Ndrom Samƀŭt bơh Yôp 22 - Nau Brah Ndu Ngơi 2023

Y-Êlipas lah ngăn ma Y-Yôp lĕ ƀư tih jêh

¹ Y-Êlipas, bunuyh ƀon Têman plơ̆ lah:

² “Moh nau khlay kon bunuyh ăn ma Brah Ndu? Nđâp bunuyh blau mĭn knŏng ăn nau khlay ma păng nơm dơm.

³ Nơm Geh Lĕ Nau Brah geh nau maak lĕ lah may gŭ rêh sŏng srăng? Moh nau khlay ma Păng tơlah may gŭ rêh ueh?

⁴ Di lĕ yor may klach yơk ma Păng dĭng Păng nduyh lah, Jêh ri phat dôih may?

⁵ Mâu di nau djơh mhĭk may dŭt toyh? Nau tih may âk ngăn ngên kŏ tât mâu dơi kơp lĕ ƀơh?

⁶ Yorlah may nchâp oh nâu may ăn ndơ nchăm mâu geh nau, Doh rhôk khân păng mâu hôm geh bok ao nkŭm săk.

⁷ Nơm huăr rgănh may mâu ăn dak nhêt, Phung huăr ji ngot may mâu ăn ndơ sa.

⁸ Bi ma phung geh nau dơi, dơi geh neh; Bunuyh bu yơk dơi rêh ta neh nây.

⁹ Phung bu ur ndrô may mprơh sǐt ti dơm, Phung kon đơi may chalơi mâu hôm geh ntŭk nsing rnơm.

¹⁰ Yor nây, dăk sân jŭm may, Nau klach krit ƀât lât dơm rduh lơh may.

¹¹ Nau ngo nkŭm lơi ƀư ma may uănh mâu saơ; Dak lip bŭk nkrâm may.

¹² Mâu di bơh Brah Ndu gŭ tâm ntŭk prêh klơ, tât lĕ klơ ndâr trôk? Uănh hom phung mănh mbing prêh lơn, prêh hâu ngăn ngên!

¹³ Yor nây may lah: ‘Moh ntil Brah Ndu gǐt? Dơi lĕ Păng phat dôih tâm nau ngo klĕng hĕ?

¹⁴ Ndâr tŭk mbâl nkŭm Păng yor ri dĭng Păng mâu dơi saơ; Păng chuat hăn ta klơ lĕ ndâr trôk.’

¹⁵ May hôm e djôt hăn tĭng trong kăl e, Mâm trong phung djơh mhĭk hŏ hăn jêh?

¹⁶ Khân păng bu mra pih kloh lĕ êlor nar tâm nal, Ntŭk mbon khân păng lĕ dak rdu tǐng n'hong dak;

¹⁷ Khân păng lah ma Brah Ndu: ‘Dăn du ngai đah hên! Moh ndơ Nơm Geh Lĕ Nau Brah dơi ƀư ma hên đŏng?’

¹⁸ Nđâp lah pônây Păng ăn ma ngih khân păng bêng ma ndơ ueh: Ŭch ma gâp dơi der ngai đah nau nchră bơh phung ƀai!

¹⁹ Phung sŏng srăng răm maak lah saơ phung ƀai geh nau bu rmal; Bi phung mâu geh nau tih mra gơm mưch ma khân păng pô aơ:

²⁰ ‘Phung rlăng he nanê̆ mra dơn nau rai lôch, Lĕ ndô ndơ khân păng hôm e klen ŭnh sa lĕ ƀhiau.’

²¹ Pônây, tâm rnglăp hom ma Brah Ndu jêh ri mra gŭ đăp mpăn ndrel Păng, Pôri nau ueh maak mra tât ma may.

²² Sŏk dơn hom nau vay tă bơh trôm mbung Păng, Nchih prăp nau Păng ngơi tâm nuih n'hâm may.

²³ Tơlah plơ̆ sĭt ma Nơm Geh Lĕ Nau Brah, may mra dơi jêng tay. Tơlah may mƀăr lơi nau djơh mhĭk bơh ngih bok may.

²⁴ Mƀăr lơi mah tâm ndruyh neh, Jêh ri klŭp lơi mah Ôphir tâm lŭ ta nklang dak,

²⁵ Pôri Nơm Geh Lĕ Nau Brah mra jêng mah, Jêng prăk khlay ma may.

²⁶ Rnôk nây may mra hâk răm tâm Nơm Geh Lĕ Nau Brah, Jêh ri n'gơr muh măt may uănh Brah Ndu.

²⁷ May mra vơh vơl dăn ma Păng, Păng mra iăt may; Jêh ri may mra ƀư nanê̆ nau may nơm ton.

²⁸ Moh nau kan may ŭch ƀư, nau kan nây mra dơi jêng; Nau ang sol nchrat trong may hăn.

²⁹ Lah khân păng geh nau gơm mưch, may mra lah: ‘Yor khân păng sưr!’ Yorlah Brah Ndu rklaih phung dêh rhêt.

³⁰ Păng mra tâm rklaih ma lĕ rngôch phung geh nau tih; Yor nây may mra dơi tâm rklaih tă bơh bar đah ti kloh ueh may.”