Ndrom Samƀŭt bơh Yôp 23 - Nau Brah Ndu Ngơi 2023

Y-Yôp dơi lah pô aơ păng nơm mâu geh tih ôh

¹ Y-Yôp plơ̆ lah pô aơ:

² “Tât nar aơ, nau gâp nter ăt hôm e rngot, Ti gâp ŭch buay nau gâp lŭng nter.

³ Ŭch ma gâp gǐt ta ntŭk dơi joi Kôranh Brah, Gâp mra văch gŭ tanăp sưng hađăch Păng!

⁴ Gâp mra nkoch mbơh nau gâp geh tanăp Păng, Bâr mbung gâp nkoch n'hêl nê̆ nau di.

⁵ Gâp mra gĭt lĕ nau Păng plơ̆ lah, Jêh ri gĭt vât nau Păng ŭch lah ntĭm gâp.

⁶ Kôranh Brah djôt nau brah toyh bơh Păng gay tâm rlăch đah gâp đŏng? Mâu ôh, Păng mra iăt gâp.

⁷ Ta nây bunuyh sŏng mra tâm dun đah Păng, Jêh ri gâp mra klaih mro mrăng bơh Nơm phat dôih gâp.

⁸ Aơ, tơlah gâp hăn mpeh luh nar, Păng mâu geh ôh ta nây; Gâp plơ̆ sĭt mpeh nhâp nar, uănh mâu saơ đŏng Păng;

⁹ Lah Păng pah kan gŭ mpeh pa lơ, gâp mâu dơi ôh mâp Păng; Lah Păng trŭnh mpeh pa dâng, gâp mâu saơ đŏng Păng.

¹⁰ Ƀiălah Kôranh Brah gǐt trong gâp hăn, Tơlah Păng rlong uănh jêh gâp, gâp mra jêng nâm bu mah.

¹¹ Jâng gâp tĭng têl nhuat Păng; Gâp chuat hăn di trong Păng, mâu teng ôh.

¹² Gâp mâu du ngai lĕ nau vay ntăm bơh bâr mbung Păng, Djôt prăp mro tâm nuih n'hâm gâp nau ngơi bơh bâr mbung Păng.

¹³ Păng nơm hŏ ntrŭnh jêh pôri mbu moh dơi ƀư ăn Păng rgâl nau mĭn? Moh ntil nau Păng hŏ ŭch, Păng mra ƀư ro;

¹⁴ Păng mra ƀư lôch ntil nau Păng hŏ tâm nal ma gâp: Jêh ri âk ntil ƀoi nau nĕ Păng hŏ mĭn jêh tâm nuih n'hâm.

¹⁵ Yor nây, gâp geh nau klach ngăn tanăp măt Păng; Ăp tơ̆ gŭ mĭn, gâp saơ râm nsâr klach Păng.

¹⁶ Brah Ndu ƀư ăn nuih n'hâm gâp hươi ngăn, Nơm Geh Lĕ Nau Brah ƀư ăn gâp klach krit.

¹⁷ Nđâp lah pônây gâp mâu mra gŭ klăk klêm tâm nau ngo, Nôk nau ngo klĕng nkŭm ndâp muh măt gâp.”