Ndrom Samƀŭt bơh Yôp 19 - Nau Brah Ndu Ngơi 2023

Y-Yôp rnơm n'hêl nanê̆ ma nau Kôranh Brah tâm chuai

¹ Y-Yôp plơ̆ lah pô aơ:

² “Khân may hôm ŭch dŏng nau ngơi ƀư nđêh nji gâp, Nchah hăch gâp ndah dŭt jŏ?

³ Lĕ jât tơ̆ jêh khân may nduyh lah gâp, Ƀư mhĭk ma gâp mâm khân may mâu bêk prêng?

⁴ Nđâp lah gâp geh nau tih ngăn, Pôri nau tih nây knŏng geh êng ma du huê gâp.

⁵ Tơlah ngăn khân may ŭch thâng măt đah gâp, Djôt nau bêk prêng gâp gay nduyh;

⁶ Pôri ăn gĭt hom pô aơ Brah Ndu nơm hŏ ƀư mhĭk jêh ma gâp, Nhuăl Păng drăng jŭm gâp.

⁷ Aơ, lah gâp geh kuăl: ‘Bu ƀư mhĭk ma gâp!’ mâu lĕ geh bu ơh ma gâp; Lah gâp kuăl dŭt nteh, mâu saơ lĕ nau di.

⁸ Kôranh Brah lĕ king jêh trong gâp, gâp mâu dơi rgăn ôh. Păng nkŭm nau ngo tâm lĕ trong gâp hăn.

⁹ Păng lĕ sŏk lơi jêh nau chrêk rmah gâp, Sŏk đon hađăch bơh bôk gâp.

¹⁰ Kôranh Brah lơh rlâm gâp puăn njônh, jêh ri gâp rai lôch; Păng rôk nau gâp kâp gân tâm ban ma bu rôk tơm si.

¹¹ Nau Păng ji nuih hâng đah gâp, Păng uănh gâp jêng nơm rlăng Păng.

¹² Phung tahan Păng n'hoch tât drâm drâm, Bât pôih rduh lơh gâp, Jêh ri ndâk ngih bok nchueng jŭm ngih bok gâp.

¹³ Păng ƀư ăn oh nâu gâp du ngai đah gâp, Phung gĭt năl gâp jêng phung bu năch.

¹⁴ Phung mpôl băl chalơi gâp, Phung mĭt jiăng dăch dơh lĕ chalơi gâp.

¹⁵ Phung gŭ njưh ƀât lât tâm ngih gâp lĕ chuêl jêh gâp, Phung oh mon bu ur uănh gâp tâm ban ma bu năch, Tâm măt khân păng uănh gâp jêng bunuyh bu êng.

¹⁶ Gâp kuăl oh mon, păng mâu ŭch ơh ro; Nđâp lah dôl gâp vơl dăn ma mbung gâp.

¹⁷ Nsôr n'hâm gâp ƀư ăn ur gâp tâm rmot; Oh nâu gâp tâm rmot đŏng ma gâp.

¹⁸ Kŏ tât phung kon se jê̆ lơ mưch rmot ma gâp đŏng, Mbăt gâp ma dâk, khân păng hŏ mưch jêh gâp.

¹⁹ Lĕ rngôch mĭt jiăng tâm rmot ma gâp da dê, Phung gâp rŏng plơ̆ jêng rlăng jêh đah gâp.

²⁰ Gâp knŏng hôm e ntâu dop đah nting, Jêh ri klaih bơh khĭt đah bar đah mpang ti dơm.

²¹ Hơi phung mĭt jiăng, yô̆ nđach hom ma gâp, yô̆ nđach hom ma gâp! Yorlah ti Brah Ndu hŏ dong jêh gâp.

²² Mâm ƀư khân may tĭng groi gâp nâm bu Brah Ndu? Ê hŏ dĭl puăch gâp bơh?

²³ Ơ! Ŭch ma lĕ nau gâp ngơi dơi nchih tay, Dơi nchih tâm ndrom samƀŭt!

²⁴ Dŏng mâng nchih loih jêh ri ndrak, Chrăk tâm plơp lŭ ndray tât lĕ rngôch rnôk n'ho ro!

²⁵ Bi gâp, gâp gĭt Nơm Tâm Chuai gâp hôm e rêh. Tât nglĕ dŭt Păng mra dâk ta neh ntu.

²⁶ Nđâp lah ntâu puăch gâp lĕ rai, Tâm săk jăn aơ gâp hôm saơ Brah Ndu;

²⁷ Gâp nơm mra saơ Păng, Măt gâp mra uănh ta Păng, mâu di bunuyh êng; Nuih n'hâm gâp ŭch kâp kŏ tât lĕ huăr!

²⁸ Tơlah khân may lah: ‘Mâm he mra hăn tĭng păng?’ Jêh ri: ‘Tơm nau mhĭk aơ luh tă păng nơm’;

²⁹ Pôri klach hom ma mpiăt đao, Yorlah nau ji nuih khân may khư tâm rmal ma đao, Gay khân may gĭt mra geh nar phat dôih.”