Ndrom Samƀŭt bơh Yôp 1 - Nau Brah Ndu Ngơi 2023

Rnăk vâl Y-Yôp

¹ Tâm n'gor Us geh du huê bunuyh amoh săk jêng Y-Yôp. Păng jêng du huê bunuyh răp jăp jêh ri sŏng, klach yơk ma Brah Ndu jêh ri der ngai nau mhĭk.

² Păng geh pơh kon bu klâu jêh ri pe kon bu ur.

³ Drăp ndơ păng geh: Pơh rbăn mlâm biăp, pe rbăn mlâm seh samô, prăm rhiăng trŭp ndrôk, prăm rhiăng mlâm seh bri me jêh ri âk oh mon. Păng jêng bunuyh ndrŏng lơn tâm phung ƀon lan bri mpeh luh nar.

⁴ Lĕ rngôch phung kon bu klâu păng vay tâm tơh nau nkra nhêt sa, lĕ ngih aơ tât ma ngih êng jêh ri păng jă pe oh ruh gŭ nhêt sa ndrel ma khân păng.

⁵ Lôch jêh nar nhêt sa, Y-Yôp vay kuăl phung kon păng plơ̆ sĭt gay ƀư nau rƀŭn ƀư kloh ma khân păng. Păng kah rngăl ơm ôi nhhơr ndơ ƀư brah gŭch ma ăp nơm kon, yor păng mĭn êng: “Klach lah phung kon gâp ƀư tih jêh ri tâm nuih n'hâm suai rak Brah Ndu.” Y-Yôp ƀư ƀaƀơ pônây.

Nau rlong uănh tal nguay ma Y-Yôp

⁶ Geh du nar nây, phung tông mpăr Brah Ndu văch mpơl măt tanăp Brah Yêhôva. Satan tât ndrel ma khân păng.

⁷ Brah Yêhôva ôp Satan: “Mbah ntŭk tă may văch?” Satan plơ̆ sĭt lah ma Brah Yêhôva: “Gâp hăn ta aơ ta ri tâm neh ntu, hăn jŭm lam ntŭk aơ ntŭk ri”

⁸ Brah Yêhôva ôp tay ma Satan: “May geh mĭn rmiăng treng uănh ma Y-Yôp, oh mon Gâp đŏng? Ta neh ntu aơ mâu geh ôh bunuyh tâm ban ma Y-Yôp; păng jêng du huê bunuyh mâu geh nau bu dơi nduyh ôh jêh ri sŏng, klach yơk ma Brah Ndu jêh ri der lĕ nau mhĭk.”

⁹ Satan plơ̆ lah ma Brah Yêhôva: “Mâm ƀư Y-Yôp klach yơk ma Brah Ndu dơm dam lĕ?

¹⁰ Mâu di bơh may hŏ ndâk n'gar king n'gang jŭm păng jêh ri rnăk vâl nđâp ma lĕ rngôch drăp ndơ păng ƀơh? May hŏ ăn nau ueh uĭn tâm kan ti păng pah jêh ri ƀư ma drăp ndơ păng bêng lam neh.

¹¹ Ƀiălah aƀaơ Kôranh Brah yơr ti rlong ƀư tâm lĕ rngôch drăp ndơ păng geh, uănh păng gĭt geh nau suai rak Kôranh Brah tanăp măt đŏng!”

¹² Brah Yêhôva lah ma Satan: “Nĕ aơ, Gâp jao lĕ drăp ndơ Y-Yôp tâm ti may, ƀiălah may mâu dơi yơr ti pah ôh ma Y-Yôp.” Satan du luh ro bơh tanăp măt Brah Yêhôva.

¹³ Geh du nar, dôl phung kon bu klâu jêh ri kon bu ur Y-Yôp dôl gŭ râng sông sa jêh ri nhêt ndrănh tâm trôm ngih nâu bôk rah khân păng,

¹⁴ geh du huê nơm văch mbơh ma Y-Yôp: “Ndrôk dôl kai mir, seh dôl sa gơ̆ êp kêng khân păng

¹⁵ Pônây phung Sêba rduh lăp jêh ri ntŭng lĕ ro. Khân păng nkhĭt lĕ phung oh mon ma đao, knŏng du huê gâp klaih nchuăt sǐt mbơh ma may.”

¹⁶ Bunuyh aơ dôl hôm ngơi, du huê bunuyh êng văch mbơh: “Ŭnh Brah Ndu tă bơh klơ trôk jŭr su lĕ phung biăp jêh ri phung oh mon, hôm e du huê gâp klaih nchuăt sĭt mbơh nau ma may.”

¹⁷ Bunuyh aơ dôl hôm ngơi du huê bunuyh êng nchuăt văch mbơh: “Phung Kaldê tâm pă pe phung văch rduh pit in djôt lĕ seh samô. Khân păng sŏk đao nkhĭt lĕ phung oh mon, knŏng êng du huê gâp dơm klaih nchuăt sǐt mbơh nau ma may.”

¹⁸ Bunuyh aơ dôl hôm ngơi, du huê bunuyh êng nchuăt văch mbơh tay: “Phung kon bu klâu kon bu ur may dôl nhêt sa tâm ngih nâu bôk rah,

¹⁹ ƀât lât geh sial toyh tă mpeh bri rdah ri khôm tât ƀư puăn njônh ngih rgloh n'gơ jêh nây rlâm lĕ, nklân khĭt phung bunuyh mom, knŏng du huê gâp klaih khĭt sĭt mbơh nau ma may.”

²⁰ Y-Yôp dâk ro, nkhêk ao păng jêh ri poih bôk jêh nây chon mon ta neh mbah yơk

²¹ jêh ri lah: “Gâp rah rhôk luh bơh ndŭl me Gâp mra plơ̆ sĭt rah rhôk tay đŏng; Brah Yêhôva hŏ ăn jêh, Brah Yêhôva plơ̆ sŏk sĭt tay; Khư tâm rnê amoh Brah Yêhôva!”

²² Tâm lĕ kan nây, Y-Yôp mâu tih ôh jêh ri mâu lĕ ngơi nau nduyh ma Brah Ndu.