Ndrom Samƀŭt bơh Yôp 10 - Nau Brah Ndu Ngơi 2023

Y-Yôp plơ̆ lah đŏng ma Y-Bildat

¹ “Gâp mâu hôm ŭch rêh, Ri dĭng dah ŭch nau lŭng nter, Gâp mra ngơi tâm nau rngot bơh tâm nuih n'hâm gâp.

² Gâp mra lah ma Brah Ndu: ‘Lơi ta rmal gâp, Dăn ăn gâp gĭt mâm nau May kơp gâp jêng tih.

³ Di lĕ bơh May maak nuih n'hâm lah tŭn jot gâp, Tâm rmot ma kan ti May nơm rhăk njêng, Ƀiălah lơ gơm rum đah nau plĕch rlăm bơh phung mhĭk?

⁴ Di lĕ May geh măt nglay săk. Jêh ri saơ tâm ban ma bunuyh nglay săk saơ đŏng bơh?

⁵ Ngăn ƀơh ăp nar May tâm ban nar kon bunuyh, Jêh ri năm tâm ban ma năm kon bunuyh lĕ?

⁶ Ƀiălah May lŏ ôp sek nau djơh mhĭk gâp, Jêh ri tĭng joi nau tih gâp.

⁷ Nđâp lah May lĕ gĭt gâp mâu ƀư tih, Jêh ri mâu geh ôh bunuyh dơi klaih bơh ti May?

⁸ Ti May hŏ mon jêh gâp jêh ri rhăk njêng gâp, Ƀiălah aƀaơ May plơ̆ rgâl nau mĭn jêh ri ƀư rai gâp!

⁹ Dăn Kôranh Brah kah gĭt pô aơ May hŏ rli mon gâp bơh neh uk; Mâm aƀaơ May ŭch mplơ̆ tay gâp sĭt ma ndruyh neh?

¹⁰ Mâu di bơh May hŏ nkhŭt gâp nâm bu dak toh, Jêh nây ƀư gâp kŏt nâm bu ƀănh dak toh?

¹¹ May hŏ nsoh ăn gâp ma ntâu jêh ri mlay puăch, Tanh gâp đah nting jêh ri rse suan.

¹² May ăn ma gâp nau rêh jêh ri nau rŏng; Nau May mât mray djôt prăp jêh huêng gâp.

¹³ Ƀiălah May pôn lĕ ntil nây tâm nuih n'hâm; Gâp gĭt nau nây jêng nau May mĭn.

¹⁴ Tơlah gâp ƀư tih, May mra kâp rmiăng, Mâu yô̆ an ôh nau djơh mhĭk gâp.

¹⁵ Tơlah gâp ƀư tih, rêh ni ngăn ma gâp! Tơlah geh nau sŏng srăng, gâp mâu janh đŏng n'gơr bôk, Yorlah gâp bêng ma nau prêng, Jêh ri jâk jêr ma nau rngot rvê.

¹⁶ Tơlah gâp n'gơr bôk, May mra nchron gâp nâm bu yau mŭr, Jêh ri ƀư nau khlay ngăn ngên gay ƀư mhĭk tât ma gâp.

¹⁷ May dŏng nau mbơh mhe tâm rdâng đah gâp, Jêh ri ntop nau ji nuih tâm gâp, Djôt phung tahan rduh lơh gâp mro.

¹⁸ Mâm May ăn gâp luh bơh ndŭl me? Ŭch ma nôk nây ăn gâp tăch n'hâm ro gay bu mâu hôm saơ gâp!

¹⁹ Pônây mơ, nâm bu gâp mâu mâp geh, Tă bơh ndŭl me hăn ro tât ma môch.

²⁰ Lĕ nar gleh ngăn ma gâp mâm mâu gơnh dŭt? Dăn ăn ma gâp dơi mpăn gay joi djê̆ lê̆ nau bonh leng ma gâp;

²¹ Êlor gâp du luh gay mâu hôm plơ̆ tay ôh, Tât ta bri ngo klĕng jêh ri tâm dâng gui nau khĭt.

²² Nây jêng n'gor măng ngo klĕng, tâm dâng nau khĭt uh ah, Ntŭk nau ang kŏ mâu êng đŏng đah nau ngo.’”