Ndrom Samƀŭt bơh Yôp 30 - Nau Brah Ndu Ngơi 2023

¹ “Ƀiălah aƀaơ ri phung ndăm lơn ma gâp mưch rmot gâp, Phung chô yau khân păng jêng phung gâp hŏ uănh mâu khlay, Mâu dăp ndrel ma phung so chiăp biăp gâp.

² Nau dăng bơh khân păng moh nau khlay ăn ma gâp, Lah nau dăng khân păng mâu hôm ôh?

³ Lĕ rgay rkom yor ji ngot ji hir jêh ri mâu tŏng geh, Khân păng sa hot neh sơh tâm bri rdah ngo kleng lĕ rai.

⁴ Khân păng pĕ biăp n'ha kêng rlô gơ̆, Jêh ri kuyh reh tơm si lok n'ho ƀư ndơ sa.

⁵ Bu mprơh khân păng tă bơh phung ƀon lan khân păng; Bu rgât grap nâm bu du huê nơm ntŭng.

⁶ Khân păng rêh tâm ăp bong dak n'hor, Tâm ăp trôm jru jêh ri ta nklang ăp rkâp lŭ.

⁷ Khân păng lŭng nter ta nklang pŭm tơm si, Tâm nchep tâm dâng pŭm lok lĕ nkoih.

⁸ Jêng kon bơh bunuyh rluk, sau bơh nơm mâu amoh săk, Bu mprơh lơi khân păng luh bơh n'gor.

⁹ Bi aƀaơ ri, kon sau khân păng bu mprĭng mprơ ma nau ntêh rmot, Djôt leo gâp jêng ndơ gay ma gơm mưch.

¹⁰ Khân păng tâm rmot gâp, der ngai ma gâp, Soh dak diu tâm muh măt gâp mâu chrê đê̆ ro.

¹¹ Yorlah Brah Ndu hŏ doh rse na gâp jêh ri ƀư bêk prêng gâp, Yor ri khân păng uănh ma gâp mâu hôm jêng khlay đŏng ôh.

¹² Mpeh pa ma gâp, phung dơm dam tâm rdâng; Khân păng ƀư dăk sân jâng gâp, Ƀư trong ma gâp tŭp tâm nau rêh ni.

¹³ Khân păng ƀư rai trong gâp du luh, Nsrôih tĭng nkhĭt gâp; Mâu ŭch geh bunuyh kơl khân păng.

¹⁴ Khân păng luh tă bơh du trôm ntu toyh, Hăn rlet ntŭk rlâm rai jêh.

¹⁵ Âk nau klach krit nhhu tât ma gâp; Nau khưm gâp nâm bu sial khôm rdu, Nau gâp kâp gân roh tĭng ndâr tŭk.

¹⁶ Aƀaơ ri huêng gâp rŭng răng tâm trôm gâp, Lĕ nar rêh ni nchueng jŭm gâp.

¹⁷ Bri măng geh nau ji tât ma nting gâp, Nau ji sa hot gâp mâu rlu ôh.

¹⁸ Đah nau dăng dŭt toyh, Păng kuăn ao gâp; Kuăn rdâng gâp nâm bu kuăn trô ko ao.

¹⁹ Brah Ndu mƀăr gâp tâm dak bŏk, Gâp jêng nâm bu ndruyh ŭnh buh.

²⁰ Gâp kuăl dăn ma Kôranh Brah, ƀiălah Păng mâu plơ̆ lah; Gâp vơh vơl ƀiălah Păng knŏng uănh gâp dơm.

²¹ May plăch jêng nau ƀư djơh đah gâp, Dŏng nau dăng ti May ƀư mhĭk ma gâp.

²² May chông gâp hao ăn gâp ncho sial ndăng, Klŭp gâp tâm ntŭk phŭt sial vănh blông.

²³ Gâp gĭt Kôranh Brah mra njŭn leo gâp lăp nau khĭt, Jêng ntŭk tâm nal ăn ma lĕ rngôch bunuyh rêh.

²⁴ Gâp mâu hŏ mâp ƀư nau mhĭk ma bunuyh rêh ni, Mâu lah ƀư bem lah khân păng kuăl kơl nau rêh ni.

²⁵ Gâp mâu hŏ prot nhĭm đah bunuyh mâp nau jêr, Jêh ri mâu hĕ geh du ai rŏng ma bunuyh o ach?

²⁶ Ƀiălah nôk gâp gŭ kâp nau ueh, nkhơng ma nau mhĭk văch; Gâp kâp gân nau ang ƀiălah nau ngo nkhơng văch tât.

²⁷ Nuih n'hâm gâp rlĭ rlang mâu geh nau rlu ôh; Ăp nar nau rêh ni văch mpet tât ma gâp.

²⁸ Gâp chuat hăn tâm nau ngo, mâu geh ang nar; Ta nklang phung tâm rƀŭn, gâp dâk kuăl rklaih.

²⁹ Gâp jêng oh nâu ma so bri, Mĭt jiăng ndrel sĭm ôtrus.

³⁰ Ntâu săk gâp rlơ̆ jêng krăk jêh ri plôk rŭng rsiap, Ntĭng nđăng gâp gring tâm nau duh.

³¹ Yor ri, gong rêng loih gâp ngloh nteh nau rngot klâng, Nteh n'hôm gâp luh nau nhhiăng nhĭm.”