Ndrom Samƀŭt bơh Yôp 28 - Nau Brah Ndu Ngơi 2023

Y-Yôp mprơ tâm rnê nau blau mĭn Brah Ndu

¹ “N'hêl nanê̆ dơi geh ntŭk gay ma sŏk prăk, Geh ntŭk gay ma krĕt mah.

² Loih bu sŏk tă tâm neh, Kông lêk luh tă bơh lŭ gŭch krĕt.

³ Bu sol tâm ntu ngo, Tĭng joi kŏ tât dŭt, Gay sŏk lŭ bơh ntŭk ngo klĕng vêt vê.

⁴ Khân păng kuyh lĕ trong tâm dâng neh ngai đah ntŭk geh bunuyh gŭ; Tâm ntŭk mâu geh bunuyh hăn tât ta nây; Khân păng yông nchah yông yai, ngai đah bunuyh.

⁵ Neh luh du ndơ sông sa, Ƀiălah tâm dâng neh nâm bu geh tâm pot ŭnh.

⁶ Tâm lŭ geh lŭ khlay Saphir, Tâm ndruyh neh geh mbuh mah.

⁷ Trong aơ, sĭm joi ndơ sa mâu dơi gĭt; Măt klang ƀŭng mâu prot mâp saơ ôh;

⁸ Lĕ mpa janh mâu mâp hăn tât, Yau mŭr mâu đŏng prot rgăn ta nây.

⁹ Ti kon bunuyh dong ta ka lơ lŭ ŭnh, Rlơk lơi yôk tât ta mbon păng.

¹⁰ Bu lôk trong tâm dâng neh lŭ leng bluh, Măt tĭng joi lĕ ntil ndơ khlay tâm trôm.

¹¹ Khân păng bât ntât nkân n'hor dak; Djôt leo tâm nau ang lĕ ndơ ndâp.

¹² Ƀiălah mbah ntŭk joi nau blau mĭn? Ta ntŭk nau gĭt rbăng gŭ?

¹³ Mâu geh ôh bunuyh gĭt lĕ rnoh khlay bơh nau blau mĭn; Păng mâu geh ta klơ neh phung rêh.

¹⁴ Brŏng jru lah: ‘Păng mâu gŭ ôh tâm gâp’, Dak mƀŭt lah đŏng: ‘Păng mâu gŭ ndrel gâp.’

¹⁵ Mah chrêk mâu dơi ôh rgâl păng, Mâu lĕ dơi njing prăk gay dơi rvăt păng.

¹⁶ Mâu dơi tâm rđĭl ôh rnoh khlay păng đah mah n'gor Ôphir, Đah lŭ khlay ônik mâu lah saphir.

¹⁷ Mah jêh ri nglăp nar mâm dơi tâm rđĭl đah păng. Ndơ dŏng ma mah mâu đŏng dơi rgâl păng.

¹⁸ Bi ma lŭ khlay tâm dâng dak rlai jêh ri rchŏk rsang lơi hôm ngơi; Rnoh khlay nau blau mĭn jêng khlay lơn ma lŭ rmah khlay.

¹⁹ Lŭ tôpas tă bơh n'gor bri Êthiôpi mâu dơi tâm rđĭl ôh đah păng, Mâu dơi đŏng veh rnoh khlay păng đah mah chrêk.

²⁰ Pôri nau blau mĭn mbah tă văch? Nau gĭt rbăng ntŭk tă luh?

²¹ Păng hôm pôn ndâp bơh măt phung rêh. Jêh ri pôn măt bơh phung sĭm mpăr klơ trôk.

²² Ntŭk brŏng jru jêh ri nau khĭt lah pô aơ: ‘Tôr hên tăng lư bu nkoch ma păng.’

²³ Brah Ndu gĭt rbăng trong hăn tât ta păng, Jêh ri gĭt nanê̆ ntŭk păng gŭ.

²⁴ Yorlah Păng uănh saơ tât ta bôl dŭt neh ntu, Jêh ri treng uănh lĕ rngôch ndơ tâm dâng trôk.

²⁵ Lah Păng ăn nau dăng ma sial, Jêh ri veh ndah dŭt ăn ma dak hŭch hao,

²⁶ Nkra nau vay ma mih, Tor trong hăn ma lơp nglaih;

²⁷ Rnôk nây Păng saơ nau blau mĭn jêh ri tâm mpơl ro păng, Păng njêng nâp nơm nây jêh ri sek uănh nanê̆ ngăn.

²⁸ Jêh nây Păng lah ma kon bunuyh: ‘Klach yơk ma Kôranh Brah, nây jêng nau blau mĭn; Der lĕ nau mhĭk, nây jêng nau gĭt rbăng.’ ”