Ndrom Samƀŭt bơh Yôp 3 - Nau Brah Ndu Ngơi 2023

Y-Yôp rak rtăp nar deh păng nơm

¹ Jêh nau nây, Y-Yôp hă mbung rak rtăp nar deh păng nơm.

² Y-Yôp ngơi:

³ “Ŭch ăn nar bu deh ma gâp rai lơi, Jêh ri măng bu hŏ mbơh ma du huê kon bu klâu dơi ntreo tâm ban lĕ!

⁴ Ŭch ăn ma nar nây jêng ngo klĕng, Brah Ndu bơh ntŭk prêh klơ mâu treng uănh ôh Jêh ri nau ang mâu lĕ sol klơ păng!

⁵ Ŭch ma nar nây nkŭm tâm nau ngo klĕng jêh ri gui nau khĭt, Tŭk krăk nkŭm ta păng Jêh ri măng lĭng ƀư ma păng klach krit!

⁶ Ŭch ma nau ngo vêt vê chuê chuăng kuăn rdâng păng, Mâu ăn bu kơp păng lăp ăp nar tâm năm, Mâu kơp păng lăp tâm ăp khay!

⁷ Nanê̆, măng nây jêng măng mâu deh nse, Mâu mâp tăng bâr troh maak!

⁸ Ŭch ăn ma mbu nơm hŏ rak rtăp nar nây Jêh ri geh phung blau rlay Lêviathan Rak rtăp măng nây đŏng!

⁹ Ăn lĕ rngôch mănh mbing ôi taơ jêng ngo klĕng, Măng kâp nau ang tâm nau mâu hôm kâp gân Mâu saơ luh ƀring ang ôi!

¹⁰ Yorlah tâm măng nây mâu hŏ nchăng ndŭl mê̆ gâp Gay pôn nau nđêh nji bơh măt gâp.

¹¹ Mâm ƀư gâp mâu khĭt ro nôk mhe deh, Mâu tăch n'hâm dôl nôk mhe luh bơh ndŭl mê̆?

¹² Mâm ƀư geh kômâk kơl gâp Jêh ri toh ăn gâp pu?

¹³ Tơlah mâu pôri aƀaơ gâp hŏ lâng klăk klêm, Dơi gŭ rlu hăk bê̆ch

¹⁴ Nđâp phung hađăch jêh ri kôranh tâm nchră ta neh ntu Hŏ ndâk njêng jay ndah ma khân păng nơm,

¹⁵ Mâu lah ndrel phung kôranh chiă uănh N'hanh prăk mah bun bêng ngih khân păng.

¹⁶ Mâm ƀư gâp mâu dơi tâp ndâp nâm bu rlêh ndŭl, Nâm bu du huê oh bê mhe deh ê hŏ mâp saơ ôh nau ang?

¹⁷ Ta nây phung ƀai lĕ bah ƀư rkhŭk. Bunuyh huăr hươi dơi gŭ rlu.

¹⁸ Phung bu nă rlu ndrel n'grŭp đăp mpăn, Mâu hôm tăng nau kôranh ndrung rgât grap.

¹⁹ Bunuyh toyh phung jê̆ jêng tâm ban da dê, Jêh ri bunuyh dĭk bu dơi jêng kon me luh bơh kôranh păng.

²⁰ Mâm dĭng phung rêh ni dơi ăn nau ang, Jêh ri phung geh nuih n'hâm rngot rvê dơi ăn nau rêh?

²¹ Khân păng ŭch khĭt ƀiălah mâu ôh dơi khĭt, Joi nau khĭt âk lơn ma đah joi ndơ khlay

²² Khân păng maak răm rhơn Nuih n'hâm hâk răm lah dơi joi saơ môch.

²³ Mâm ƀư păng lĕ nking ndâp trong hăn, Lĕ Brah Ndu de nchueng jŭm păng puăn njônh, Mâm hôm dơi ăn nau ang jêh ri nau rêh?

²⁴ Yor ƀănh gâp sa knŏng jêng nteh bâr nsôr jong; Nau gâp lŭng nter bêng ler nâm bu dak.

²⁵ Nau gâp klach krit hŏ văch tât ma gâp, Ntil gâp klach krit ngăn hŏ nkhŭt tâm gâp!

²⁶ Gâp mâu geh ôh đăp mpăn, mâu saơ đŏng nau đăp rmên, Mâu dơi geh rlu, yor nau rŭng răng toyh nchueng jŭm!”