Ndrom Samƀŭt bơh Yôp 27 - Nau Brah Ndu Ngơi 2023

Y-Yôp king n'gang nau di păng nơm, phung djơh kêng nglĕ dŭt rngot ngăn

¹ Y-Yôp nkoch mbơh đŏng nau tâm dun păng nơm:

² “Tâm amoh Brah Ndu gŭ rêh mro mrăng, Nơm hŏ sŏk jêh nau di gâp, Jêh ri Nơm Geh Lĕ Nau Brah, Nơm ƀư ma huêng gâp rngot ngăn ngên, Gâp sơm ton pô aơ:

³ Moh nar n'hâm nsôr hôm e tâm gâp, Jêh ri n'hâm rêh bơh Brah Ndu hôm gŭ tâm trôm muh gâp,

⁴ Trôm mbung gâp mâu mra ngơi ôh nau djơh mhĭk, Mpiăt gâp mâu đŏng ngơi nau ndơm.

⁵ Gâp mâu hŏ dơi lah khân may jêng di! Kŏ tât gâp khĭt mâu chalơi ôh nuih n'hâm sŏng gâp.

⁶ Gâp djôt nâp nau sŏng srăng mâu chalơi ôh; Lôch du njăr rêh gâp, nuih n'hâm mâu nduyh lah gâp.

⁷ Ŭch ma nơm rlăng gâp bu phat dôih nâm bu phung ƀai, Phung tâm rdâng đah gâp bu uănh nâm bu phung djơh mhĭk.

⁸ Mâm nau kâp gân phung mâu chroh lah păng bu ƀư rai jêh? Lah Brah Ndu joi tay huêng păng?

⁹ Brah Ndu hŏ iăt lĕ nau păng lŭng nter, Tơlah nau rêh ni nkhŭt jŭr ta klơ păng?

¹⁰ Păng geh lĕ nau hâk răm tâm Nơm Geh Lĕ Nau Brah, Jêh ri mbơh sơm ƀaƀơ ma Brah Ndu lĕ?

¹¹ Gâp mra ntĭm ma khân may ma nau brah Brah Ndu; Mâu pôn mo ma khân may nau mĭn Nơm Geh Lĕ Nau Brah ŭch ƀư.

¹² Lĕ rngôch khân may gĭt năl nau nây da dê jêh, Pôri mâm khân may hôm e ngơi lĕ nau ngơi dơm dam nâm bu pônây?

¹³ Aơ jêng nau Brah Ndu tâm nal ma nơm mhĭk, Jêh ri drăp ndơn Nơm Geh lĕ Nau Brah prăp ma phung janh ƀai:

¹⁴ Tơlah phung kon sau păng hao bĭk rơ̆ knŏng gay prăp ma tak đao; Noi deh păng mra sa mâu hơm.

¹⁵ Phung hôm klen gŭ rêh mra geh nau ji tưp tâp brôi. Ur ndrô khân păng kŏ tât mâu hôm dơi nhĭm nhhiăng ôh.

¹⁶ Nđâp lah păng prăp nkrem prăk rêl nâm bu ndruyh neh, Kho ao dăp bun nâm bu neh uk;

¹⁷ Păng rơm ndrăp ƀiălah phung sŏng srăng mra nsoh, Bi prăk rêl păng, phung mâu geh nau tih mra tâm pă ndrel.

¹⁸ Păng ndâk ngih nâm bu ntêng vĭl, Nâm bu nkơp ndâk ma bunuyh gŭ chăm đang krăk ƀâu.

¹⁹ Lah hăn bê̆ch păng hôm e geh nau ndrŏng, ê hŏ roh yot du ntil ndơ; Nôk lin măt nau kan lĕ rai roh jêh.

²⁰ Krit klach tât ndal nâm bu dak lip; Bri măng phŭt chuănh rdu păng.

²¹ Sial tă luh nar khôm n'hao păng hao jêh ri khôm n'ho roh; Sial khôm păng bơh ntŭk păng gŭ.

²² Chiông sial rpuh tât nau mhĭk toyh ta klơ păng mâu geh nau yô̆ nđach; Păng nsrôih nchuăt du bơh nau tât.

²³ Sial tap ti gơm mưch ma păng, Lŭng nter gay mprơh du păng luh bơh ntŭk păng gŭ.”