Ndrom Samƀŭt bơh Yôp 12 - Nau Brah Ndu Ngơi 2023

Y-Yôp plơ̆ lah nau phung mĭt jiăng

¹ Y-Yôp plơ̆ lah pô aơ:

² “Di jêh, khân may jêng nau ngơi phung ƀon lan, Lah khân may khĭt, nau blau mĭn n'hêl nanê̆ mra du luh tĭng khân may nơm.

³ Ƀiălah gâp gĭt vât đŏng nâm bu khân may; Mâu ir lĕ tâm dâng khân may. Mbu nơm mâu gĭt lĕ kan nâm nđĕ?

⁴ Gâp dôl jêng nau gơm ăn ma mĭt jiăng, Nđâp lah gâp hŏ kuăl mbơh sơm ma Brah Ndu jêh ri Păng plơ̆ lah ma gâp; Bunuyh răp jăp n'hêl nê̆ jêng nkhơng nau gơm mưch ăn ma neh ntu!

⁵ Bunuyh lap tâm rmot ma bunuyh rêh ni. Nơm mbĭr jâng hôm ma nklơ̆ ăn prah.

⁶ Vâl bok phung ntŭng geh nau đăp mpăn, Phung nsônh nau Brah Ndu ji nuih, Jêh ri phung ƀư sưr n'hao êng nơm dơi gŭ rêh mpăn rlêk.

⁷ Ƀiălah ôp hom ma mpô mpa, khân păng mra ntĭm ma may; Ôp sĭm mpăr klơ trôk, khân păng mra ăn may gĭt.

⁸ Mâu lah ăn ngơi hom đah neh, neh mra ntĭm nti may; Ngơi đah ka dak mƀŭt, khân păng mra rblang ăn may rbăng.

⁹ Tâm lĕ ntil mpa aơ, moh ntil mpa mâu gĭt Ma ti Brah Yêhôva hŏ njêng jêh lĕ nau nây?

¹⁰ Păng kuăn tâm ti nau rêh lĕ rngôch mpô mpa rêh Jêh ri n'hâm nsôr lĕ rngôch kon bunuyh.

¹¹ Mâu di tôr gĭt tâm nkhah nau ngơi, Nâm bu trôm mbung chiăm ndơ sông sa?

¹² Phung bu ranh geh nau blau mĭn, Bunuyh rêh jŏ ntop nau gĭt rbăng.

¹³ Ƀiălah nau blau mĭn jêh ri nau brah jêng ndơ Brah Ndu; Păng bêng nau blau nchră jêh ri nau gĭt rbăng.

¹⁴ Păng ƀư rai, mâu geh ôh nơm dơi ndâk tay; Păng krŭng, mâu geh ôh nơm dơi klaih.

¹⁵ Păng nkrŭl dak, dak krong suăt kroh ro; Păng ăn dak mih jŭr ta neh, mir bêng ler.

¹⁶ Nau dăng n'hâm jêh ri nau blau mĭn jêng ndơ Păng; Nơm ndơm bu nđâp ma bunuyh bu ndơm gŭ tâm ti Păng da dê.

¹⁷ Păng ƀư ăn phung nchră hăn jâng dơm, Lĕ kôranh phat dôih jêng nkhơng rluk mâl,

¹⁸ Păng doh lơi se rvăk phung hađăch, Jêh ri vân troi jŭm gang bŭt khân păng;

¹⁹ Păng ƀư ăn phung kôranh ƀư brah hăn jâng dơm, Jêh ri n'glưh lơi phung geh nau dăng.

²⁰ Păng ƀư ma phung geh nau bu rnơm nsing jêng mlo, Phung kôranh bu ranh roh nau mĭn lah nchroh.

²¹ Păng ăn tât nau bêk prêng ma bunuyh lư ndrŏng, Doh lơi rse vân bŭt phung dăng.

²² Păng leo lĕ nau khlay ndâp luh bơh nau ngo, Mpơl gui nau khĭt jêng nau ang.

²³ Păng ăn phung ƀon lan văch ma geh jêng jêh nây ƀư rai lơi; Pơk huy n'har bri ma lĕ bri dak jêh nây ƀư ăn khân păng rai lôch.

²⁴ Păng ƀư ma phung kôranh chiă uănh phung ƀon lan ta neh ntu jêng rluk mâl, Hăn nsong mblêng tâm bri rdah mâu geh trong luh.

²⁵ Khân păng rvơ tâm ntŭk ngo vêt vê; Păng ăn khân păng hăn nkêng nkăng nâm bu nuyh nhŭl.”