Ndrom Samƀŭt bơh Yôp 21 - Nau Brah Ndu Ngơi 2023

Y-Yôp lah ma nau ơm nal ma phung mhĭk

¹ Y-Yôp plơ̆ lah pô aơ:

² “Iăt ăn nanê̆ nau gâp ngơi, Nây jêng nau bonh leng bơh khân may prăp ma gâp.

³ Srôih iăt hom nau gâp mra ngơi, Lôch gâp ngơi, khân may gơm mưch ro.

⁴ Bi gâp, mâm nau gâp hŏ lŭng nter đah kon bunuyh? Mâm dĭng nau mĭn gâp mâu dơi roh nau srôih?

⁵ Uănh hom ma gâp jêh ri saơ hih rhâl, Gơnh oi sŏk ti rdêp lơi mbung.

⁶ Ăp tơ̆ lah gâp mĭn, gâp saơ nau kir klach ngăn, Râm nsâr săk jăn dŭt hâu.

⁷ Mâm ƀư phung djơh mhĭk hôm rêh tât ranh, Lơ ranh lơ ma hao geh jêng?

⁸ Khân păng saơ noi deh khân păng gŭ nâp, Kŏ tât măt saơ phung kon sau tanăp măt khân păng.

⁹ Ngih vâl khân păng đăp mpăn mâu klach ôh, Chiông mâng rvĕ bơh Brah Ndu mâu lĕ tŭp ta khân păng.

¹⁰ Ndrôk nkuăng khân păng tâm jơng ntil mâu djơh, Ndrôk me khân păng deh kon mâu rlêh.

¹¹ Khân păng ăn phung kon se jê̆ pâl rlưn nâm bu phung biăp, Phung kon se pâl ntalơ̆.

¹² Mpât mprơ tǐng nteh gong rêng jêh ri nteh gâr, Troh nter tâm nau nteh n'hôm nteh bâr nŭng.

¹³ Khân păng dơn lĕ nar khay gŭ rêh tâm nau chăt jêng, Jêh nây đăp mpăn hăn trŭnh tâm ƀon phung khǐt.

¹⁴ Khân păng lah ma Brah Ndu: ‘Dăn du ngai đah hên! Hên mâu ŭch gǐt ôh trong May.

¹⁵ Mbu moh Nơm Geh Lĕ Nau Brah dĭng ma hên pah kan? Moh ndơ khlay ma hên la mbơh sơm ma Păng?’

¹⁶ Ƀiălah nau chăt jêng hŏ geh gŭ tâm ti khân păng? Nau plăch rlăm phung kue gâp mra der ngai!

¹⁷ Prot geh đŏng ŭnh kađen phung ƀai gơnh nhhât, Jêh ri nau mhĭk toyh tât ma khân păng? Ndah jŏ Brah Ndu ji nuih? Tât ăn nau nđêh nji ma khân păng?

¹⁸ Ndah jŏ khân păng mra jêng nâm bu rhe panăp sial, Nâm bu lâk ăn phŭt chuănh rdu?

¹⁹ Khân may lah: ‘Brah Ndu prăp nau djơh mhǐk khân păng ma phung kon khân păng mra dơn.’ Dăn May mplơ̆ nau nây ma khân păng nơm, gay khân păng gǐt.

²⁰ Ăn măt khân păng nơm saơ n'hêl nê̆ nau rai lôch, Jêh ri nhêt nau ji nuih bơh Nơm Geh Lĕ Nau Brah.

²¹ Yor tơlah rnoh nar bu nal ma khân păng hŏ lĕ jêh, Moh hôm khân păng mĭn rvê tât ma rnăk vâl đŏng?

²² Mbu dơi janh ntĭm nau blau mĭn âk ma Brah Ndu, Yorlah Păng nơm phat dôih phung gŭ tâm ntŭk prêh?

²³ Geh bunuyh khǐt dôl hôm e ngăch dăng, Dôl gŭ rêh tâm nau đăp mpăn mơih rmên;

²⁴ Săk jăn păng hôm e ueh rmŏng, Glo tâm nting păng hôm e bêng ler.

²⁵ Geh bunuyh khǐt ma nuih n'hâm rngot ngăn ngên, Mâu mâp chiăm nau ueh maak.

²⁶ Lĕ bar hê bê̆ch tâm ndruyh neh da dê, Ndrĭt rhai nkŭm kđôi.

²⁷ Aơ, gâp gǐt nau mĭn khân may, Lĕ nau gay ŭch ƀư mhĭk ma nau rêh gâp.

²⁸ Yorlah khân may ôp: ‘Ta ntŭk ngih phung djơh mhǐk? Ngih bok phung djơh mhĭk ta ntŭk păng ndâk?’

²⁹ Khân may mâu ôp ƀơh phung bu năch hăn nsong trong, Mâu đŏng iăt nau khân păng mbơh:

³⁰ ‘Tâm nar rêh ni phung ƀai dơi klaih bơh nau mhĭk tât, Jêh ri tâm nar geh nau ji nuih mâm păng dơi klaih săk jăn’?

³¹ Tanăp muh măt păng, mbu mra ngơi ma nau rêh păng, Jêh ri mplơ̆ tay nau păng hŏ ƀư jêh?

³² Lah bu njŭn păng tât môch, Môch păng geh bunuyh gak njrăng.

³³ Neh tâm rlŭng rdơ̆ rbăn ngăn ăn ma păng; Lĕ rngôch bunuyh hăn tâp păng, Phung panăp pakơi păng âk mâu dơi kơp.

³⁴ Pôri, mâm ƀư khân may bonh leng gâp lĕ nau dơm dam nây? Lĕ nau khân may plơ̆ lah knŏng jêng nau mƀruh.”