Ndrom Samƀŭt bơh Yôp 11 - Nau Brah Ndu Ngơi 2023

Nau Y-Sôphar ngơi rlăch

¹ Y-Sôphar bunuyh Naama plơ̆ lah:

² “Di lĕ bơh mâu geh bunuyh dơi plơ̆ lah ma phung ngơi âk, Jêh ri bunuyh blau ngơi mra dơi kơp jêng sŏng?

³ Di lĕ nôk may ngơi ntưih bu gŭ rklăk da dê, Jêh ri dôl may gơm mưch mâu geh nơm nduyh lah may?

⁴ Yor may lah ma Kôranh Brah: ‘Ntil nau chroh gâp jêng kloh; Gâp kloh rsang tâm dâng măt Kôranh Brah.’

⁵ Ơ, Ŭch ma Brah Ndu lah ntĭm, Jêh ri pơk mbung lah đah may.

⁶ Ŭch ma Păng mpơl ăn may gĭt nau ndâp bơh nau blau mĭn! Yorlah nau blau mĭn Păng jru khlay ngăn. Pônây ăn gĭt hom pô aơ Brah Ndu tâm rmal n'gơch lơn ma may đah nau tih may hŏ ƀư.

⁷ Gĭt lah may dơi gĭt vât jru nau khlay ndâp Brah Ndu Jêh ri joi nau gĭt rbăng toyh bơh Nơm Geh Lĕ Nau Brah?

⁸ Nau nây prêh lơn ma lĕ ndâr trôk, mâm may dơi ƀư? Jru lơn ma ƀon phung khĭt, mâm may dơi gĭt jru?

⁹ Jong lơn rplay neh, Huy lơn ma dak rlai.

¹⁰ Tơlah Brah Ndu văch, krŭng may Jêh ri njêng ntŭk phat dôih, mbu nơm dơi buay Păng?

¹¹ Yorlah Păng gĭt ma mbu nơm mƀruh nchơt, Yor ri lah saơ nau mhĭk, mâm Păng mâu văch mêt uănh?

¹² Ndah jŏ seh bri deh jêng bunuyh Pôri nôk nây phung rluk mâl ri mơ jêng gĭt rbăng!

¹³ Pônây tơlah may ndrăp nuih n'hâm may nơm ăn jêng sŏng. Jêh ri yơr ti rle mpeh Kôranh Brah,

¹⁴ Klŭp ngai nau tih mhĭk bơh ti may, Mâu prăp bun ôh nau djơh mhĭk tâm vâl bok may;

¹⁵ Pôri may mra n'gơr măt mâu geh nau bêk prêng; Nâp ngăn jêh ri mâu mĭn rvê djê̆ ro.

¹⁶ May mra chuêl lĕ ntil nau rêh ni, Knŏng kah gĭt tay nâm bu n'hor dak hoch jêh.

¹⁷ Nau rêh may mra ang lơn nar nklang bôk; Nau ngo plăch jêng ƀhit rvi ang.

¹⁸ May mra rnơm ngăn yorlah geh nau kâp gân; Geh nau king n'gang jêh ri gŭ rlu ueh mpăn.

¹⁹ May mra lâng bê̆ch, mâu geh bunuyh ƀư ăn may klach Jêh ri âk bunuyh dăn nau ueh tă bơh may.

²⁰ Ƀiălah măt phung ƀai mra rgănh huơi; Joi trong du luh mâu saơ, Knŏng ŭch gơnh tăch n'hâm nglĕ dŭt.”