Ndrom Samƀŭt bơh Yôp 29 - Nau Brah Ndu Ngơi 2023

Nau Y-Yôp tâm dun nglĕ dŭt

¹ Y-Yôp ngơi tâm dun đŏng:

² “Ơ! Ŭch ma gâp dơi rêh nâm bu nôk lor, Nâm bu lĕ nar Brah Ndu mât mray gâp;

³ Lah ŭnh kađen Kôranh Brah sol ang klơ bôk gâp, Jêh ri yor tă nau ang Păng gâp hăn rgăn lĕ nau ngo klĕng.

⁴ Lah gâp hôm mom ndăm, Jêh ri nau rŏng mĭt jiăng bơh Brah Ndu nkŭm ngih bok gâp;

⁵ Lah Nơm Geh Lĕ Nau Brah gŭ ndrel gâp, Jêh ri phung kon gŭ jŭm gâp;

⁶ Lah jâng gâp rao tâm dak toh, Jêh ri mpăl lŭ njach dak ngi ăn ma gâp nâm bu dak n'hor!

⁷ Lah gâp hăn luh tât ta mpông ƀon, Jêh ri nkra ntŭk gŭ ta nklang ntŭk pâl rlưn,

⁸ Phung ndăm saơ gâp rŭch plơ̆ da dê, Phung bu ranh dâk vơt mbah;

⁹ Phung kôranh chiă uănh ngơi njrăng, Jêh ri sŏk ti rdêp mbung;

¹⁰ Phung bu yơk gŭ rklăk, Mpiăt khân păng nâm bu krêp lăp tâm trôm mbung jêh.

¹¹ Mbu tôr tăng bơh gâp, rnê gâp geh nau ueh uĭn da dê, Mbu măt saơ gâp mbơh an ma gâp da dê.

¹² Yorlah gâp kơl rklaih phung o ach dôl gŭ nter, Jêh ri phung kon đơi mâu geh nơm sâm kơl.

¹³ Bunuyh ndrel tâm nau rêh ni lĕ dăch khĭt hôm ăn nau ueh uĭn ma gâp, Gâp ƀư an nau mprơ hâk răm ăn hao tâm nuih n'hâm bu ur ndrô.

¹⁴ Gâp nsoh nau sŏng srăng nâm bu du blah ao, Sŏk nau sŏng ƀư ao jâr jêh ri môk.

¹⁵ Gâp ƀư bar đah măt ma bunuyh chieh măt, Jêh ri ba đah jâng ma bunuyh rvĕn.

¹⁶ Gâp jêng mbơ̆ phung o ach, Phat dôih nau di ma phung bu năch.

¹⁷ Gâp nkê̆ch pă nting kang phung mâu sŏng, Jêh ri mphâk lơi mpa bơh neng păng.

¹⁸ Nôk nây, gâp lah êng: ‘Gâp mra khĭt tâm rsuăn, Nar khay gâp mra âk nâm bu choih;

¹⁹ Reh gâp hung tât ăp tu dak, Jêh ri dak tŭk ăp măng kăr ta n'gĭng gâp;

²⁰ Nau chrêk rmah gâp jêng ndrêh mhe ƀaƀơ, Nau dăng gâp dơi njêng mhe tay.’

²¹ Bu rkêng tôr iăt nau gâp ngơi jêh ri gŭ kâp, Gŭ rklăk iăt nau gâp nchră.

²² Lôch jêh gâp ngơi, mâu hôm geh bunuyh ngơi đŏng ôh, Nau gâp ngơi nâm bu ntruh dak tŭk tŭp ta khân păng.

²³ Khân păng gŭ kâp gâp nâm bu gŭ kâp dak mih, Hă trôm mbung gŭ kâp nâm bu dơ dak mih yan kao.

²⁴ Gâp gơm rum đah khân păng lah khân păng roh nau rnơm, Muh măt gâp maak n'hao nuih khân păng.

²⁵ Gâp săch trong hăn ăn ma khân păng jêh ri chiă uănh khân păng, Gŭ rêh nâm bu hađăch ta nklang phung tahan păng, Nâm bu nơm bonh leng phung nhĭm nhhiăng.”