Ndrom Samƀŭt bơh Yôp 17 - Nau Brah Ndu Ngơi 2023

Y-Yôp mbơh sơm dăn Kôranh Brah rklaih

¹ “N'hâm gâp nsôr hŏ roh jêh, lĕ nar gâp hŏ lôch jêh, Môch blang gŭ kâp gâp!

² Phung mưch nchueng jŭm gâp, Măt gâp saơ mro nau khân păng rkhŏch rhiăl.

³ Dăn Kôranh Brah dơn râng gâp gŭ kêng May, Yorlah padih May mbu nơm mra chuai gâp?

⁴ Yorlah May ƀư ăn nau mĭn khân păng ngo klĕng, Yor nây May mâu mra ăn ôh khân păng dơi.

⁵ Mbu nơm phong mĭt jiăng păng gay joi nau nkhôm, Măt phung kon khân păng mra huănh hươi.”

Y-Yôp ngơi đah phung mĭt jiăng

⁶ “Păng ƀư ma gâp jêng ndơ gơm ma lĕ rngôch bunuyh, Gay lĕ bunuyh soh dak diu tâm muh măt gâp.

⁷ Măt gâp mra ngo yor nau rngot, Lĕ săk jăn gâp knŏng hôm gui dơm.

⁸ Saơ gâp, bunuyh sŏng mra hih rhâl, Bunuyh mâu geh nau tih mra hao ji nuih đah phung mâu chroh.

⁹ Ƀiălah bunuyh sŏng srăng djôt nâp trong khân păng hăn, Bunuyh geh bar đah ti kloh rsang lơ nar lơ hâu dăng lơn.

¹⁰ Hơi khân may, tâm dun tay hom! Ƀiălah tâm khân may, gâp mâu saơ ôh bunuyh blau mĭn.

¹¹ Ăp nar gâp rlau lôch, nau gâp ndrăp mĭn roh hêng Nđâp ma lĕ nau gâp ŭch mĭn bơh nuih n'hâm.

¹² Khân păng sŏk măng ƀư jêng nar; Tâm ntŭk ngo khân păng lah pô aơ nau ang dăch jêh.

¹³ Tơlah gâp kâp gân ƀon phung khĭt jêng ngih gâp, Jêh ri lăk gre bê̆ch tâm ntŭk ngo;

¹⁴ Tơlah kuăl ntu môch: ‘Aơ jêng mbơ̆ gâp’, Jêh ri kuăl ma rhai pô aơ: ‘Aơ jêng mê̆, jêng yuh gâp’;

¹⁵ Pôri mbah ntŭk gâp gŭ kâp gân? Mbu mra dơi saơ nau gâp kâp gân?

¹⁶ Di lĕ nau kâp gân nây trŭnh tâm ƀon phung khĭt ndrel gâp đŏng, Nôk he hăn ndrel lăp tâm ndruyh neh?”