Ndrom Samƀŭt bơh Yôp 20 - Nau Brah Ndu Ngơi 2023

Y-Sôphar lah nau tâm rmal prăp ma phung mhĭk

¹ Y-Sôphar, bunuyh n'gor Naama lah pô aơ:

² “Nau mĭn gâp nsŭk nsôr gâp mra ngơi, Yor nây huêng gâp rŭng răng mâu geh nau đăp mpăn.

³ Gâp tăng jêh nau bu nduyh ngơi djơh tât ma gâp; Nau blau mĭn gâp nsŭk nsôr gâp ơh ngơi.

⁴ May gǐt pô aơ ntơm bơh rnôk kăl e, Ntơm bơh kon bunuyh geh tâm neh ntu;

⁵ Nau dơi phung ƀai jêng gleh dơm, Jêh ri nau răm maak phung mâu chroh knŏng ƀât lât?

⁶ Nđâp lah nau sưr păng prêh kŏ tât klơ trôk, Bôk păng tom tât ta tŭk,

⁷ Pôri păng mra rai lôch n'ho ro nâm bu ek păng nơm đŏng; Phung hŏ saơ jêh păng mra ôp da dê: ‘Ta ntŭk păng?’

⁸ Păng mpăr nâm bu du nau mbơi, mâu geh ôh bunuyh dơi joi tay; Bu ntrŭt lơi nâm bu nau tâm saơ dôl măng.

⁹ Măt vay saơ păng mâu mra hôm saơ păng đŏng ôh, Ntŭk păng gŭ mâu mra hôm saơ păng đŏng.

¹⁰ Phung kon păng mra dăn ndơ bunuyh o ach, Ti păng nơm mra mplơ̆ lơi drăp ndơ.

¹¹ Nting nđăng păng bêng ma nau dăng dôl hôm mom, Ƀiălah nau dăng mra bê̆ch ndrel păng tâm ndruyh neh.

¹² Nđâp lah nau djơh mhĭk dơi jêng njŭng tâm mbung păng, Păng dơi pôn tâm dâng mpiăt,

¹³ Lah mâu ŭch chalơi nau djơh mhĭk, Păng hôm mât nau djơh mhĭk tâm mbung păng.

¹⁴ Nâm bu ndơ sa mâu kah lăp tâm trôm khŭng proch, Nau djơh mhĭk mra jêng play măt bêh khu tâm trôm ndŭl păng.

¹⁵ Păng rvăn drăp ndơ jêh nây mra luh hok, Brah Ndu mra ngluh drăp ndơ nây luh tă ndŭl păng.

¹⁶ Păng mra pu dak kăch bêh khu; Mpiăt bêh vǐt mra nkhĭt păng.

¹⁷ Păng mâu mra saơ lĕ n'hor dak krong, Mâu lah dak n'hor hoch luh dak sŭt jêh ri dak toh.

¹⁸ Păng mra nsĭt tay, nau play bơh kan păng ƀư Mâu dơi rvăn ôh; Sa kao geh tă bơh tăch rgâl, Mâu đŏng păng dơi dơn.

¹⁹ Yorlah păng hŏ tŭn jot jêh ri mâu chrê ôh phung o ach, Pit in ngih vâl mâu geh ôh păng ndâk.

²⁰ Yorlah păng mâu gǐt ôh nau gŭ klăk klêm tâm nuih n'hâm, Moh ntil ndơ păng ŭch mra geh ta ti păng.

²¹ Lah păng hŏ sa jêh mâu klen ôh du ntil ndơ; Yor nây nau geh jêng păng mâu gŭ jŏ.

²² Dôl nôk rmeh ler păng geh nau rêh ni; Lĕ nau rêh ni văch tât tâm păng.

²³ Brah Ndu nkhŭt nau ji nuih tâm păng, Ƀư ăn bêng nuih n'hâm păng kơnh, Hoch nau dŭt ji nuih jêng ndơ sông sa ma păng.

²⁴ Păng du der bơh ndơ tâm lơh ma loih Pôri hăr kông mra ntâp bluh păng.

²⁵ Lah tŏk chiông hăr luh bơh săk păng, Jêh ri chiông đao ang nchrat luh bơh klơm păng, Pôri nau klach krit nchueng jŭm păng.

²⁶ Nau ngo klĕng prăp ma jay prăp drăp khlay păng; Ŭnh mâu yor kon bunuyh mra sa rvăn păng, Moh ndơ hôm klen tâm ngih bok păng mra ŭnh sa lĕ.

²⁷ Lĕ ndâr trôk mra tâm mpơl nau djơh mhĭk păng, Jêh ri neh mra dâk tâm rdâng đah păng.

²⁸ Drăp ndơ rnăk vâl păng bu mra sŏk pit lĕ, Mra nchuăn rdu ndơ nây ta nar Kôranh Brah ji nuih.

²⁹ Nây jêng kô̆ Brah Ndu prăp ma bunuyh ƀai, Jêng drăp ndơn Brah Ndu tâm nal ma păng.”