Ndrom Samƀŭt bơh Yôp 16 - Nau Brah Ndu Ngơi 2023

Y-Yôp lah n'hêl nê̆ păng nơm mâu geh tih

¹ Y-Yôp plơ̆ lah pô aơ:

² “Lĕ nau tâm ban pônây gâp hŏ tăng âk jêh; Lĕ rngôch khân may jêng phung bonh leng ƀư jêng dơm dam.

³ Nau ngơi mâu geh kô̆ aơ mâm mâu dơi lôch? Moh nau nsŭk nsôr may ngơi mro mâu rlu?

⁴ Tơlah khân may gŭ tâm nau rêh geh kơt gâp, Gâp dơi lah tâm ban khân may đŏng; Gâp ăt drăp nkra rplay ngơi tâm rdâng đah khân may, Jêh ri rteh bôk uănh khân may.

⁵ Ƀiălah mbung gâp mra n'hao nuih khân may, Ma nau bonh leng bơh mbung gâp mra ăn hŭnh nau ji khân may.

⁶ Tơlah gâp ngơi, nau ji gâp mâu hŭnh, Bi gâp gŭ rklăk, gĭt lah păng dơi gŭ ngai?

⁷ Ƀiălah aƀaơ Kôranh Brah ƀư ma gâp hŏt rgănh, Ƀư ma lĕ rngôch ngih gâp dŭt krit ngăn.

⁸ Păng ƀư ma ntâu gâp mprôn Jêng nau mbơh tâm rdâng đah gâp; Săk gâp rgay rkom Nĕ jêng nau mbơh đŏng phong tra năp muh măt gâp.

⁹ Tâm nau ji nuih, Păng hêk gâp jêh ri tâm rmot gâp; Păng rket sêk đah gâp Phung rlăng gâp ntơ̆ măt uănh ma gâp.

¹⁰ Khân păng hă mbung mưch rmot gâp, Hăt janh ngăn tap ta trôm bom gâp; Tâm rgum băl mpôl tâm rdâng đah gâp.

¹¹ Brah Ndu jao gâp ma phung mâu chroh, Mƀăr gâp tâm ti phung ƀai.

¹² Gâp dôl đăp mpăn pôri Păng nkê̆ch gâp; Kuăn trô ko gâp jêh ri mbang nchah gâp hăch rhên; Păng dơm gâp ƀư ndap gay ăn bu pănh.

¹³ Lĕ chiông hăr Păng nchueng jŭm gâp, Păng pănh bluh ndŭr kơi gâp mâu yô̆ nđach, Ƀư ăn play măt gâp rŭng ta neh.

¹⁴ Păng ƀư ma gâp lĕ sôt rmanh aơ tât sôt rmanh ri, Rduh lơh gâp nâm bu du huê tahan janh ktang.

¹⁵ Gâp jĭm ao ƀau nkŭm klơ ntâu săk jăn gâp, Tâp brôi n'hâm suan gâp tâm ndruyh neh.

¹⁶ Muh măt gâp môr chăng yor nhĭm, Gui nau khĭt tâm mpơl klơ n'gô măt gâp.

¹⁷ Nđâp lah tâm bar đah ti gâp mâu geh ƀư ƀai ôh, Jêh ri nau gâp mbơh sơm jêng kloh rsang.

¹⁸ Hơi neh, lơi nkŭm brôi mham gâp! Ăn nau gâp nter vơl ngloh ngai ƀaƀơ!

¹⁹ Tâm mông aƀaơ ro Nơm mbơh an ma gâp tâm trôk, Nơm chuai gâp gŭ ntŭk prêh klơ.

²⁰ Phung mĭt jiăng gâp mưch rmot gâp, Ƀiălah gâp nhĭm luh dak măt đah Brah Ndu,

²¹ Nâm bu du huê nuyh koh dŏng an kon bunuyh đah Brah Ndu, Nâm bu kon bunuyh nking n'gang nau di ma mĭt jiăng păng nơm!

²² Yorlah khay năm hôm djê̆ bơi ma tât, Gâp mra hăn trong gâp ƀiălah mâu hôm ôh plơ̆ tay.”