Ndrom Samƀŭt bơh Yôp 26 - Nau Brah Ndu Ngơi 2023

Y-Yôp tâm rnê nau brah jêh ri nau blau mĭn bơh Brah Ndu

¹ Y-Yôp plơ̆ sĭt lah:

² “May blau ngăn kơl nơm mâu geh nau dăng! Sâm rklaih ma nơm mâu geh ôh n'hâm suan!

³ Sâm chră ma nơm mâu geh nau blau mĭn, Jêh ri mpơl âk nau ntĭm ma nau gĭt rbăng!

⁴ Mbu nơm may rblang lĕ nau nây? Mbu moh huêng hŏ ngơi bơh mbung may?

⁵ Huêng phung khĭt râm nsâr tâm dâng ri, Dak jêh ri lĕ rngôch mpô mpa gŭ rêh tâm dak tâm ban lĕ.

⁶ Ƀon phung khĭt mpơl tanăp măt Brah Ndu, Ntŭk brŏng jru mâu geh ôh ndơ nkŭm.

⁷ Kôranh Brah lăk bri mpeh pa lơ tâm nkual ntŭk nsoih, Yông rplay neh ta ntŭk hŏng tâm trôk.

⁸ Păng nklâm dak tâm lĕ ndâr tŭk Păng, Ƀiălah ndâr tŭk mâu chah ôh yor dak nây.

⁹ Păng nkŭm klơ sưng hađăch Păng, Jêh ri drăng lăk ndâr tŭk Păng ta klơ nây.

¹⁰ Păng hŏ kach rup du rvang ta klơ mpiăt dak, Ta n'har vah vang nau ang jêh ri nau ngo.

¹¹ Ƀiălah lĕ n'gâng meh tâm lĕ ndâr trôk mpât n'gơ, Jêh ri hih rhâl lah Păng nduyh lah.

¹² Păng sŏk nau brah ƀư ăn rbuh dak mƀŭt gŭ rngân; Sŏk nau blau mĭn âk dong cha lôt Rahap.

¹³ N'hâm nsôr Kôranh Brah ƀư ma trôk nđôch kloh rsang; Ti Păng ntâp bluh bêh hung nchuăt du.

¹⁴ Aơ knŏng jêng kach rup ma nau kan Păng, Jêng nau ngơi ƀŭk dơm he dơi tăng ma nau Păng ngơi; Bi ma ndâr nglaih ma nau brah Păng, mbu dơi gĭt rbăng lĕ?”