Ndrom Samƀŭt bơh Yôp 18 - Nau Brah Ndu Ngơi 2023

Y-Bildat ngơi nau Brah Ndu tâm rmal ma phung djơh mhĭk

¹ Y-Bildat bunuyh n'gor Suah plơ̆ lah pô aơ:

² “Ndah jŏ khân may sân dăk tâm nau ngơi? Mĭn rvê hom, ri mơ hên mra ngơi.

³ Mâm ƀư khân may uănh ma hên nâm bu mpô mpa? Jêh ri uănh ma hên nâm bu nơm rluk?

⁴ May ƀư sôt êng may nơm tâm nau hao ji nuih; Di lĕ yor ma may ri dĭng rplay neh jêng rngot njăp, Jêh ri lŭ toyh bu trơn tât ntŭk êng?

⁵ N'hêl nanê̆ nau ang phung ƀai mra nhhât, Chiông ŭnh păng mâu hôm nchrat ang ôh.

⁶ Nau ang tâm vâl bok păng mra ngo, Ŭnh kađen klơ bôk păng mra nhhât ro.

⁷ Lĕ nhuat hăn dŭt dăng păng jêng hươi jêh, Lĕ nau plĕch rlăm păng ƀư ma păng nkêng nkăng.

⁸ Yorlah jâng păng văk tâm dăk nhuăl, Jêh ri chuat hăn tâm dăk bu sân.

⁹ Du mlâm dăk geh păng nơm ta ndơl jâng, Jêh ri nhuăl drăng mra văk khan păng nơm.

¹⁰ Rse dăk păng drăng rŭp tâm neh, Dăk sân geh păng ta trong hăn.

¹¹ Nau klach krit gŭ jŭm ƀư krit ngăn, Jêh ri tĭng groi pakơi ndơl jâng păng.

¹² Nau dăng n'hâm păng lĕ huơi jêh yor ji ngot ji hir, Jêh ri nau tât mhĭk toyh gŭ kâp kêng meng păng.

¹³ Nau ji ƀư ntâu mlay păng rgay ngăn, Kon bôk rah nau khĭt ƀư rai rvăn lĕ săk jăn păng.

¹⁴ Bu mra mphâk păng bơh ngih bok jêng ntŭk păng nsing, Jêh ri bu leo păng tât ma hađăch krit klach ngăn.

¹⁵ Phung mâu jêng ndơ păng mra gŭ tâm ngih bok păng nây; Bi ma lŭ mô ŭnh sui mbrach lam ntŭk păng gŭ.

¹⁶ Tâm dâng reh păng kro, Ta klơ n'gĭng păng lĕ klêu jêh.

¹⁷ Nau ndray tâm n'gor păng mâu mra hôm ôh, Padih n'gor amoh săk năm deh păng mâu geh ôh bunuyh nkah tay.

¹⁸ Păng lĕ bu mprơh bơh nau ang gay lăp tâm ntŭk nau ngo, Jêh ri bu mprơh lơi bơh neh ntu.

¹⁹ Tâm nklang phung ƀon lan păng nơm, păng mâu geh kon sau ôh, Ntŭk păng gŭ mâu geh du huê nuyh hôm gŭ rêh.

²⁰ Tanăp mrô ơm nal ma păng, phung mpeh nhâp nar hih rhâl, Phung mpeh luh nar krit klach ngăn.

²¹ N'hêl nanê̆, nây jêng ntŭk gŭ phung djơh mhĭk, Mrô ơm nal ma phung mâu gĭt năl Brah Ndu.”