Ndrom Samƀŭt bơh Yôp 2 - Nau Brah Ndu Ngơi 2023

Nau rlong uănh tal bar ma Y-Yôp

¹ Du nar nĕ, phung tông mpăr Brah Ndu văch mbơh ma Brah Yêhôva. Satan văch ndrel đŏng gay mbơh ma Păng.

² Brah Yêhôva ôp Satan: “Mbah ntŭk tă may văch?” Satan plơ̆ lah ma Brah Yêhôva: “Gâp hăn ntŭk aơ ntŭk ri tâm neh ntu, nsong jŭm lam aơ ri.”

³ Brah Yêhôva ôp tay Satan: “May mâp treng uănh tât Y-Yôp, oh mon gâp đŏng? Tâm neh ntu aơ mâu geh du huê nâm bu Y-Yôp; du huê bunuyh răp jăp jêh ri sŏng, klach yơk ma Brah Ndu jêh ri der ngai nau mhĭk. Y-Yôp hôm e mât nuih n'hâm răp jăp nđâp lah may hŏ nchâp Gâp ƀư rai Y-Yôp mâu geh ôh nau.”

⁴ Satan plơ̆ sĭt lah ma Brah Yêhôva, “‘Sŏk ntâu ntrok ntâu!’ Khân păng rơm ndrăp jêh ăn lĕ rngôch ndơ păng geh gay tâm rklaih nau rêh păng.

⁵ Ƀiălah aƀaơ, dăn Kôranh Brah rlong uănh yơr ti lơh tâm nting mlay Y-Yôp uănh păng geh suai rak tanăp măt Kôranh Brah đŏng mâu!”

⁶ Brah Yêhôva lah ma Satan: “Ri, Y-Yôp gŭ tâm ti may, ƀiălah may mra djôt prăp an nau rêh păng.”

⁷ Satan du luh ro tă bơh tanăp Brah Yêhôva, jêh ri ƀư rêh ni ma Y-Yôp ma eh ok ji ngăn ntơm bơh mpang jâng tât klơ bôk.

⁸ Y-Yôp gŭ tâm nklang mbŭch buh, sŏk rlat rsong yăng chah kuach chiăt.

⁹ Nôk nây, ur Y-Yôp ngơi: “Mâm? May hôm e dơi mât nuih n'hâm ueh răp jăp đŏng? Rak rtăp ma Brah Ndu jêh ri khĭt hom!”

¹⁰ Păng plơ̆ lah: “Ay ngơi nâm bu du huê bu ur rluk. Mâm ƀư nau ueh uĭn tă bơh ti Brah Ndu ăn he sŏk dơn, bi nau mhĭk jŭr tă bơh ti Păng he mâu sŏk dơn bơh?” Tâm lĕ nau nây, Y-Yôp mâu geh tih tâm nau ngơi.

¹¹ Lah pe nuyh mĭt jiăng Y-Yôp jêng Y-Êlipas phung Têman, Y-Bildat phung Suah jêh ri Y-Sôphar phung Naama tăng lư nau mhĭk tât ma păng, khân păng tă bơh ƀon khân păng nơm tâm nal văch gay ma pă nau rngot jêh ri bonh leng păng.

¹² Bơh ngai, khân păng n'gơr măt uănh ƀiălah mâu gĭt năl Y-Yôp. Tât dăch, khân păng nhĭm nteh, ăp bunuyh nkhêk ao khân păng nơm, sui ndruyh let trôk jêh ri klơ bôk khân păng nơm.

¹³ Pe nuyh mĭt jiăng gŭ ta neh ndrel Y-Yôp tâm pơh năng nar, mâu geh du huê ngơi du tong ndrel păng, yor khân păng saơ nau ji păng toyh ngăn.