Ndrom Samƀŭt bơh Yôp 15 - Nau Brah Ndu Ngơi 2023

Y-Êlipas lah pô aơ kon bunuyh rêh ni yor Brah Ndu rmal

¹ Y-Êlipas bunuyh ƀon Têman ngơi:

² “Di lĕ bunuyh blau mĭn tâm ơh ngơi đah nau blau mĭn âk nâm bu sial puh, Jêh ri prăp sial puh bêng ndŭl?

³ Mâu lah dŏng nau ngơi rlŏk mâu khlay, Nau ngơi mâu geh rplay, mâm dơi koh dŏng êng păng nơm?

⁴ May mƀăr lơi nau klach yơk ma Brah Ndu, Ƀư bâp lơi nau ŭch mĭn tanăp măt Păng.

⁵ Yorlah nau tih mhĭk may ntĭm ma mbung may ngơi, Jêh ri may săch rplay nau ngơi bơh nơm plĕch rlăm.

⁶ Mbung may nơm phat dôih ma may mâu di ôh gâp; Jêh ri mbung may nơm mbơh nau tâm rdâng đah may.

⁷ Di lĕ may jêng bunuyh deh lor lơn, Mâu lah dơi rhăk njêng lor ma yôk lĕ?

⁸ Di lĕ may mâp tăng jêh nau Brah Ndu nchră, Jêh ri djôt rgum lĕ nau blau mĭn sĭt ma may nơm?

⁹ Moh nau may gĭt dĭng hên mâu gĭt? Moh nau may gĭt rbăng dĭng hên mâu gĭt rbăng?

¹⁰ Ta nklang hên hôm e geh bunuyh sŏk ndra, phung kôranh bu ranh, Toyh năm lơn ma năm mbơ̆ may.

¹¹ Nau Brah Ndu bonh leng Jêh ri nau ngơi rdơ̆ rbăn hŏ prăp ma may, hôm e jê̆ ir ma may bơh?

¹² Mâm ƀư nuih n'hâm may rŭng răng, Jêh ri măt may lĕ plơt?

¹³ Kŏ tât huêng may tâm rdâng đah Brah Ndu, Jêh ri mbung may luh nau ngơi tâm ban pônây?

¹⁴ Moh kon bunuyh jêng gay dơi jêng kloh ueh? Nơm deh tă bơh bu ur jêng mbu nơm kơp êng jêng sŏng srăng?

¹⁵ Ri, Brah Ndu mâu rnơm ôh ma phung tông mpăr Păng, Tâm dâng măt Păng, lĕ ndâr trôk mâu lĕ kloh rsang,

¹⁶ N'hơn lah ma du huê nơm tih mhĭk, bu rmot, Ƀư nau tih mhĭk nâm bu nhêt dak!

¹⁷ Iăt hom, gâp mra ntĭm ma may; Gâp mra nkoch ma may nau gâp hŏ saơ,

¹⁸ (Jêng nau phung njêh hŏ ngơi, Jêh ri mâu pôn ôh nau phung chô yau khân păng nkoch tay,

¹⁹ Knŏng khân păng dơm dơi ăn neh, Mâu geh du huê phung bu năch dơi gŭ rêh tâm nklang khân păng).

²⁰ Phung djơh mhĭk ji du njăr rêh, Lĕ khay năm mra dơn nau mhĭk.

²¹ Tăng nau klach krit nter nteh mro kêng tôr; Dôl ueh mpăn phung ntŭng văch tât.

²² Mâu rnơm ôh păng nơm klaih bơh nau ngo klĕng, Ƀiălah mrô ơm nal prăp jêh ma tak đao.

²³ Lah bu klŭp mƀăr padih ƀư mpa sa ăn ma klang grât, Ăn păng gĭt pô aơ nar ngo klĕng dăch tât jêh.

²⁴ Nau rêh ni rngot rvê ƀư ma păng klach krit; Mpet păng nâm bu du huê hađăch rơm ndrăp tâm lơh.

²⁵ Yorlah păng yơr ti tâm rdâng đah Brah Ndu, Jêh ri sưr rlau rlong uănh ma Nơm Geh Lĕ Nau Brah.

²⁶ Nde krap tâm dâng khêl mbâl, Păng brơl ir rduh lơh Kôranh Brah,

²⁷ Yorlah păng ƀư muh măt păng nơm lay rklĭn, Bar đah gang bŭt pŭk dang ngi.

²⁸ Păng gŭ tâm ƀon lĕ ƀư rai, Tâm ăp ngih lĕ chalơi rngot jêh, Lĕ rngôch ngih kâp nar mra rlâm lĕ.

²⁹ Păng mâu dơi ôh jêng ndrŏng, drăp ndơ mâu ôh nâp mro mrăng, Drăp ndơn păng mâu lĕ jêng bĭk lam neh ntu.

³⁰ Păng mâu dơi klaih ôh bơh nau ngo klĕng, Mpiăt ŭnh ƀư kro lơi nkeh păng N'hâm nsôr bơh mbung Brah Ndu mra rdu păng.

³¹ Păng rnơm nsing ma nau dơm dam gay ndơm mƀruh êng păng nơm; Yorlah nau dơm dam mra jêng nau nkhôm ma păng.

³² Păng mra dơi plơng rĭng tŏng êlor tât nar, Bi ma ăp n'gĭng păng mâu mra ndrêh nse ôh.

³³ Păng nâm bu tơm krăk ƀâu rŭng play nse; Nâm bu tơm ôlive mâu luh kao.

³⁴ Yorlah noi deh phung mâu chroh mâu mra bĭk rơ̆, Ŭnh mra sa vâl bok phung sa ndơ bu blŏl.

³⁵ Păng bă ntreo ma nau mhĭk mra deh ma nau janh ƀai, Nuih n'hâm khân păng ndrăp lor nau mƀruh ndơm.”