Ndrom Samƀŭt bơh Yôp 13 - Nau Brah Ndu Ngơi 2023

Y-Yôp knŏng ŭch nkoch mbơh ma Brah Ndu

¹ “Măt gâp nơm saơ jêh lĕ nau nây, Tôr gâp nơm lĕ tăng jêh ri rbăng jêh.

² Moh nau khân may gĭt, gâp gĭt đŏng; Gâp mâu ir ôh jêng tâm dâng khân may.

³ Ƀiălah gâp ŭch mbơh ngơi đah Nơm Geh Lĕ Nau Brah, Jêh ri ŭch ma tâm rlăch đah Brah Ndu.

⁴ Bi ma khân may knŏng blau jan lah ma nau ueh, Lĕ rngôch khân may jêng nai dak si dơm dam.

⁵ Di lah khân may gŭ rklăk klêm Ri mơ khân may geh nau blau mĭn ngăn!

⁶ Dăn iăt hom nau gâp tâm dun, Jêh ri kâp iăt nau koh dŏng tă bơh bâr mbung gâp.

⁷ Di lĕ yor Brah Ndu dĭng khân may ngơi nau djơh mhĭk? Mâu lah yor Păng dĭng khân may njêng nau ngơi ƀlêp ƀlêr?

⁸ Khân may ŭch gŭ mpeh Brah Ndu Jêh ri ngơi kơl ăn Păng bơh?

⁹ Khân may geh nau maak đŏng lah Păng sek uănh khân may? Mâu lah Khân may mĭn dơi ndơm Păng nâm bu ndơm kon bunuyh?

¹⁰ N'hêl nanê̆ Păng mra nduyh khân may Tơlah khân may ndâp mpôn gŭ mpeh ma Păng.

¹¹ Mâu di bơh nau toyh rnam Păng mra ƀư ma khân may klach krit? Mâm nau klach krit Păng mâu tât ma khân may?

¹² Nau hôr bơh khân may dơm dam nâm bu ŭnh buh; Khân may dăp nau ngơi hươi nâm bu neh bŏk.

¹³ Gŭ klăk hom ăn gâp ngơi, Ăn kđôi gâp, moh ntil nau tât ma gâp kđôi lĕ.

¹⁴ Mâm dĭng gâp sŏk sêk kăp êng săk gâp nơm Jêh ri rơm ndrăp jêh sân săk jăn?

¹⁵ Nđâp lah Kôranh Brah nkhĭt gâp, gâp hôm e rnơm nsing ma Păng; Jêh ri gâp mra koh dŏng nau rêh gâp nơm tanăp măt Păng.

¹⁶ Aơ jêng nau tâm rklaih ma gâp, Yorlah phung mâu chroh mâu nănh văch ôh tanăp măt Kôranh Brah.

¹⁷ Iăt hom nanê̆ ma nau gâp ngơi, Jêh ri ăn nau gâp mbơh lăp tâm trôm tôr khân may!

¹⁸ Aơ, gâp hŏ ndrăp jêh mbơh nau tât ma gâp, Gâp gĭt gâp mra dơi kơp sŏng srăng.

¹⁹ Geh lĕ nơm tâm dun jêh ri dơi đah gâp? Tơlah pônây gâp mra rơm ndrăp nuih n'hâm dơn nau khĭt.

²⁰ Geh bar ntil dăn Kôranh Brah chalơi an ma gâp, Pôri gâp mâu mra pôn muh măt đah May:

²¹ Dăn Kôranh Brah rhuăt lơi ti bơh gâp Jêh ri lơi ăn nau klach krit ƀư ma gâp krit ngăn.

²² Rnôk nây May kuăl, gâp mra plơ̆ lah, Mâu lah gâp ngơi jêh ri Kôranh Brah plơ̆ lah.

²³ Ndah hŏ âk nau djơh mhĭk gâp ƀư tih? Dăn Kôranh Brah ăn gâp gĭt nau ƀư tih jêh ri nau tih gâp.

²⁴ Mâm May pôn muh măt, Jêh ri uănh gâp nâm bu phung rlăng đah May?

²⁵ Mâm May ŭch nkrit kơt n'ha si mpăr tâm sial, Jêh ri hăn tĭng du nkong rhe kro?

²⁶ Yorlah May nchih tay ăp ntil nau rngot gay kơp gâp jêng tih Jêh ri ăn gâp dơn nau mhĭk dôl hôm mom ndăm,

²⁷ May nkông jâng gâp, Tĭng rmiăng lĕ rngôch trong gâp hăn Jêh ri tâm nal n'har lĕ têl jâng gâp?

²⁸ Nau rêh gâp lĕ chah rai nâm bu tơm si ôm, Nâm bu bok ao lĕ nchiăr reh jêh.”