Ndu Ngơi 2023

Y-Yôp n'gang đŏng nau song bơh păng nơm

¹ “Gâp hŏ jêng nau tâm rnglăp jêh đah măt gâp; Mâm ƀư gâp hôm dơi janh uănh ma du huê bu ur druh?

² Brah Ndu klơ trôk moh ndơ pă ăn ma gâp? Moh drăp ndơn gâp geh tă Nơm Geh Lĕ Nau Brah dŭt prêh?

³ Di lĕ nau mhĭk knŏng prăp ma phung djơh mhĭk, Jêh ri nau rêh ni ăn ma nơm janh ƀai?

⁴ Mâu di bơh Păng vay saơ trong gâp hăn, Jêh ri kơp ăp nhuat jâng gâp ƀơh?

⁵ Tơlah gâp geh hăn trong ma nau mƀruh nklă, Jêh ri jâng gâp chuat ndal tât ntŭk nau ndơm;

⁶ Dăn Brah Ndu yơk njing gâp ta klơ du mlâm njing di, Pôri Păng mra saơ nau sŏng gâp.

⁷ Tơlah jâng gâp chuat der bơh trong di, Nuih n'hâm gâp tĭng ma ndơ măt gâp kơnh, Jêh ri ăn ti gâp krêp tâm nau ƀơ̆ ƀơch,

⁸ Pôri nơm êng mra geh kao play gâp srih, Jêh ri moh ndơ gâp tăm bu mra rôk lơi!

⁹ Tơlah nuih n'hâm gâp tŭp nau bu ur ndơm, Mâu lah grem kâp ta mpông ngih nơm chiau meng,

¹⁰ Pôri ur gâp mra hăn kĭn mpăl ma nơm êng, Jêh ri nơm êng mra pit in ur gâp.

¹¹ Nây jêng du ntil nau tih mhĭk tâm rmot ngăn, Khư ma phung kôranh phat dôih tâm rmal:

¹² Nau tih tâm lâm su hit nâm bu ŭnh tâm ndrung ŭnh, Ŭnh sa ƀhiau tât tơm lĕ rngôch kao play gâp geh.

¹³ Tơlah gâp dun jêh nau di ma oh mon bu ur mâu lah bu klâu gâp, Moh nau khân păng ŭch phong ma gâp,

¹⁴ Pôri mâm gâp mra ƀư tơlah Brah Ndu du dâk? Nôk Păng ôp ma gâp, mâm gâp mra plơ̆ lah?

¹⁵ Nơm rhăk njêng gâp tâm trôm ndŭl me gâp, mâm mâu rhăk njêng khân păng? Mâm mâu di knŏng geh du huê Nơm rhăk njêng he tâm trôm ndŭl me?

¹⁶ Tơlah gâp dun nau phung o ach ŭch, Ƀư ăn măt phung bu ur ndrô huănh,

¹⁷ Tơlah gâp sa ƀănh êng du huê gâp, Jêh ri kon đơi mâu dơi tâm pă;

¹⁸ Ntơm bơh hôm mom ndăm, gâp hŏ mât rong kon dơi nâm bu du huê mbơ̆; Ntơm bơh luh bơh ndŭl me, gâp hŏ kơl jêh bu ur ndrô.

¹⁹ Tơlah gâp saơ mbu nơm bơi ma khĭt yor mâu geh bok ao, Mâu lah phung o ach mâu geh phôi ntâk,

²⁰ Pôri nuih n'hâm khân păng mra ăn nau ueh uĭn ma gâp, Yorlah bơh rsau biăp gâp khân păng dơi geh nau răm.

²¹ Tơlah gâp yơr ti gay ƀư nhhu phung kon đơi, Yorlah gâp saơ gâp nơm geh nau bu kơl ta mpông ƀon,

²² Pôri dăn ăn bôk gâp tăch bơh trô ko, Jêh ri ti gâp pă tăch bơh nting chiăng.

²³ Yorlah nau mhĭk tât bơh Brah Ndu ƀư ăn gâp krit klach, Tanăp nau rnam Păng, gâp mâu dơi ƀư ôh.

²⁴ Tơlah gâp nsing ma mah, Mâu lah kuăl mah chrêk jêng ntŭk gâp nsing rnơm;

²⁵ Tơlah gâp răm rhơn yor geh âk drăp ndơ, Jêh ri tâm ti gâp geh ndơ âk ngăn ngên;

²⁶ Tơlah gâp treng uănh nar nchrat ang, Uănh khay luh mpơl nchrang lơ vơ.

²⁷ Tơlah nuih n'hâm gâp geh nau khân păng ndơm, Jêh ri ndop ti gay ŭch yơk mbah ma ndơ nây,

²⁸ Nau nây hŏ jêng nau djơh khư ma phung kôranh phat dôih tâm rmal, Yor gâp hŏ chalơi jêh Brah Ndu dŭt prêh klơ.

²⁹ Hŏ geh gâp răm maak nôk phung tâm rmot ma gâp geh nau rêh ni, Jêh ri răm rhơn lah geh nau mhĭk tât ma păng;

³⁰ Ƀiălah, gâp mâu ăn ôh mbung gâp ƀư tih, Ƀiălah sŏk nau rak rtăp gay ƀư mhĭk nau rêh păng;

³¹ Tơlah phung bunuyh tâm ngih gâp mâu mâp lah ôh: ‘Mbu nơm gŭ ta aơ dĭng lah mâu geh sa puăch ăn hơm mpay?’

³² Bu năch mâu geh ôh bê̆ch măng ta rŏ trong; Gâp hŏ pơk jêh mpông vơt bu năch trong ngai.

³³ Tơlah gâp pôn mo nau tih gâp nâm bu Y-Ađam, Ndâp mpôn nau djơh mhĭk gâp tâm trôm nuih n'hâm,

³⁴ Knŏng yor klach phung âk, Klach lah mpôl băl mưch rmot, Kŏ tât gŭ klăk klêm mâu janh hăn luh du padih mpông.

³⁵ Ơ! Ŭch ma geh bunuyh iăt gâp! Aơ jêng nau gâp nglĕ dŭt! Dăn Nơm Geh Lĕ Nau Brah plơ̆ sĭt lah ma gâp! Dăn phung rlăng gâp nchih samƀŭt kachŭt nau tih gâp!

³⁶ N'hêl nanê̆ gâp mra anh nau phong nây klơ nglik gâp, Ndô ta klơ bôk gâp nâm bu đon hađăch.

³⁷ Gâp mra mbơh ma Kôranh Brah lĕ rngôch nhuat gâp hăn; Nâm bu du huê hađăch, gâp mra văch tanăp Păng.

³⁸ Tơlah neh gâp nter phong gâp, Ăp mbor kai păng nhĭm ndrel n'grŭp;

³⁹ Tơlah gâp sa play păng ƀiălah mâu mplơ̆ prăk, Ăn nau khĭt ăn ma nơm tơm păng,

⁴⁰ Pôri ăn pôm lok hon ntrok ba ƀlê, Jêh ri gơ̆ mhĭk ntrok ma ba ôrgơ!” Tât ta aơ nau Y-Yôp ngơi lôch jêh.