Ndrom Samƀŭt bơh Yôp 14 - Nau Brah Ndu Ngơi 2023

Y-Yôp tâm mpơl nau rêh bunuyh jêng ƀât lât

¹ “Kon bunuyh deh tă bơh bu ur Rêh ƀât lât knŏng djê̆ nar, ƀiălah bêng ma nau uh ah.

² Nâm bu kao ơm ôi dang mhaơ huănh, Kon bunuyh ƀât lât nâm bu gui, mâu gŭ jŏ.

³ Pônây mâm Kôranh Brah hôm lin măt uănh, Djôt leo gâp gay phat dôih?

⁴ Mbu nơm dơi sŏk nau kloh ueh luh bơh nau ƀơ̆ ƀơch? Mâu geh du huê nuyh!

⁵ Mrô nar ma nau rêh bunuyh bơh Kôranh Brah lĕ nal jêh, Mrô khay năm knŏng tâm Păng yơh, Jêh ri ndah dŭt May tâm nal jêh, mâm dơi rlau.

⁶ Dăn Kôranh Brah lơi hôm uănh gay khân păng dơi gŭ mpăn, Dơi rlu suan, nâm bu du huê bunuyh kan nkhôm lôch jêh nar kan.

⁷ Yorlah tơm si hôm e geh nau kâp gân, Bu kăl jêh hôm e chăt tay đŏng, Mâu rlu rtah nkeh luh nkŭr.

⁸ Nđâp lah reh păng tâm neh lĕ ranh kđôi lĕ, Tơm khĭt mbrơi tâm ndruyh neh;

⁹ Mbăt ma geh n'hôl dak, păng mra chăt nkeh ro, N'gĭng hung nâm bu du tơm si nse.

¹⁰ Ƀiălah kon bunuyh khĭt jêh ri lâng mâu mpât, Lah tăch n'hâm ntŭk khân păng tât?

¹¹ Nâm bu dak nglao lĕ suăt, Nâm bu dak krong suăt kroh đang;

¹² Kon bunuyh hŏ khĭt jêh mâu hôm dâk đŏng ôh, Lah trôk nđôch hôm ta nây, khân păng mâu đŏng kah rngăl, Jêh ri mâu geh ôh bunuyh rlay khân păng bơh nau lêt bê̆ch.

¹³ Ơ! Ŭch ma Kôranh Brah pôn gâp tâm ƀon phung khĭt, Nkŭm ndâp gâp kŏ tât Păng djoh nau ji nuih Jêh ri nal du rô̆ gay ma kah gĭt ma gâp!

¹⁴ Tơlah kon bunuyh khĭt, dơi lĕ khân păng dâk rêh tay? Du bông lĕ nar kan hŏt r'ah, Gâp mra gŭ kâp kŏ tât nau rêh ni rlau lôch.

¹⁵ Kôranh Brah kuăl gâp, gâp mra plơ̆ lah; May treng uănh tât ma kan ti May lĕ ƀư.

¹⁶ Aƀaơ May kơp nhuat jâng gâp, Ƀiălah mâu hôm mêt uănh lĕ nau tih gâp;

¹⁷ Lĕ nau tih gâp dơi pôn tâm trôm dŭng, Nau djơh mhĭk gâp May nkŭm jêh.

¹⁸ Ƀiălah, nâm bu yôk dor rlâm tŭp chah rai, Lŭ toyh bu trơn tât ntŭk êng;

¹⁹ Nâm bu dak hoch rchoh lŭ, Nâm bu dak sor hoch rdu ndruyh neh; May ƀư rai nau kâp gân kon bunuyh.

²⁰ May ƀư rai jêh kon bunuyh jêh ri khân păng rlau lôch; Păng rgâl muh măt jêh ri mprơh lơi khân păng.

²¹ Phung kon khân păng dơi geh nau yơk, khân păng kŏ mâu gĭt lĕ; Mâu lah khân păng bu mâu uănh geh, khân păng mâu gĭt lĕ.

²² Săk jăn nđêh nji khân păng dơn êng du huê, Huêng khân păng nhĭm nhhiăng knŏng du huê khân păng gĭt.”