Ndrom Samƀŭt bơh Yôp 24 - Nau Brah Ndu Ngơi 2023

Y-Yôp ngơi ƀrôk ma nau ƀư djơh tâm neh ntu

¹ “Mâm ƀư Nơm Geh Lĕ Nau Brah mâu nal nar phat dôih? Mâm ƀư bunuyh gĭt năl Păng mâu dơi saơ ôh nar nây?

² Phung djơh mhĭk trơn trong gĭt năl n'har bri, Sŏk ntŭng phung biăp jêh ri veng khân păng hăn sa.

³ Khân păng nhŭp seh bri bơh phung kon đơi, Veng êng ndrôk phung bu ur ndrô ƀư ndơ nchăm.

⁴ Khân păng ntrŭt phung o ach du luh bơh trong hăn, Ƀư ăn phung o ach ta n'gor bri tâm jă du krap.

⁵ Khân păng nâm bu seh bri tâm bri rdah, Mra dơn nau kan hŏt r'ah, Joi ndơ sa tâm bri rdah. Joi ndơ sông sa ma phung kon jê̆.

⁶ Khân păng rgum rhe kro tâm mir, Dônh mban play krăk ƀâu tâm đang phung ƀai.

⁷ Du măng kŏ ang khân păng bê̆ch kuh, mâu geh bok ao, Trôk ji kăt mâu geh phôi nah ntâk.

⁸ Khân păng bĕ yor mih sa tâm nkual yôk Khân păng gŭ ta mbot lŭ yorlah mâu geh ntŭk nde.

⁹ Phung ƀai pĭt sŏk nuyh kon đơi mbơ̆ dôl pu toh mê̆; Nhŭp kon bê phung o ach ƀư ndơ nchăm.

¹⁰ Phung o ach chuat hăn săk hưl mâu geh bok ao nsoh, Mbăk ba ta klơ nglik ƀiălah ndŭl ji ngot.

¹¹ Khân păng păt dak ngi ta nklang bar rlat lŭ, Jot krăk ƀâu tâm thŭng ƀiălah trô ko ji hir.

¹² Bơh nklang ƀon phung dăch khĭt gŭ vơl nđor, Phung sôt rmanh kuăl gay geh nau kơl; Ƀiălah Brah Ndu mâu uănh nau nây jêng nau tih phung ƀai.

¹³ Hôm geh đŏng bu êng tâm rdâng đah nau ang, Mâu gĭt năl ôh trong nau ang, Jêh ri mâu hăn tâm trong nau ang,

¹⁴ Trôk ê hŏ ang, phung nkhĭt bunuyh lĕ kah rngăl bê̆ch, Nkhĭt phung o ach jêh ri phung rêh ni. Lah lĕ măng jêh păng nâm bunuyh ntŭng.

¹⁵ Măt nơm tâm lâm gŭ kâp mông nsrŭp măng, Păng lah tâm nuih n'hâm: ‘Mâu geh du huê saơ gâp’; Jêh ri put ndâp muh măt păng nơm.

¹⁶ Tâm klong măng khân păng lôk mpir, Bi nôk nar khân păng du krap; Khân păng mâu gĭt mâm nau ang.

¹⁷ Đah khân păng, ang ôi jêng gui nau khĭt, Yorlah khân păng bên đah krit klach bơh gui nau khĭt.

¹⁸ Ƀiălah khân păng knŏng nâm bu ndơ mpŭnh klơ n'ha dak; Drăp ndơn khân păng tâm n'gor bu rak rtăp; Mâu hôm geh bunuyh lăp tâm đang krăk ƀâu khân păng đŏng ôh.

¹⁹ Trôk prăng phang jêh ri duh ƀư suăt lơi dak nâm pler lêk, Pôri ƀon phung khĭt ƀư suăt phung geh nau tih tâm ban pônây lĕ.

²⁰ Nuih n'hâm mê̆ mra chuêl khân păng; Phung rhai sa khân păng kah ngăn; Mâu hôm geh ôh bunuyh kah gĭt ma khân păng; Nau djơh mhĭk mra nkê̆ch pă nâm bu du tơm si kro.

²¹ Khân păng ƀư mhĭk ma bunuyh mâu bă kon, mâu deh kon; Gŭ ngao mhĭk ma bu ur ndrô.

²² Ƀiălah Brah Ndu sŏk nau brah Păng ƀư rai nơm janh ƀai; Lah Păng lơh, khân păng mâu hôm ôh kâp gân ma rêh.

²³ Brah Ndu ăn khân păng rêh ueh mpăn, nâp, Ƀiălah măt Păng tĭng rmiăng tâm lĕ trong khân păng.

²⁴ Khân păng geh nau bu n'hao knŏng ƀât lât dơm jêh nây roh hêng; Khân păng mra nhop kro jêh nây chah rai nâm bu gơ̆, Jêh ri bu rek nâm bu nkong ba.

²⁵ Tơlah nau gâp ngơi mâu di, pôri mbu dơi mbơh ăn nanê̆ gâp jêng du huê bunuyh ngơi mƀruh? Jêh ri mpơl nau gâp ngơi jêng mâu geh khlay?”